«Единай Росиясь» казезень «Человек труда» национальнай премиянь лауреаттнень

— Трудонь ломаттне – инженерхне, строительхне, энергетикне, велень хозяйстваса работайхне, врачне, учительхне – сембе сят, кинь странань Президентсь В.В. Путин аф весть лемнезень странань символкс, кинь лангса кирди минь государстваньке, кинь кядензон, содамошинзон вельде кемокстави Россиять вийц. Синь вельдест эряйхть ошне, работайхть предприятиятне, строявихть од завотт, кит, кутт, — азозе каземань иласта «Кочкак тонценнеть» партпроектть вятиец, Госдумаста региональнай политикань и местнай самоуправлениянь васенце зампредсь Сергей Морозов. Сон лятфтазе, што цельхнень ёткса, конатнень азозень государствань Главась, тя: цебярь и зиянфтома эряфсь, ломаттнень ванфтомасна, шумбрашить кемокстамац, семьятненди лездомась, эрь ломантть асушинц лангу лихтемац, од ломаттнень патриотическяй и ответственностень маряйкс воспитадондамасна.
Федеральнай этапонь «Человек труда» Национальнай премиянь «Од специалист» номинацияса лауреатокс арась Мордовияста инженерсь – конструкторсь Кирилл Крисанов. Сон аф аньцек профессияса лац няфнесы эсь прянц, но и ётафни региононь од ломаттнень мархта научнай, социально-экономическяй, спортивнай илат. «Кирилл тиенди энергосберегающай преобразовательхть машина кинь транспортонди. Сонь арьсефонза ванфтсазь электроэнергиять Россиянь и ламоц лия странань китнень эзга, — сёрмадсь эсь телеграмм-каналсонза Артём Здунов.
Мордовиянь Главась тяфта жа азозе, што партиянь од проектсь арась видекс народнайкс и азсь оцю сюкпря РФ-нь Государственнай Думаста фракциянь руководительти, Национальнай премиянь вятити Сергей Морозовонди.
Парламентарийсь каземань иласа азозе, што арьсекшневи «Человек труда» Национальнай премиять тиемс кувака пингонь программакс и мумс теенза васта «Единай Россиянь» народнай од программасонза. Тяниень пингть вятеви работа странань сембе предприятиятнень эса панжемс трудонь музейхть. Ушедовсь работась Россияса Геройхнень и трудонь ломаттнень колга единай интернет – порталть панжеманц лангса. Аноклави нинге фкя проект – «Фкя металста тиихть медаль боенкса, медаль трудонкса».