Тядде актёрти, режиссёрти, писательти Василий Макарович Шукшинонди топодель 95 киза. Сон тусь эряфста 1974 кизонь октябрьста, мзярда теенза ульсь аньцек 45 киза. Эрясь аф ламос, а мзяра кенерсь тиемс!
Тяни минь содасаськ, што Шукшиттнень семьясна мзярда-бди тусь Самарань краи мокшень аймакста, а меле ни эряфонь судьбась пачфтезень Алтаи. Тястонь Сростки велеса и шачсь-кассь марнек Россияса содаф ломанць.
Сянь квалма, што рузыяф мокшень семьясь Сибири пачкодсь минь крайстонк, ламос кивок ашезь сотце. Но сонь творчестванц тонафниенза, архивонь работникне вешезь сонь генеалогическяй юронзон. А меле Василий Макаровичень стирец, актрисась Мария Васильевна Шукшина центральнай телевидениянь фкя каналса азозе, што сонь аляц национальностьс коре мокша. Вдь Самарскяй областень (тяни Оренбургскяй областсь) Толкаевка велеса, коста сонь атянза-алянза тусть Алтаи, эрясть мокшет. А Шукшиттне—Мордовияса фкя инь содаф фамилиясь.
2016 кизоня Саранскяи сашендсь и Мария Шукшинась. Тясовок азондсь алянц, атянц квалма. Ня строчкатнень тяштисна васетькшнесь и корхнесь мархтонза. Минь, кле, аньцек аф содасаськ, Мордовиянь кодама аймакста пачкодсть Самарань Толкаевка вели алянц раднянза.
В.М.Шукшин Россияса содаф ломань. Вов и тянивок юбилеенцты лемтьф газетань статьятнень эса шнасазь сонь асушинц инкса. Но кивок аф лятфни национальностенц колга.
Пяк пара, што аф юкснесазь сонь писатель ялганза. Фалу цебярь лувомс синь лятфнемань материалсна. Кельгомга азонды, кепотьксонди, Шукшиттнень семьяснон колга писательсь Глеб Горышин «Эсь паксянь кинятнень эзга» книгаса.
«Кие содазе Шукшинонь, ся мяляфтсы сонь серьёзнайшинц, крхкаста арьсиень ванфонц, кона сяда пяк няевсь мекольдень пингть. Василий Шукшин бта марязе теенза максф эряфонь пингть трванц. Сон фалу корхнесь эстеенза: «Эряви работамс!»
Шукшин эряскодсь, апрякась эсь прянц эса сянкса, мес кржа тись, кржа нинге содай.
«Мон лама нолдань эряфса и аньцек тяни тянь шарьхкодине. Налхконь киноса пцтай кеветие киза… Творчествазти шорсесь лац-ряц аф ладяф эряфсь и мон ёрянь пря: то тоза, то тяза, ётафтонь аф эрявиксти лама вийда и тяни синь ванфтомат. Тяштень колма-ниле книганя, «Печки-лавочки» и «Калина красная» кафта фильмат».
Сон лувондсы, што тись кржа. А тяка пингть кинонь ваныхне, книгань лувихне арьсесть, што сембось тя ломанти сатневи тёждяста. Видекс, искусстваса сонь путксоц оцю.
Арьседа тинць: аньцек аделаф «Печки-лавочки» фильмась, мельганза лиссь «Калина красная» картинась. Шукшин сонць и режиссёрсь, и главнай ролень налхкись. Сонць тяштезень сценарийхнень. Тяка пингть работай Стенька Разинонь колга фильмань сценарийть лангса. Тяштсь колганза роман. Лиссь Шукшинонь фкя инь цебярь «Характеры» книгац.
Авторсь седиень салазь нюрьхкяняста азонды Шукшинонь эряфонь кинц, сянь квалма, коста сон амолязе творческяй эрьганц. Велень эряйсь, сибиряксь, Черноморскяй флотонь матроссь, строительнай организациянь рабочайсь, илядень школань директорсь арась содаф артистокс.
Сяда тов писательсь Глеб Горышин лятфни кода васьфнесь Василий Шукшинонь мархта. Вдь сон фкя пингть эрясь и работась Сростки велеть эзда аф ичкозе.
