Заняфт эсь тевснон мархта

Саранскяйста самозанятайсь Екатерина Зюзина—кондитер, кона тиенди ламбама сувенирхт—мазопни имбирнай прянькат. Кельгома тевоц кунара ни арась ярмаконь канды тевкс «Малое и среднее предпринимательство и поддержка индивидуальной предпринимательской инициативы» национальнай проектть ширень кирдеманц вельде. Тя проектть азозе Президентсь, кураторкс теенза васенце вице-премьерсь Андрей Белоусов.
2023 кизоня Екатерина ётафтсь иттненди прянькатнень мазоптомаснон коряс 70-да лама мастер-класс, тяконь лувксса шабатненди и подросткатненди «Надежда» республиканскяй социальнай приютть воспитанниконзонды. Предпринимательсь ушедсь кемама эсь виензонды, мзярда ширенц кирдезь МР-нь Экономикань, торговлянь и предпринимательствань министерствась и «Мой бизнес» Центрась.
«Тячи нацпроектть вельде макссеви предпринимательхненди питнефтома пяк лама услуга: консультационнайхть, тонафтыхть. Господдержкать вельде кармань фалу примсема участия самозанятайхнень ярмаркаснон эса, конат ётафневихть Саранскяйса мишендемань центратнень эса. Тя аф аньцек лездсь касфтомс доходозень, но и мумс клиентт, а нинге ладямс ялгаксшинь соткст лацон тевть мархта заняфнень мархта,—мярьгсь Екатерина Зюзина.—Архнемать коряс мастер-класст ётафнян сидеста, содафнесайне иттнень кондитерскяй искусствать мархта. Инь цебярь казнесь тейне—павазть эзда шабатнень пиндолды сельмосна. Синь няйсазь, конашкава мялень салай и стака кондитерть профессияц. Надиян, сяда тов иттнень эвондай мяльсна сотомс эсь эряфснон тя ламбама тевть мархта».