Архивы В Правительстве РМ - Мокшень Правда

Оперштабть заседанияста

Мокшень Правда — Thu, 28 Mar 2024 08:32:38 +0000

25 мартста Республикань Кудса Мордовиянь Оцюнять Артём Здуновонь председательстванц ала ётафтовсь региональнай оперативнай штабть заседанияц. Корхтафоль республикаса лама ломанень пуропни объекттнень эса безопасностть обеспечендаманц колга.
Совещаниять панжемста МР-нь Оцюнясь азозе, што Мордовиясь ризнай марнек странать мархта зиянц, кона ульсь «Крокус Сити Холлса», повфнень инкса. Шавфне лятфтафтольхть минута кашт аф молезь ащезь.
—Аеркс террористтнень кядьта шавовсь кемотть мирнай ломань, аф аньцек Москувонь и Московскяй областень эряйхть—улихть и минь земляконьке. Мордовиясь ризнай марнек странать мархта. Минь задачаньке—примамс общественнай безопасностть обеспечендаманкса сембе мератнень,—мярьгсь республикань руководительсь.
Общественнай мероприятиятнень ётафтомста зиянонь аф нолдамать колга пачфтсть МР-ть эзга МВД-нь, Росгвардиянь МР-ть эзга Россиянь МЧС-нь Главнай управлениянь, а стане жа республиканскяй министерствань представительхне.
Республикань Оцюнясь макссь порученият дополнительнай мерань примамать коряс, конат водендафт лама ломанень пуропни объекттнень эса безопасностть обеспечендаманцты. Арьсеф ётафтомс объекттнень эса экстремальнай условияса прянь вятемать коряс тренировкат.

Сообщение Оперштабть заседанияста появились сначала на Мокшень Правда.

Артём Здунов: «Марса аф пелезьмольхтяма инголи!»

