Федот Сычковонь лемса художественнай училищати—од оборудования

Ф.В.Сычковонь лемса Саранскяень художественнай училищати поступай од оборудования. «Культура» национальнай проектть «Культурная среда» региональнай проектонц рамкаса тонафнемань заведениять материально-техническяй базанц одкстоптоманкса нолдаф 3 миллионда лама цалковай.
Художественнай училищась строяф 1977 кизоня. Студенттне тонафнихть колма программатнень коряс: «Дизайн», «Живопись», «Декоративно-прикладное искусство». Тонафнемань заведенияса лама киза ашесть одкстопнев техническяй средстватне, сяс од оборудованиять кочкаманцты маладсть лац-ряц.
«Декоративно-прикладное искусство» программать рамкаса тонафнихне тяса аноклакшнихть национальнай костюпт. Занятияса теест эрявкснихть кроямань оцю шра и гладендамань профессиональнай система, а стане жа анок изделиятнень няфнемс манекетт.
Студенттнень работань выставкасна фалу ётнихть музыкальнай сопровождения мархта. Инголи оборудования и инструментт тянкса сявондевсть арендас, мезсь пяк питни тонафнемань заведенияти. Примафоль решения заказамс музыкальнай оборудования.
Од оборудованиять вельде училищань преподавательхненди ули кода тиемс сяда цебярькс и мялень салайкс образовательнай процессть.