6 апрельста республикань Госсобранияса ётафтовсь «круглай шра», коса ванондовсть ЖКХ-нь кизефксне.
Мероприятиять вятезе Мордовия Республикань Государственнай Собраниять Председателенц заместителец Сергей Вдовин.
«Круглай шраса» примасть участия региональнай и муниципальнай законодательнай органонь депутатт, Правительствань профильнай министерствань, Саранск ошень администрациянь, Од ломанень Парламентонь и Правительствань, управляющай компаниянь и ТСЖ-нь представительхть.
Заседаниять панжемста Сергей Вдовин мярьгсь: кле, ЖКХ-нь услугатнень качествасна кеподеви аньцек коммунальнай инфраструктурать одкстоптовоманц вельде.
Коммунальнай услугатнень тарифснон полафтомаснон колга азондсь республикань тарифнень коряс Госкомитетть председателец Алексей Рязанов, коммунальнай услугань пандомста лезксонь максомать колга—Мордовиянь Населениять занятостенц и социальнай ширде араламанц коряс министерствань отделть начальникоц Любовь Евстифеева, республикань жилищно-коммунальнай хозяйствать модернизациянц и реформированиянц колга—энергетикань и ЖКХ-нь министрть заместителец Елена Цыцарева.
Выступленияса кепотьф кизефкснень коряс эсь мяльснон азозь «СаранскГорводканал» МП-ть директороц Юрий Шохин, Саранск ошень хозяйствань кизефкснень коряс Управлениянь начальниксь Евгений Кручинкин, ТСЖ-нь председательсь Елена Лизунова, Госсобраниянь бюджетть, финанснень и налокнень коряс комитетть председателец Светлана Киселёва, Экономикать, промышленностть и предпринимательствать коряс комитетть председателец Ринат Раимов и лиятне.
Сяда тов «круглай шраса» покодихне азсть предложеният, конат лездыхть республикань Госсобранияти, Правительствати, местнай самоуправлениянь оргаттненди кеподемс ЖКХ-нь услугатнень качестваснон.
Владимир Нестеров.