Мокшень Правда — Thu, 21 Mar 2024 11:39:49 +0000

18 мартста Республикань Кудса Мордовиянь Оцюнясь Артём Здунов васетькшнесь журналисттнень мархта. Брифингть пингста сон пачфтсь Мордовияса Российскяй Федерациянь Президентонь кочкаматнень итогснон колга.
Кода азозе региононь руководительсь, кочкаматне миньцонк ётафтовсть законц коре, панжада и сетьмоста. Колсемат ашельхть.
—Республикань эряйхне няфтсть оцю активность, кочкамань колмоцьке шитнень избирательхне кепотьф мяльса эряскодсть избирательнай участкатненди,—азозе Мордовиянь Оцюнясь.—Ламотне сашендсть семьянек, шабаснон мархта. Явкас коре, а тя 85 процент, Мордовиясь занцесы васенце вастть Приволжскяй федеральнай округса и нилеце вастть ПФО-са Владимир Путинонь кандидатуранц инкса голосованиянь результаттнень коряс. Инксонза эсь вайгяльснон максозь избирательхнень 89-да лама процентсна. Сембе лия кандидаттне марса кочкасть 10-да кржа процент: Николай Харитонов—4,22 процент, Леонид Слуцкий—3,00 процентт, Владислав Даванков—2,38 процент.
Артём Здунов стане жа азозень республикань аймакнень, коса лиятнень коряс сяда ламоль кочкаматненди сайда. Нят Атяшевскяй, Ромодановскяй, Дубёнскяй, Темниковскяй, Торбеевскяй, Старошайговскяй, Теньгушевскяй, Кочкуровскяй райоттне. Целайнек комсь фкя муниципалитетса явкась ульсь 90-да лама процент. Президентть инкса инь лама вайгяльда максфоль Темниковскяй, Старошайговскяй, Теньгушевскяй и Краснослободскяй райоттнень эса.
—Шарфтан мяль, што Владимир Владимирович Путинонь инкса избирательхнень вайгяльснон 90-да лама процентсна максфоль республикань 21 муниципальнай образованияса,—азозе региононь руководительсь.—Тяда ингольдень кочкаматнень эса тячиень Президентсь тяфтама ширень кирдема получась аньцек 13 районца. Артём Здунов азсь спасибамань валхт республикань эряйхненди, кит ашесть ляда ширеса и састь избирательнай участкатненди.
—Кельгома землякт, сюкпря теенть активнай гражданскяй позициянкса, аф озадонь седихть ащеманкса, странаньконь, республиканьконь, иденьконь сай пингснонды правильнайста малаткшнеманкса,—мярьгсь республикань Оцюнясь.
Благодарностень валхт азфтольхть сятненди, кит заняфтольхть штапнень, инициативнай группатнень работасост, доброволецненди, медикненди, правоохранительнай органонь представительхненди, журналисттненди.
Артём Здунов пачфтезе: 6 тёжятть активнай гражданинць ульсть избирательнай комиссиянь членкс. Работасна аф тёждяль, но синь семботь кирдезь и лац пяшкодезь тевснон. Сембоц 739 избирательнай участкаса работась эрь-кодама партиянь и организациянь эзда 2,5 тёжяньда лама наблюдатель. 260 участкась обеспечендафтольхть видеонаблюдениянь системаса. Тевс нолдафтольхть каипне—эздост миньцонк ульсь 66. Мордовияса ня шитнень работасть международнай экспертт миронь 10 странаста. Синь китькстазь получаф результаттнень объективнайкс улемаснон и легитимностьснон.
—Лувондса, што Российскяй Федерациянь Президентсь получась ломаттнень эзда кеме ширень кирдема. Минь лядоме работама вии национальнай лидеронь видеса, сонь пацянц ала. Тейнек тя важнай кочкама!—мярьгсь Артём Здунов.
Мордовиянь Оцюнясь китькстазе, што инголе оцю работа проекттнень коряс, конатнень ширеснон кирдезень странань Президентсь. Тя особай экономическяй зонать тиемац, социально-экономическяй касондомань-вииякшнемань индивидуальнай программать пяшкодемац, СВО-нь участникнень ширеснон кирдемац и реабилитациясна.
—Минь марса мархтонт тяни тиендьсаськ Россиять од историянц!—мярьгсь Артём Здунов. Сон стане жа шарфтсь мяль решениятненди, конат азфтольхть Россиянь Президентть Посланиясонза и конат панчсихть кели ки Мордовияти касондоманкса-вииякшнеманкса. Васендакиге, тя государственнай шумоть кирьфтамац, семьятнень и од ломаттнень, демографиять, трудовой ресурснень ширеснон кирдемац.
—Сембе ня решениятнень карматама ётафнемост эряфс республикасонк, васенцекс—участвовандама президентскяй программатнень эса, водендакшнема средстват, строяма. Минь сембе мирти няфтеськ, што марсотама, аф ваномок кодамовок провокация лангс. Аф пелезь мольхтяма инголи!—мярьгсь Артём Здунов.
Ольга ЕВДОКИМОВА.

Сообщение Артём Здунов: «Марса аф пелезьмольхтяма инголи!» появились сначала на Мокшень Правда.

Мордовиянь Оцюнясьпримась участия «ЕдинаяРоссия» партиять Генсоветонц Президиумонц заседанияса

Мокшень Правда — Thu, 21 Mar 2024 11:36:06 +0000

19 мартста Мордовиянь Оцюнясь Артём Здунов видеоконференцсвязть коряс примась участия «Единая Россия» партиять Генеральнай советонц Президиумонц заседанияса, кона ётафтовсь Генсоветть Секретаренц Андрей Турчаконь председательстванц ала. Заседаниять пингста тифтольхть итокт Россиянь Президентонь кочкаматненди.

