Архивы Спорт - Мокшень Правда

Рузаевкаса строяви Единоборствань дворец

Мокшень Правда — Thu, 28 Mar 2024 08:43:18 +0000

Рузаевкаса Победать 40 кизонц ульцять эзга строяви Спортивнай единоборствань дворец. Тяниень пингть мольфтевихть бетоннай кияксть ладяманц коряс работат.
Кафта этажса зданиять марстонь площадец 1300-да лама квадратнай метра. Проектть коряс тяса кармайхть единоборствань и бароцямань залхт. Помещениятнень эса ладяви сембе эрявикс оборудованиясь.
Мордовиянь Оцюнять и республикань Правительствать ширень кирдемаснон вельде нолдафт средстват инженернай коммуникациятненди технологическяй подключениянди и петемань-мазоптомань тефненди. Благоустройствать мяльса кирдезь строявихть подъезднай ки и Дворецть перьфке кинят, тиеви парковка, ладяви тренажёрнай площадка, а стане жа футболонди, баскетболонди и волейболонди универсальнай площадка.

Сообщение Рузаевкаса строяви Единоборствань дворец появились сначала на Мокшень Правда.

Денис Козлов—боксть коряс ПФО-нь чемпион

Мокшень Правда — Thu, 28 Mar 2024 08:35:21 +0000

Саранскяйса шумордавсь 19-40 кизоса алятнень ёткса боксть коряс ПФО-нь чемпионатсь. Пялькстоматнень эса примась участия 100 спортсмен Приволжскяй федеральнай округста.
Олег Маскаевонь лемса боксть коряс олимпийскяй резервань спортивнай школань 22 кизоса воспитанниксь Денис Козлов сатозе зрнянь медальть 92 килограммати молемс сталмонь категорияса. Васенце вастть инкса тюремаса сон сяськозе Ульяновскяень боксёрть Владислав Кузнецовонь.
Мордовиянь спортсметтнень ёткста лац няфтезе прянц стане жа Виктор Пономарев. Сон сатозе бронзать 80 килограммати молемс сталмонь категорияса.

Сообщение Денис Козлов—боксть коряс ПФО-нь чемпион появились сначала на Мокшень Правда.

Республикань эряйхне занцихть пря спортса

Мокшень Правда — Thu, 21 Mar 2024 11:42:43 +0000

«Демография» национальнай проектть «Спорт—норма жизни» региональнай проектонц мяльса кирдезь Мордовияса коль сяда лама ломань шарфни мяль физкультурати и спортти. 2023 кизоня ся ломаттнень, конат фалу якайхть спортивнай сооружениятненди, талекасна пачкодсь республикань населениять 54 процентонцты. Спортивнай объекттнень мархта обеспечендамать уровенец—82,9 процент.
Тяфта, Ковылкинскяй, Большеберезниковскяй, Лямбирскяй и Ромодановскяй райоттнень эса меля ладяфтольхть ГТО-нь норматнень пяшкодеманкса площадкат. Республикань эряйхнень «Готов к труду и обороне» Всероссийскяй физкультурно-спортивнай комплексть нормативонзон анокламаснонды и пяшкодемаснонды водендамасна—проектть васенце целензон эзда фкясь.
Кизоньберьф максфоль государственнай ширень кирдема 11 организацияти, конат аноклайхть спортивнай резерва Россиянь сборнай командатненди, и грантовай ширень кирдема 4 НКО-тненди, конат ётафнесазь эряфс физическяй культурать и спортть мархта сотф проекттнень. Тяда башка, олимпийскяй резервань 3 спортивнай школатненди рамаф спортивнай оборудования и инвентарь.
Проектть мяльса кирдезь арьсекшневи тиемс спортивнай инфраструктурань объектт и одкстоптомс синь. 2023 кизоня шумордаф Саранскяйса ВМХ тректь строямац—объектсь панчфоль 25 августста, мзярда ётафтовсь ВМХ велосипеднай спортть коряс Россиянь чемпионатсь.

Сообщение Республикань эряйхне занцихть пря спортса появились сначала на Мокшень Правда.

«Старт» стадионца пялькстсть «моршне»

Мокшень Правда — Thu, 14 Mar 2024 16:49:42 +0000

10 мартста «Старт» стадионца ётафтовсть тялонь уендемать коряс пялькстомат. Синь аноклазь и ётафтозь Саранск ошень округонь физическяй культурать, спортивнай инфраструктурать и од ломанень политикать виияфтоманц коряс управлениясь, ведь лангса араламань Всероссийскяй обществать (ВОСВОД) Мордовскяй региональнай отделенияц, МР-нь шумбрашинь кемокстамань и тялонь уендемань Федерациясь Мордовия Республикать эзга РФ-нь МЧС-нь ГУ-нь ГИМС-ть ширень кирдеманц вельде.

