Рузаевскяй районца петевихть китне

Рузаевскяй районца мольфтеви региональнай значениянь кафта китнень петемасна. Фкясь эздост поладсыне Пайгарма велеть и Зеленай посёлкать, а омбоцесь ётай Юрьевка велеста сявомок Аргамаковати молемс.
Кода пачфтезь Рузаевскяй районть администрациясонза, васенце объектса работатне вятевихть Параскево-Вознесенскяй авань монастырть ваксса. Самай тяса ушеды реконструкциять васенце участкац, пялькссь, конань эзга арни транспортсь, тиеви оду. Омбоце участкаса арьсекшневи полафтомс асфальтсь. Проектти нинге сувси 75 валдоптомань опоратнень и лотксема васттнень ладямасна.
Рузаевскяй райононь оцюнясь Александр Юткин шарфтсь мяль тя объектть эрявиксшинц лангс—вельденза ули кода району сашендомс туристтненди и сядовок виияфтомс паломническяй турхнень мархта сотф тевть.
Юрьевкаста сявомок Аргамаковати моли кись келептеви 7 метратненди молемс. Сонь марстонь кувалмоц—4 вайгяльбет, эзганза арнихть школьнай автобусне. Аргамакова велень и Плодопитомническяй посёлкань эряйхне аф весть пеняцякшнесть райононь администрацияв кальдяв кить лангс.