Сатфоль историческяй результат: явкась арась 77 процент, вайгяльснон максозь 76 миллион 280 тёжянь ломань. «Тя корхтай Владимир Путинонди гражданоньконь оцюдонга оцю доверияснон колга. Кочкаматне ётасть эряйхнень лангс люпштамать, эвфнемаснон пингста. Курскяй, Белгородскяй областтнень эса вайгялень максомась ётнесь ляцендематнень ала. Сембе ня региоттнень эса явкась и лидероньконь инкса результатсь—сяда оцюфт среднероссийскяйхнень коряс»,—азозе Андрей Турчак.
Заседанияса стане жа азфоль, што тяддень сентябрь ковста Вайгялень максомань единай шиня 40 регионца ётафтови 67 избирательнай кампания. Андрей Турчак азозе, што СВО-нь участникнень лувксста кандидаттненди ули максф сембе ширдень лезкс процедурати анокламать коряс и меле избирательнай кампаниять пингста.
«Посланиянц эса Президентсь лемдезень СВО-нь участникнень од элитакс. Ломанькс, конатненди занцемат ведущай васттне властьса, бизнесса, госкомпаниятнень эса. «Единай Россиясь» нинге меля ушедсь активнайста водендакшнемост синь политикати. Ламотне сятнень ёткста, кит мрдасть фронтста, етай кизонь вайгялень максомань единай шить итогонзон коряс арасть эрь-кодама уровенень депутатокс»,—лятфтазе Андрей Турчак.
Заседаниять пингста кулхцонтфтольхть странань кой-кона региоттнень эса, тяконь лувксса Белгородскяй областьса и Донецкяй Народнай Республикаса, кочкамань итокнень колга доклаттне.

Сообщение Мордовиянь Оцюнясьпримась участия «ЕдинаяРоссия» партиять Генсоветонц Президиумонц заседанияса появились сначала на Мокшень Правда.

Ширезонк сашендсь Россиянь ЖКХ-нь министрть заместителец

Мокшень Правда — Thu, 07 Mar 2024 09:24:45 +0000

4 мартста Мордовияв рабочай поездка мархта сашендсь Россиянь строительствань и жилищно-коммунальнай хозяйствань министрть заместителец Алексей Ересько. Сон ванозень благоустройствань и строительствань, инженернай и социальнай инфраструктурань кой-кона объекттнень.

Н.П.Огарёвонь лемса МГУ-са РФ-нь строительствань и ЖКХ-нь министрть заместителец васетькшнесь ректорть Дмитрий Глушконь мархта. Синь корхтафтозь строительствань и ЖКХ-нь сфераса вузть технологическяй проектонзон. Университетонь ректорсь азондсь Мордовиянь учёнайхнень колма перспективнай проектснон колга: радиопоглощающай материалть, пористай стеклокерамикать и зданиять уштомаса индивидуальнай тепловой пунктть квалма. Мекольцеть лангс инжись шарфтсь башка оцю мяль.

Республикань Кудса совещаниять пингста корхтамась мольфтевсь цебярь ошень средань тиемать и коммунальнай инфраструктурать одкстопнеманц колга.

Азфоль, што эрь кизоня Мордовияса ётафневи жилищно-коммунальнай хозяйствать реформированиянц, ломаттненди эрямань цебярь условиянь тиендемать коряс оцю работа. Фкя инь васенце важнай прябалась, конань лангс шарфтома башка мяль, коммунальнай инфраструктурать таштомомац. Жилищнай фондть цебярьгофнеманкса Мордовиясь примси активнай участия федеральнай проекттнень и государственнай программатнень эряфс ётафтомасост.

Меля республикаса водендафоль 436 миллион цалковай «Жильё и городская среда» нацпроектть «Формирование комфортной городской среды» федеральнай проектонц коряс, «Ару ведь» проектть коряс—164 миллион цалковай, «Комплексное обращение с твёрдыми коммунальными отходами»—1 миллиард 200 миллион цалковай.

Корхтаманди башка темакс арась петемань-мазоптомань объекттнень инкса Всероссийскяй рейтинговай вайгялень максомась. 2024 кизоня Саранскяйса сави кочкамс колма территориятнень ёткста фкять, Рузаевкаса—кафттнень эзда фкять. Стане жа тядде ушедовсь цебярь ошень средань тиемань инь цебярь проекттнень Всероссийскяй конкурссост кафта проекттнень-сяськихнень эряфс ётафтомасна Инсараса и Темникавса.

