Мордовияса ётафневи эряфс «Эрек кяль. Поладома. Живой язык. Продолжение» проектсь

Мордовиянь культурань волонтёрхне марса И.Д.Воронинонь лемса республиканскяй краеведческяй музеень сотрудникнень мархта ушедсть ётафнемонза эряфс «Эрек кяль. Поладома. Живой язык. Продолжение» од проектть, конань ширенц кирдезе Президентскяй грантонь фондсь.
Проектсь водендаф национальнай кяльхнень и мокшэрзянь народть культуранц ванфтоманкса и виияфтоманкса, поколениятнень и од ломаттнень ёткса традиционнай питнишитнень кемокстаманкса.
Муниципальнай райононь музейхнень эса кармайхть ётафневома мокшень и эрзянь кяльса экскурсият. Аноклавихть интерактивнай занятият, тематическяй экскурсият, мастер-класст.
Проектсь ётафтови эряфс И.Д.Воронинонь лемса республиканскяй краеведческяй музеень филиалхнень эса: нят Ковылкинскяй краеведческяй музейсь, Инсарскяй историко-краеведческяй музейсь, Дубенскяй краеведческяй музейсь и Чамзинскяй историко-краеведческяй музейсь.
И.Д.Воронинонь лемса республиканскяй краеведческяй музейса ётафтовсть ни культурань волонтёрхнень мархта 4 васедемат, коса содафтозь синь «Живой язык. Продолжение» проектть концепциянц мархта, а стане жа азфтольхть функциятне и обязанносттне.
Проектть кураторонза ётафтсть иттненди музейть и «Мордовское подворье» музейно-этнографическяй комплексть эзга экскурсият.