Саранскяень спортсменда башка пялькстомаса примасть участия Пензенскяй областень «Сурские моржи» клубонь воспитанникне, а стане жа Краснослободскяй, Атяшевскяй и Лямбирскяй райононь представительхне.
Пялькстоматнень панжемаста выступандасть МР-нь Госсобраниянь депутатсь Сергей Екатеринин, ГИМС-нь Центрань инспекторсь Александр Романов, ВОСВОД-нь Мордовскяй региональнай отделениять председателец, Центральнай советть президиумонц членоц, генерал-лейтенантсь Валерий Евдокимов и лиятне.
Пялькстоматнень эса сяськсть (12,5 и 25 метрань дистанцияса): Аделина Арсланова (26№ лицейсь), Анастасия Бузова (Пензенскяй областсь), Майя Сидорова (Саранск ошсь), Ольга Лосева (Пензенскяй областсь), Мария Софронова (Саранск ошсь), Кирилл Екатеринин (26№ лицейсь) и лиятне.
Нинге кафта «моршне»—Раиль Катиков (Лямбирскяй районць) и Андрей Поляков (Саранск ошсь)—уезь 50 метрань дистанциять. Сяськихне и призёрхне казьфт медальса, грамотаса, лятфнембяленди казнеса.

Сообщение «Старт» стадионца пялькстсть «моршне» появились сначала на Мокшень Правда.

Россиянь чемпиоттнень лемсна содафт

Мокшень Правда — Thu, 14 Mar 2024 16:48:09 +0000

9-10 мартста Саранскяйса ётафтовсь конькаса синхроннайста курькснемать коряс Россиянь чемпионатсь. «Огарёв Арена» универсальнай залть эенц лангса сяськомать инкса тюрсь 18 командаста пцтай 500 спортсмен, конат сашендсть 13 регионцта. Цебярьхнень ёткста инь цебярьхне няфтезь эсь маштомошиснон нюрьхкяня и произвольнай программатнень эса. Азсаськ, што республикасонк ня пялькстоматне ётафтовсть нилецеда ни.

—Тейнек оцю честь ётафнемс тяфтама серень пялькстомат. Эрь мезне—тя эйть лангса театра, кона салай мяль. Минь карматама старандама сяда товга ётафнемс синь тяфтама жа серьса,—азозе МР-нь спортонь министрсь Ольга Игошева.
Кафта шиньберьф трибунатнень лангса пуромкшнесь аф кржа болельщик. Синь сашендсть налхкш мархта, кайгиста юватькшнезь кельгови командаснон лемснон, кепсезь вяри флакнень. Фигурнайста курькснемань кельгихненди пялькстоматне арасть афкуксонь илакс.
Сяськикс лиссть: спортонь мастеронди кандидаттнень ёткса—«Юность» командась (Свердловскяй областсь), спортонь мастерхнень ёткса—«Парадиз» командась (Санкт-Петербург ошсь).
—Курькснемань программать шумордамдонза меле стирнятнень сельмосна пяшксетольхть сельмоведьта,—азозе питерскяй «Парадизть» участницанзон ёткста фкясь.—Тя ся, мезти минь молеме сезононьберьф.
Отмечафоль и Мордовиянь «Лексема» командась. Пресс-конференциять пингста главнай судьясь Владислава Глазкова азондсь саранскяй воспитанницатнень мялень салай выступленияснон колга, но, ужяленди, фигуристкатненди ашезь удала пялькстомс медальхнень инкса.

Сообщение Россиянь чемпиоттнень лемсна содафт появились сначала на Мокшень Правда.

Спортсменоньке инь виихнень ётксот

Мокшень Правда — Thu, 07 Mar 2024 16:10:14 +0000

Мордовиянь спортсметтне сатсть медальхть Россиянь Первенстваса. Олимпийскяй резервань Комплекснай спортивнай школань соксса курькснись Екатерина Никитина арась колмоцекс 20 вайгяльбень дистанцияса масс-стартса.

Васенце и омбоце васттнень занязь Дарья Непряева и Елизавета Маслакова.
Мордовиять копилкас кафта медальхть кандсь Егор Митрошин. Сон арась омбоцекс спринтса и сяськикс масс-стартса.

Сообщение Спортсменоньке инь виихнень ётксот появились сначала на Мокшень Правда.

Эйть лангса кармай «пси»

Мокшень Правда — Thu, 29 Feb 2024 11:35:39 +0000

Саранскяйса ётафтовихть фигурнайста курькснемать коряс
Международнай пялькстомат

1 мартста сявомок 4 мартти молемс Саранскяйса, «Огарёв Арена» универсальнай залса (Б.Хмельницкяень ульцяц, 35А№ кудсь), ётафтовихть «Кубок Дружбы» фигурнайста курькснемать коряс Международнай межклубнай пялькстомат. Эйть лангс лисихть Россиянь и Беларусень командатне.
Программась:
1 мартста—15.00 частста сявомок 20.05 частти молемс;
2 мартста—11.30 частста сявомок 21.05 частти молемс;
3 мартста—12.00 частста сявомок 20.30 частти молемс;
4 мартста—12.00 частста сявомок 17.30 частти молемс.
Билетт ули кода рамамс «Огарёв Арена» залть кассаса или kassir.ru сайтса.