«Мордовия Республикась активнайста примси участия территориятнень кочкамаснон коряс вайгялень максомаса и сатомшка лац ётафнесы эряфс тя проектть. Конкурсть рамкаса тяса ётафтфт ни эряфс кафкса проектт, «Формирование комфортной городской среды» федеральнай проектть коряс—300-та лама. Тя цебярь показатель»,—мярьгсь РФ-нь строительствань и ЖКХ-нь министрть заместителец Алексей Ересько.

Совещаниять шумордамста отраслянь инь цебярь представительхненди максфтольхть государственнай казнет.

Ширесонк улемстонза Алексей Ересько ванозе Донбассонь аралайхнень скверснон, коса строяф «Державная» Божий Матерть ликонянц лемс часовня. Тяса ётафтовсть СВО-нь участникнень шумбрашиснон инкса молебен и шавф земляконьконь лятфнеманкса лития.

Стане жа министрть заместителец ульсь Подольскяй курсанттнень скверсост, кона стане жа одкстоптфоль нацпроектть рамкаса. Марса вице-премьерть Инсаф Хайруллинонь мархта Алексей Ересько ванозень ошень очистной сооружениятнень. Россиянь Президентть поручениянц коряс тяса сави тиемс оцю реконструкция.

Министрть заместителец макссь оценка «Стимул» федеральнай программать эса республикать участвовандаманцты—Саранскяйть северо-восточнай пялькссонза мольфтеви 600 вастонди школать, кить и инженернай коммуникациятнень строямасна. Аньцек меля тя программать рамкаса республикась шумордазе 11 объектть—синь лувкссост автомобильнай кит, канализационнай коллектор Саранскяйса. Тядде арьсекшневи строямс ниле автомобильнай кит, канализацият и водоснабжениянь объектт.

Сообщение Ширезонк сашендсь Россиянь ЖКХ-нь министрть заместителец появились сначала на Мокшень Правда.

Ширезонк сашендсь РФ-нь транспортонь министрсь Виталий Савельев

Мокшень Правда — Thu, 15 Feb 2024 08:15:26 +0000

12 февральста Мордовияв рабочай поездка мархта сашендсь Россиянь транспортонь министрсь Виталий Савельев. Стане жа делегациять лувксса ульсть РФ-нь транспортонь министрть заместителец—статс-секретарсь Дмитрий Зверев, Росавтодорть руководителец Роман Новиков, воздушнай транспортонь Федеральнай агентствать руководителец Дмитрий Ядров, «РЖД» ОАО-ть генеральнай директоронц заместителец. Мордовиянь Оцюнясь Артём Здунов и Виталий Савельев ванозь «Безопасные качественные дороги» нацпроектть мяльс сявозь Ботевградскяй и Титовонь ульцятнень эзга капитальнайста петьф сеттнень, Рузаевка ошть шарксонц—сембе работатнень арьсекшневи шумордамс тядде.

