Мазы школаса
тонафнемацевок сай

1 сентябрьста Саранскяйса капитальнайста петемада меле панжезень кенкшензон Идень республиканскяй музыкальнай школась-интернатсь. Петемань оцю тефне тяса вятевсть тяддень апрель ковста сявомок августть мекольце шинзонды молемс. Ученикне срадондсть кудга, тонафнесть онлайн-форматса. Педагогснон мархта сельмода-сельмос васетькшнесть аньцек выпускникне.

—Оцю ремонт тяса ашель комозьшка киза ни. Шуфтонь ташта вальмятнень эзда уфась, вельхкссь кой-коса кольгсь, ульця ширде зданиять лангста вастонь-вастонь пяярьфоль краскась,—азозе Валентина Прокофьевна Толкачёвась, кона лама киза ни покоди школа-интернатса, колмогемонь кизода ламос ульсь тяса директоркс.
Колма этажса зданиясь, кона строяфоль нинге 1960 кизоня, эрявсь петемс-тиемс. «Культура» национальнай и «Обеспечение качественно нового уровня развития инфраструктуры культуры» региональнай проекттнень мяльса кирдезь тянкса нолдафоль пцтай 56,7 миллион цалковай: 48,7 миллион цалковайсь—федеральнай бюджетста, 7,9 миллионць—республиканскяйста. Ня ярмакнень лангс одукс тиф кудбрясь, ульця ширде стенатне вачкафт утеплительса, и ланга вельхтяфт тяниень пингонь материалста тиф мазы панельса. Полафтфт сембе вальмятне, ацаф од плиткаса крыленцясь. Потма ширдевок полафтксне няевихть, кодак аньцек аськолдат порогть вельфке. Фойеса эвондасть турникетт, кияксса—од плитка и линолеум, полафтфт сембе кенкшне и нльне куцемань кирдематневок.
—Ремонтсь аделаф, ляткшни урядамс аньцяй аржанятнень. Кепотьксонди, нинге ашеськ повфта шторатнень и стенттнень-меснень. Тяса-тоса штамат вальмятне-кияксне,—поладозе одкстоптф школать-интернатть эзга экскурсиять Валентина Прокофьевна. Сон цебярь азорава лаца няфнезе, кодама мазыкс арась синь кудсна. И тя афкукс куд. Вдь кодгемонь шабась тяса аф аньцек тонафни музыкальнай инструментса морама, но и эряй. Сембе комнататнень эса ацаф од линолеум, петфтафт од обоят, путфт кроватть и шкафт. Мебельсь, В.П.Толкачёвать валонзон коряс, нинге кармай одкстопневома сяда товга.
Эряви азомс, идень республиканскяй музыкальнай школась-интернатсь «Культура» национальнай проектть эса примсесь ни участия. Тяда ингольдень кизотнень нацпроектть мяльса кирдезь максф ярмакнень лангс рамафтольхть музыкальнай од инструментт: пианино, кларнетт, саксофотт, флейтат, скрипкат, виолончельхть, баятт, аккордеотт, домрат, балалайкат и стак тов. Путфоль мультимедийнай од оборудования концертонь залса, одкстоптфтольхть тонафнемань книгатне и лия пособиятне. Тянкса сембоц нолдафоль 7 миллионда лама цалковай. Валентина Прокофьевна кельгозь няфтезе тя козяшиснонга. Педагогсь китькстазе, што мекольдень пингть, сядонга пяк стирнятнень ёткса, арась «моднайкс» саксофонць. Но улихть иднят, конат сашендыхть тяза велеста балалайкаса и домраса морамати тонафнема. Аф кржась кочксесазь баянть и аккордеонть. Музыкальнай школаса-интернатса лама тиендеви мокшэрзянь музыкальнай койхнень ванфтоманкса. Тяса ули «Лаймоне» фольклорнай ансамбль. Сят, кит сувсихть эзонза. морсихть мокшень и эрзянь морот. Тиендевихть марстонь проектт и концертнай программат «Торама» и «Келу» ансамбльхнень мархта.
—Минь шабаньке тевфтома мзярдовок аф ащекшнихть. Тонафнемада башка синь фалу примсихть участия эрь кодама концертса, фестивальса, пялькстомаса и най лисендихь сяськикс. Арьсян, од инструменттне лездыхть сядонга пяк касфтомс маштомошиснон,—мярьгсь Валентина Прокофьевна.
Велень и райцентрань стирняда-цёраняда башка школаса-интернатса тонафнихть и Саранскяйста шабат. Эздост 40 ломань. Синь сашендыхть тяза аньцек урокс, а эряйхть кудса. Сембоц тяниень пингть ученикта музыкальнай школаса 100, но шабатнень примамасна стаки мольфтеви. В.П.Толкачёвась эсь ширденза и марнек школать лемста тернесыне асу иднятнень ширезост музыкати тонафнема. Петемада меле школасна арась сядонга цебярькс. «Мазы школаса тонафнемацевок сай»,—азозе педагогсь.


И.ФАДЕЕВА.

Последние новости

В МОРДОВИИ ЭКСПЕРТНЫЙ СОВЕТ ПРИ АТК ОЦЕНИЛ КОНТЕНТ ДЛЯ МОЛОДЕЖИ

6 февраля в Доме Республики под председательством заместителя Руководителя...

Пенсионеркась ётафтсь аф пелькс счётс 5,5 миллиотт цалковай

Кода пачфни «Стопмошенник13» телеграм-каналсь, Россиянь УМВД-нь Саранск ошень округть...

«Варяг» крейсерть подвигоц

9 февральсь—Россиять военнай историясонза мяляфтови дата. Тя шиня 1904...

Мазыхть мокшень стиреньке

Кельгома морафтыеньке! 2025 кизоня «Мокшень правда» газетась сяда тов...

Рославльскяй Краснознамённай 326-це стрелковай дивизиясь пуроптфоль Саранскяйса

Тядде васьфтьсаськ оцюдонга оцю илать—Великай Сяськомать 80 кизонь топодеманц....

Эрявикс кизефксненди—башка мяль

Ётай недялять Саранскяйса, Республикань Кудса, ётафтовсь Мордовия Республикань сисемце...

В МОРДОВИИ ЭКСПЕРТНЫЙ СОВЕТ ПРИ АТК ОЦЕНИЛ КОНТЕНТ ДЛЯ МОЛОДЕЖИ

6 февраля в Доме Республики под председательством заместителя Руководителя Администрации Главы Республики Мордовия и Правительства Республики Мордовия – руководителя Пресс-службы Главы Республики Мордовия Елены...

Пенсионеркась ётафтсь аф пелькс счётс 5,5 миллиотт цалковай

Кода пачфни «Стопмошенник13» телеграм-каналсь, Россиянь УМВД-нь Саранск ошень округть эзга 4№ полициянь отделу пшкядсь ошень 65 кизоса авась, кона пачфтсь вете тёжяньда лама цалковаенц...