10 майста Мордовия Республикань культурань Заслуженнай работникти, Россиянь Писателень союзонь членти, «Мокша» журналть ингольдень главнай редакторонцты, мокшаляти Виктор Лобановонди топодель 75 киза. Ужяленди, судьбась ашезь макса Виктор Михайловиченди васьфтемс тя юбилеенц. Газетаньконь пара ялганц эряфонь сюрекиц апак учсек сязевсь пцтай вете кизода инголе—2020 кизоня сентябрьста. Но эрь ломанць эряй снярс, мзярс колганза мяляфтыхть, лятфнесазь. Виктор Лобановонь, кона лама сёрмадсь и иттненди, пара валса лятфнесазь ламотне. И, васендакиге, сят, кит лувондсазь прозанц, стихонзон. Тяда башка, сон эряй сятнень мялямса, кинь мархта работась, васьфнесь, сонь мяляфтсазь мала и радня ломаненза.
12 майста Саранскяйса, А.С.Пушкинонь лемса национальнай библиотекаса, «Гордость нации» Культурно-образовательнай проектть мяльса кирдезь, ётафтовсь Виктор Лобановонь 75 кизонцты лемтьф «Валда вайме ломань» мялямонь илядь.
Аноклазе пуромксть А.С.Пушкинонь лемса национальнай библиотекась марса Мокшэрзянь народть Межрегиональнай общественнай организациянц Исполкомонц мархта.
Мялямонь илядть панжезе «Вий» группась (Владимир и Наталья Веряскиттне) Виктор Лобановонь стихонзон лангс тяштьф мороса.
Вятезе мероприятиять главнай библиотекарсь Вера Пронина.
Вера Ивановна азозе, што Виктор Михайлович кирдсь кеме соткст «Вий» группать мархта и сонь стихотворениянзон лангс тяштьфоль аф кржа мора.
Шачсь сай пингонь асу писательсь, поэтсь, публицистсь, журналистсь Виктор Лобанов Кадошкинскяй райононь Пою велеса лама идень семьяса. Средняй школать шумордамдонза меле поступась Н.П.Огарёвонь лемса Мордовскяй государственнай университету. Кафта курста меле поступась М.Горькаень лемса Московскяй литературнай институту.
Саранскяи мрдамдонза меле работась республиканскяй радиоса и телевиденияса, главнай редактороль «Мокша» журналса, лама киза директороль «Мокша» и «Якстерь тяштеня» журналхнень редакциясост. Сон тись лама телефильма и очерк, эряфоньберьф тяштсь.
1992 кизоня лиссь «Калонь кунциень азкс» прозань книгац, 2000 кизоня—«Шкаень толня» стихонь и прозань книгац, 2006 кизоня—«Эрян надиязь» книгац. Васенце стихонза печатлафтольхть «Мокша» журналса 1969 кизоня, 1989 кизоня синь сувасть «Лядомс ломанькс» коллективнай сборникти.
Эсост сидеста васьфневихть авторти мала васттне—Пою велеть маласа пандашаматне, лугатне, Исса ляйсь, ару ведь мархта лихтибрятне…
Виктор Лобанов башка мяль шарфнесь сатирическяй прозати. Перанц алда лиссть юморескат, фельетотт. Лама тись и кода публицист, кяльста-кяльс ётафты. Мокшень кяльс ётафтозе Валерий Ганичевонь «Адмирал Ушаков» романонц, Викентий Вересаевонь «Гоголь в жизни» книганц, «Мордва» историческяй очеркнень сводснон.
«Григорий Пинясовонь шкайгиц» книгац лиссь 2019 кизоня.
Мялямонь илядьса корхтась Мокшэрзянь народть Межрегиональнай общественнай организациянц председателец Юрий Мишанин.
Юрий Александрович мярьгсь, што Виктор Михайлович фалу ульсь панжада вайме ломанькс, конань мархта тёждяль васьфтемста, корхнемста, кодамовок тевонь тиемста. Сон маштоль эрь ломанти эрявикс валонь вешема и мума. Лама работась и тиендезе тянь виень аф ужяльдезь.
Мордовия Республикань Писателень союзть Председателенц заместителец Николай Голенков лац содазе Виктор Михайловичень. Николай Борисович и Виктор Михайлович марса аноклакшнесть книгат.
Николай Голенков корхтась и Виктор Лобановонь стихонзон колга. Синь образнайхть, сотфт эряфть тя или тона ширензон мархта, пачкодихть морафтыть ваймос и тёждяста примавихть.
Виктор Михайлович пяк кельгозе мокшень кяльть, корхтась и сёрмадсь мокшекс. Эряфонц лемдезе сянди, штоба арамс родной мокшэрзянь народонь писателькс. Гордость марясь, мзярда арась «Мокша» журналти главнай редакторкс. Меле—«Мокша» и «Якстерь тяштеня» журналхне» Мордовия Республикань ГБУ-нь директоркс.
Виктор Лобановонь колга лама лямбе вал азсть и мирттне-рьвятне Веряскиттне («Вий» группась). Наталья Веряскина мярьгсь, што сон ульсь асу, валда ломанькс, кона, ужяленди, рана тусь эряфста, но эряйхть произведениянза. И кармайхть эряма снярс, мзярс карматама морафнемост.
Виктор Михайловичень ламоль ялгадонза, сон маштсь кеняртькшнема синь сатфксснонды. Фкясь эздост—Мордовиянь Народнай поэтсь, Россиянь Заслуженнай журналистсь Камиль Тангалычев.
Камиль Тангалычевонь валонзон коряс, Виктор Михайлович ульсь мокшэрзянь литературать историянц крхкаста содаец. Содазень ламоц писательхнень.
Виктор Михайловичень стихонзон тя шиня морафтозь Н.П.Огарёвонь лемса Мордовскяй государственнай университетонь филологическяй факультетонь студенттне и Саранск ошень округонь 20№ гимназияса тонафнихне.
Мялямонь илядьса ульсть Виктор Лобановонь мала и радня ломаненза: стирец Наталья Викторовна, унокоц Ульяна, дуганоц Николай Михайлович, сазороц Валентина Михайловна.
Актовай залса аноклафоль «Поэт, прозаик, публицист» выставка.
Татьяна АЛЬШИНА.