Стане жа ванозь Коммунистическяй ульцять эзга Инсар ляйть туркс седть, кона ащи культурнай наследиянь объектокс. Тя фкя инь основной седсь, кона сотнесыне ошть северо-восточнай и центральнай райононзон.
Россиянь Транспортонь министерствать руководителец ульсь Саранск ошень аэропортса, коса мелянь декабрьста шумордавсть объектть техническяй оснащениянц коряс работатне. Межведомственнай комиссиясь азозе Саранск ошень аэропортть кондястикс сембе вешфкснень коряс.
Васедемать пингста ванондовсь регионть дорожнай отраслянц виияфтомац. Корхтамась мольфтевсь Саранскяень подвижной составть одкстоптоманц колга. Россиянь Транспортонь министерствась арьсекшни 2024 кизоня максомс регионти ёмла классонь низкопольнай 4 автобуст.
Артём Здунов и Виталий Савельев стане жа примасть участия Мордовиянь транспортонь и дорожнай хозяйствань Государственнай комитетть итоговай коллегиясонза. Панжемок мероприятиять, РФ-нь Транспортонь министерствать руководителец китькстазе: региоттнень эзга дорожнай инфраструктурать качестванц касфтомац—Россиянь транспортнай системать виияфнемаса инь васенце тевсь.
Регионца мольфтеви транспортнай од инфраструктурань тиевомань эрявикс проекттнень эряфс ётафтомасна. Транспортнай комплексонь оцюнясь лятфтазе, што 2024-2026 кизотнень Мордовиянь китнень петеманкса федеральнай бюджетста арьсекшневи нолдамс 12,4 миллиард цалковай.
«Тяниень пингонь и кеме транспортнай инфраструктурать тиемац—стратегическяй задачатнень, конатнень путозень транспортнай комплексть инголе РФ-нь Президентсь Владимир Путин, эзда фкясь,—китькстазе Артём Здунов.—2023 кизоня Мордовиянь дорожнай фондть объёмоц ульсь 13 миллиард цалковайда лама—пцтай 25-ксть сяда лама колма кизода ингольденнеть коряс. Сюкпря Росавтодорти и Транспортонь министерствати лезксонкса и ширень кирдеманкса. Дорожнай фондть вельде мекольдень кизотнень минь решандаме лама кизефкс».
Республикаса мольфтеви кафта проекттнень коряс работась—Мордовиянь Темниковскяй районца «с. Старый Город—д. Вещерка» и Нижегородскяй областень Вознесенскяй районца автомобильнай кить строямац и «Саранск—Рузаевка» трассать одукс петемац.
Коллегиять пингста Артём Здунов и Виталий Савельев макссть государственнай казнет ся работникненди, конат тисть оцю путкс Россиянь и Мордовиянь транспортнай отраслять виияфтомаса.

Сообщение Ширезонк сашендсь РФ-нь транспортонь министрсь Виталий Савельев появились сначала на Мокшень Правда.

МР-ть эзга главнай федеральнай инспекторкс кемокстаф Анатолий Гулин

Мокшень Правда — Fri, 24 Nov 2023 11:08:31 +0000

21 ноябрьста Мордовияв рабочай поездка мархта сашендсь Приволжскяй федеральнай округса Россиянь Президентть полномочнай представителец Игорь Комаров. Республикань Кудса ётафтовсь Мордовия Республикать эзга главнай федеральнай инспекторть—Анатолий Гулинонь мархта офи-
циальнай содафтома.
Анатолий Николаевич—ломанць республикати аф од. Сон шачсь Краснослободскяй райононь Сире Сендру велеса, образованияс коре врач, лама киза покодсь Мордовияса: ульсь Атюрьевскяй райононь оцюнякс, Мордовскяй республиканскяй клиническяй больницянь главнай врачекс, Мордовиянь здравоохранениянь министркс. Сяльде работась Россиянь Здравоохранениянь министер-
стваса, ульсь Ярославскяй областень Правительствать Председателенцты заместителькс, Катастрофань медицинань Федеральнай центрань директорти васенце заместителькс. Анатолий Гулин—медицинскяй наукань кандидат.
Азомок задачатнень, конат ащихть главнай федеральнай инспекторть инголе, полпредсь шарфтсь мяль, што васендакиге корхтамась мольфтеви РФ-нь Президентть Владимир Путинонь поручениянзон пяшкоть- кшнемаснон колга, тяконь лувксса странать виияфнеманкса национальнай цельхнень и стратегическяй задачатнень сатомаснон коряс.
«Анатолий Николаевич Гулинонь оцю опытоц, сон трудендакшнесь властень муниципальнай, региональнай и федеральнай оргаттнень эса. Лац содасы, кодама Мордовияса ситуациясь—тяса сон шачсь и ушедозе трудовой кинц. Кеман, опытсь и профессионализмась лездыхть теенза курокста решандакшнемс путф задачатнень. Главнай федеральнай инспекторть лангс РФ-нь Президентть пору- чениянзон пяшкотькшнемаснон мельге контрольть путомац лезды регионть виияфнемаса. Властень региональнай оргаттнень мархта марстонь тевонь вятезь эряви решандамс лама задача социальнай, экономическяй и общественно-политическяй сфераса, а стане жа тя лезды ванфтомс межнациональнай и межконфессиональнай мирть. Мордовия Республикась—тя индустриально-аграрнай регион, коса улихть марнек странати эрявикс компетенцият. Тяконь лувксса пяк важнай сфераса—обороннай промышленностьса. Сяс васенце тефнень ёткста фкясь—ОПК-нь предприятиятнень ширеснон кирдемац, инь вешеви вооружениянь и техникань образецнень нолямаснон коряс прябалатнень решандамаса лездомась, а стане жа кадровай обеспечениясь»,—мярьгсь Игорь Комаров.
«Пара мяльса васьфнетядязь шачема-касома масторсот,—мярьгсь Мордовиянь Оцюнясь, пшкядемок Анатолий Гулинонди.—Тя республикать марстонь политикац, штоба ломаттне мртцельхть Мордовияв. Тон
эряват тяса, штоба виияфнемс экономикать, общественнай, социальнай эряфть. Работада лама, но сембода главнайсь тейнек тяни—СВО-ти задачатнень пяшкотькшнемасна, штоба маласькофтолеськ сяськомать, тиелеськ тянь кода можна сяда курокста, кирделеськ цёраньконь, синь семьяснон ши-
реснон».
«Сюкпря лангозон надияманкса, карман старандама пяшкодемс сонь,—мярьгсь Анатолий Гулин.—Путф задачада лама. Надиян, што республикань руководствать, федеральнай властень территориальнай оргаттнень мархта марстонь тевонь вятезь минь семботь тисаськ».
Игорь Комаров спасибась Михаил Сезгановонди, кона тяда инголе занцезе МР-ть эзга главнай федеральнай инспекторонь вастть, работанкса, казезе сонь Приволжскяй федеральнай округса РФ-нь Президентть полномочнай представителенц Почётнай грамотанц мархта.