«Живёт такой парень» фильмать съёмканзон пингста мон и васедень Василий Макаровичень мархта. Тя ульсь Горно-Алтайскяйса. Мон улень командировкаса. Илять лисень гостиницаста и сувань буфету чайда симома. Малазон нежедсь аф содаф ломань и эняльдсь, штоба мон налхколень аф оцю роль кинофильмань эпизодса. Согласиндань. Тяфта съёмочнай площадкаса и васедеме режиссёрть-постановщикть мархта.
Василий Шукшин щафоль-каряфоль стане жа, кода тястоконь алятне. Пильгсонза кямот, лангсонза ватнай фуфайка, прясонза кувака козырёк мархта кепка. Режиссёрть сембе лемнезь Васякс. Монга пшкятькшнень теенза тяфта жа. Афкуксонь народнай художниколь.
Шукшин тусь эздонк эста, мзярда кассь интерессь сонь творчестванцты аф аньцек литератураса, искусстваса, но и ломаттнень ёткса. Шукшин ашезе ужяльде эсь прянц, работась сиземань апак содак. Сон «палсь» сембонь инголе—лиякс тянь аф азсак. Сон аш мархтонк, и кивок мзярдовок сонь аф полафтсы. Но Шукшин, хуш нюрьхкяняль искусстваса сонь эряфоц, лездсь тейнек нинге весть варжакстомс эряфонь смузть, эсь лангозонк. Сон кадозень тейнек эсь книганзон…
Мзярда мон молень мекольдень кис прважамонза, карзиса морайхне морасть стане, бта тяфта авардсь Василий Шукшинонь потмонь ваймоц. Сонь явсезе эсь тядяц, Сибирень крестьянкась.
Тя эпизодть лия авторхне азонкшнесазь и тяфта, што явсезе сонь ламоцненди аф содаф кяльса. И кда сявомс мяльс сянь, кода «Печки-лавочки» киноса велеряйхне морасть рузкс, а мотивсна мокшень. Пади, и явсесь авась мокшень мотивса».
Авторсь улендсь Сростки велеса и Василий Шукшинонь куломда мелевок. Вов кода тянь колга азонды сонць.
«1976 кизонь сёксеть мон сань Сростки веле. Вов шиферса вельхтяф кудсь, но эсонза эрясь ни лия семья. Шукшинонь тядяц, Мария Сергеевна, ётась эряма Бийск ошу. Вов тоса и васьфтине сонь. Сувань квартиразонза. Эряфкшу авась прянц марязе аф шумбраста. Симдемань печения мархта чайда, цють апрякамань, мес меля ашень сашенда ширезонза. Сон кирдезе мялямсонза семботь, кие мезе корхнесь, тяшнесь цёранц колга. Кой-конатнень шназень, лиятнень сялдозень.
—Лев Аннинский кропцяй и кропцяй Васянь лангс. Мезень кальдяв Вася тись теенза? Бта и шнай, а сонць коль калгай: тянь Вася ашезь кенере тиемс, тонанц ашезе тие, ашезе адела. Сон вдь аф мувору, цёранязе, што ашезь кенере. Сон, мяляфтса, сай Сростки вели и фалу кудса озаф, тяшни. Алятне, конат сонь нинге одкс пингста содалезь, сувсихть, тернихть молемс мархтост винада симома, а сон аф, аф. Ярмак теест макссель. Сон и идькс пингстовок добраель цёранясь. Кельгозе работаманц. А сембода пяк книгань лувондоманц. Учительница миньцонк ульсь, Ленинградста эвакуировандафоль. Сон тонафнезе, кодама книгат лувондомс. Корхнель: цёраце способнай, ичкози пачкоди. Вов и тусь. И аш тяни Васеньказе, аф няйса оду цёранязень. Мезенкса сонь тяфта? Катк монць ни кулолень. Кинди мон, сиресь, эряван?
Мария Сергеевна авардсь, но аф ламос. Коль лятфнезе Васянь. Азондсь сянь квалма, кода ётась цёранц идькс, цёракс пингоц, ялганзон ёткса ульсть стамот, конат эрясть козяста.
Куломдонза меле ни Василий Макарович Шукшин «Калина красная» фильманц инкса казьфоль Ленинскяй премияса. Кода писатель, сон кадсь тейнек цебярь азкст, повестть, кафта роматт, кинонь сценарийхть.
Фёдор ГАВРИЛОВ.