Сире Шайгавса шумордавсь центральнай площадть петемац

Сире Шайгав велеса цебярь шири полафтсь Ленинонь ульцянц эзга Центральнай площадсь. Общественнай вастсь одкстоптф «Жильё и городская среда» национальнай проектонь «Формирование комфортной городской среды» федеральнай проектть рамкаса.
Несколька ков велеряйхне ванцть строительхнень работаснон мельге. Петемась-мазоптомась шумордаф, и тяни тя и шабатненди, и оцюфненди ваймамань инь кельгови васта. Площадсь арась тяниень пингоннекс, сонь дизайн-проектоц меля сяськсь общественнай территориятнень петемаснон-мазоптомаснон коряс инь цебярь проектонь конкурсса.
Площадсь ацаф брусчаткаса, марнек полафтф освещениясь, ладяфт тяниень п ингонь валдопты приборхт. Велеряйхненди ули кода якамс-шяямс тяса поздна иляднявок. Стане жа путфт беседкат, эземнят, повфтафт нюряпт. Центральнай элементокс арась мешень сота лаца тиф арт-объектсь.
Тяда башка, керсефт сире шуфттне и вастозост озафтфт отт.
«Комплексное развитие сельских территорий» государственнай программать рамкаса тиф идень площадка, а ваймамань зонась мазоптф искусственнай газонцта офта лаца инсталляцияса.