Сообщение МР-ть эзга главнай федеральнай инспекторкс кемокстаф Анатолий Гулин появились сначала на Мокшень Правда.

Ширезонк сашендсь ПФО-са РФ-нь Президентть Полномочнай Представителец Игорь Комаров

Мокшень Правда — Fri, 24 Nov 2023 11:01:05 +0000

21 ноябрьста Мордовияв сашендсь Приволжскяй федеральнай округса Россиянь Президентть полномочнай представителец Игорь Комаров. Республикань Кудса ётафтовсь Мордовия Республикань Оцюнять Артём Здуновонь мархта рабочай васедемац. Эсонза примась участия МР-ть эзга главнай федеральнай инспекторсь Анатолий Гулин. Корхтафоль республикать социально-экономическяй ви- ияфнеманц и регионца общественно-политическяй стабильностть ванфнеманц колга.

«Мордовиясь тяни сявонди цебярь темпт касондомаса-вииякшнемаса, сяда тов парста работай, тяконь лувксса няфнемок пример лия региоттненди»,—мярьгсь Игорь Комаров.
Мордовиянь Оцюнясь шарфтсь мяль: республикась касонды-вииякшни Россиянь Президентть Владимир Путинонь ширень кирдеманц вельде. «Нинге аф кунара минь корхнеме государственнай оцю
шумоть колга. Ня шитнень ётаме государственнай финанснень мархта кальдяв управлениянь группать эзда ся группати, коса тя управлениясь мольфтеви кода эряви. Тя оцю работа, кона вятеви Президен-
тоньконь поручениянц коряс,—мярьгсь Артём Здунов.—Работатама налоговай базать и бюджетть доходонзон касфнемаснон коряс».
10 ковонь итокнень коряс няеви касома промышленностьса и АПК-са. Тядде уликсть колмоцекс пялькста келептевсть «Рузаевка» ТОСЭР-ть границанза.
Кизоть аделавомс арьсекшневи панжемс республикаса васенце особай экономическяй зонать. Рекорднай результат мархта аделавсь велень хозяйствань кизось, кочкаф 2 миллионда лама тонна сёра—васенцеда республикать историяса.
Мордовиянь Оцюнясь спасибась Игорь Комаровонди ширень кирдеманкса и азозе, што регионть целец—ванфтомс касондомань-вииякшнемань динамикать.
Тяка шиня полпредсь ульсь Саранскяень од ломанень театраса, кона панчфоль «Россия» кинотеатраса кизонда. Проектсь ётафтф эряфс Культурнай инициативань Президентскяй фондть мархта.
Стане жа ПФО-са РФ-нь Президентть полномочнай представителец содафтсь республикать промышленнай потенциалонц мархта. Марса Мордовиянь Оцюнять Артём Здуновонь мархта Игорь Комаров ульсь «Биохимик», «Оптикэнерго» и «Оптиковолоконные Системы» предприятиятнень эса, коса содафтсь ноляви продукциять, производственнай мощносттнень мархта. Няйфти полпредсь макссь оцю оценка.

