Темникав аймакста семейнай бизнести лездсь нацпроектсь

МР-нь Экономикань, торговлянь и предпринимательствань министерствась марса «Мой бизнес» Центрать мархта кирнесыне Мордовиянь предпринимательхнень ширеснон. «Малое и среднее предпринимательство и поддержка индивидуальной предпринимательской инициативы» нацпроектть эряфс ётафтоманц мяльс сявозь аф весть макссевсь лезкс Темникавста семейнай бизнести.
Макаефнень семьяснонды удалась виияфтомс мокшэрзянь ичкоздень вастса туристическяй зонать и саламс мяльснон странань эрь-кодама регионцта путешествияс якайхнень.
2019 кизоня районца васенцеда арьсезь «Рыбак на Мокше» калонь кунцемань турнирть. Ся пингть Мордовиянь мазы уженяса ашель стама васта, коса улель кода васьфтемс пялькстомань участникнень и инжихнень. Тяса лездсь Макаефнень семьясна, конатнень собственностьса ульсь мода пакшсна.
Валомне Макаефнень бизнессна коль кассь. Синь строясть беседкат, баня, кафта этажса куднят. Панчсть купель, петезь прудть маласа территориять, а аф кунара рамасть шатёр. Грантовай ярмакнень пяльксснон нацпроектть вельде максозень государствась.
«Рыбак на Мокше» трунирсь вете кизоста арась районти визитнай карточкакс.