Сообщение Эйть лангса кармай «пси» появились сначала на Мокшень Правда.

«Лыжня России» акциясь пуропнезень спортонь кельгихнень

Мокшень Правда — Thu, 15 Feb 2024 08:05:49 +0000

10 февральста Мордовияса ётафтовсь «Лыжня России» Всероссийскяй массовай соксса курькснемань акциясь. Эсонза примасть участия школьникт, студентт, спортонь кельгихть и ветератт, республикань общественнай деятельхть, а стане жа лия региоттнень эзда инжихть.
Тяддень «Лыжня России» акциясь лемтьф фашистскяй блокадать эзда Ленинградть воляс нолдаманц 80 кизонцты: тейнек эряви фалу мяляфтомс Великай Отечественнай войнаса народоньконь подвигонц.
Тя шиня Лыжно-биатлоннай комплексу сашендсь Мордовиянь Оцюнясь Артём Здунов. Сон и макссь ушеткс соксса курькснемати. «Тядде афкуксонь тяла—лов и якшама мархта, кодамкс улема Россияса. Азан благодарностень валхт сембонди, кие сась тячиень мероприятияс—минь комозцеда ётафтсаськ «Лыжня России» акциять,—мярьгсь МР-нь Оцюнясь Артём Здунов.—Ведьгемоньда лама семья сась эстафетас. Сюкпря, мес саде идентень мархта. Сатфкст, цебярь мяльхть и сембонди шумбраши!»
«Лыжня России» мероприятиясь ётась Мордовиянь сембе райоттнень эзга. Эсонза примась участия 3000-да лама ломань.

Сообщение «Лыжня России» акциясь пуропнезень спортонь кельгихнень появились сначала на Мокшень Правда.

Мордовиянь Оцюнясь васетькшнесь фигурнайста курькснемань Федерациять руководстванц мархта

Мокшень Правда — Thu, 08 Feb 2024 12:20:16 +0000

Мордовиянь Оцюнясь Артём Здунов 6 февральста васетькшнесь Россиянь конькаса фигурнайста курькснемань Федерациять генеральнай директоронц Александр Коганонь и Федеральнай тренерскяй Советть председателенц Елена Чайковскаять мархта.

Ванондовсть республикаса фигурнайста курькснемать виияфтоманц и регионца всероссийскяй уровенень пялькстоматнень ётафтомаснон коряс кизефксне.
6-8 февральста Мордовиять столицаса «Огарёв Аренаса» ётафтовсь юниорхнень ёткса фигурнайста курькснемать коряс Россиянь Первенствась.
Александр Коган азсь благодарностень валхт республикань Оцюняти, сяс мес миньцонк оцю мяль шарфневи спортонь тя видти. «Минь ашелеме Саранскяйса кафта кизот, и тя пингста ламось полафтсь: и инфраструктурась вииякшни, и ошсь касы. Фигурнайста курькснемаса эвондакшнихть од спортсметт»,—мярьгсь сон.
Елена Чайковская китькстазе: «Саранскяи и спортсметтне, и тренерхне фалу сашендыхть кепотьф мяльса. Тяса эсь лацонь атмосферась».
1 мартста сявомок 4 мартти молемс Саранск ошса ётафтовихть «Кубок Дружбы» международнай межклубнай пялькстоматне, а 8 мартста сявомок 11 мартти молемс—конькаса синхроннайста курькснемать коряс Россиянь чемпионатсь и первенствась.
Васедемаса примасть участия республикань Правительствать Председателенц васенце заместителец Галина Лотванова и МР-нь спортонь министрть тевонзон тиендисна Ольга Игошева.

Сообщение Мордовиянь Оцюнясь васетькшнесь фигурнайста курькснемань Федерациять руководстванц мархта появились сначала на Мокшень Правда.

Ётафтови «Лыжня России-2024» акциясь

Мокшень Правда — Thu, 01 Feb 2024 11:12:19 +0000

10 февральста Саранск ошса, Лыжно-биатлоннай комплексть территорияса (Энгельсонь ульцяц, 31№ кудсь), ётафтови «Лыжня России» Всероссийскяй акциясь. Эсонза примай участия 4 тёжятть ломань. Ётксост профессиональнай спортсметт, республикань общественнай деятельхть, спортонь ветератт, а стане жа лия региононь инжихть. 18 кизосотненди молемс участникненди ласькома 5 вайгяльбет, оцюфненди—10 вайгяльбет.
Участиянь примаманкса заявка ули кода максомс «Госуслуги» порталть вельде 8 февральти молемс.
Стартовай номерхне кармайхть макссевома Олимпийскяй резервань комплекснай спортивнай школаса тяфтама адресс коре: Саранск ошсь, Терешковать ульцяц, 24А№ кудсь.

Сообщение Ётафтови «Лыжня России-2024» акциясь появились сначала на Мокшень Правда.