Сообщение Ширезонк сашендсь ПФО-са РФ-нь Президентть Полномочнай Представителец Игорь Комаров появились сначала на Мокшень Правда.

Булат Хайрутдинов—МР-нь Оцюнять и МР-нь Правительствать Администрацияснон Руководителец

Мокшень Правда — Thu, 28 Sep 2023 07:14:54 +0000

21 сентябрьста Мордовия Республикань Оцюнясь путозе кяденц Указть алу, конань коряс Мордовия Республикань Оцюнять и Мордовия Республикань Правительствать Администрацияснонды Руководителькс кемокстаф Булат Фирдинатович Хайрутдинов.

Булат Фирдинатович шачсь 1989 кизоня Татарскяй АССР-нь Набережные Челны ошса. 2011 кизоня шумордазе Правосудиянь Российскяй академиять «Юриспруденция» специальностьс коре, 2015 кизоня—Экономикань, управлениянь и правань институтть (Казань ошсь), магистратурать «Экономика» направленияс коре.
Трудовой кинц ушедозе 2011 кизоня Татарстан Республикань Экономикань министерстваса, коса эрь-кодама должностьса, тяконь лувксса юридическяй отделонь начальникокс, Территориальнай развитиянь управлениянь начальникокс, работась 2018 кизоть самс.
2018 кизоста сявомок 2020 кизоть самс—Дагестан Республикань Правительствать Председателенц советникоц.
2020 кизонь декабрьста сявомок—Мордовия Республикань Оцюнять Администрациянц Руководителенц васенце заместителец, 2021 кизонь майста сявомок—Мордовия Республикань Оцюнять и Мордовия Республикань Правительствать Администрацияснон Руководителенц васенце заместителец.
Казьф Российскяй Федерациянь Президентть Благодарностенц, Российскяй Федерациянь экономическяй развитиянь министрть Благодарностенц, Татарстан Республикань министронь кабинетть Благодарностенц, Дагестан Республикать Почётнай грамотанц мархта, «XXVII Всемирная летняя универсиада 2013 года в г.Казань» мяляфтомань медальса. Мордовия Республикань Заслуженнай юрист.
Рьвяяф, касфты цёра и стирь.

Сообщение Булат Хайрутдинов—МР-нь Оцюнять и МР-нь Правительствать Администрацияснон Руководителец появились сначала на Мокшень Правда.

Магомедсалам Магомедов ульсь Сире Теризморгаса

Мокшень Правда — Thu, 24 Aug 2023 13:03:01 +0000

17 августста РФ-нь Президентть Администрациянц Руководителенц заместителец Магомедсалам Магомедов и Мордовиянь Оцюнясь Артём Здунов ульсть Старошайговскяй райононь Сире Теризморга велеса. Тяса работай марнек республикаса и эздонза ичкоздень вастса содаф Национальнай культурань центрась. Сон пуроптфоль мокшень фольклорть, койхнень-обуцятнень, народнай костюпнень и прикладной творчествать ванфтоманкса.

Эрь кизоня Национальнай культурань центрав сашенды 20 тёжяньда лама ломань Россиянь эрь-кодама уженяста, маластонь и ичкоздень омба масторста. Центрать гордостень маряма вастоц—«Крестьянонь усадьба» менель ала этнографическяй музейсь, коса сембось тиф кода сире пингонь мокшень крестьянонь семьяса, а стане жа Сире Теризморгань Народнай хорсь—сон правас коре лувондови Мордовия Республикань фольклоронь эталонкс. Самодеятельнай коллективсь эсь творческяй тевонц ушедозе 1957 кизоня. Хорть репертуарса—сире пингонь 100-да лама мокшень народнай мора. 2019 кизоня коллективсь арась васенце степенень лауреатокс любительскяй творческяй коллектифнень Всероссийскяй фестивальснон-конкурсснон «Народное пение» номинациясонза. Фестивальсь ётафтовсь «Культура» национальнай проектть мяльса кирдезь.
Магомедсалам Магомедовонди ётафтсть экскурсия музейть эзга, содафтозь мокшетнень культураснон, народно-обрядовай творчестваснон, щамснон и национальнай ярхцамбяльснон мархта.

Сообщение Магомедсалам Магомедов ульсь Сире Теризморгаса появились сначала на Мокшень Правда.

МР-нь Оцюнясь примась участия «Битва за умы» форумса

Мокшень Правда — Thu, 24 Aug 2023 12:57:14 +0000

Мордовиянь Оцюнясь, «Единая Россия» политическяй партиять Мордовскяй региональнай отделениянц секретарец Артём Здунов 21 августста примась участия «Битва за умы» Всероссийскяй форумть работаса. Сон пуроптф «Единая Россия» партиять «Мир возможностей» проектонц мяльса кирдезь. Форумса азфтольхть традиционнай российскяй духовно-нравственнай питнишитнень араламаснон и кемокснемаснон коряс предложеният партиять народнай программазонза, а стане жа «Мир возможностей» партийнай проектть од акциянза и мероприятиянза.

Лятфтасаськ, «Мир возможностей» проектсь водендаф сянди, штоба сярьгятькшнемс школьникнень и сяда ёмла шабатнень тядяснон-аляснон мархта конкурсненди, акциятненди и эрь-кодама проекттненди, конат арьсефт од ломаттнень ёткса воспитательнай работать виияфтоманкса.
Мордовиясь арась «Мир возможностей» проектть эряфс ётафтоманц коряс фкя инь цебярь регионкс. Школьникне—акциянь сяськихне молихть «Артек» лагери, республиканьконь делегацияц ули инь оцюсь сембе российскяй региоттнень ёткста.
Мордовиянь Оцюнясь выступандась форумса партиять народнай программанцты предложения мархта. Синь лувкссост—сувафтомс народнай программати «Сохранение и укрепление традиционных ценностей» башка раздел. «Минь васенцетнень лувксса примаськ законть, кона аф мярьгонди кошярямс аватнень абортонь тифтемати,—азозе Артём Здунов.—Пяк внимательнайста работатама пеку аватнень мархта, старандатама ванфтомс синь. Минь улихть наработканьке, форумонь участникненди ули кода содафтомс мархтост».
Омбоце предложениясь—од ломаттнень духовнай просвещенияснон коряс работать виияфтомац. Саранскяйсь ащи марнек Приволжьянь православнай од ломанень центракс. Москувонь и сембе Русень Патриархть Кириллонь ширень кирдеманц вельде республикаса работай Од ломаттнень тевснон коряс Синодальнай отделть Межрегиональнай координационнай центрац.
Нинге фкя предложениясь сотфоль российскяй од региоттнень мархта работать ладяманц-вятеманц мархта. Мордовиясь сявсь шефства Херсонскяй областень Каланчакскяй районть лангса и тяни максси муниципалитетти эрявикс лезкс.
Стане жа Артём Здунов азсь мяль: тиемс «Артек—самая большая смена» художественнай фильма, кона лемдеви Великай Отечественнай войнать ушедоманцты и лагерть эвакуациянцты.
Форумса стане жа примась участия Н.П.Огарёвонь лемса МГУ-нь ректорсь Дмитрий Глушко. Сон шарфтсь мяль проектнай тевти од ломаттнень водендакшнемаснон эрявиксшинцты. «Конкурсне, конат ётафневихть эрь-кодама проекттнень мяльса кирдезь, лезнихть оттненди касондомс-вииякшнемс творческяй ширде»,—мярьгсь сон.

Сообщение МР-нь Оцюнясь примась участия «Битва за умы» форумса появились сначала на Мокшень Правда.