Мокшень поэтсь, фронтовиксь Григорий Ельмеев—Ельмеефнень семьяснон гордостень маряма вастоц

Педагогть, декоративно-прикладной искусствань мастерть, асу мокшавать Лариса Мироновать лемоц содаф ламотненди. Лариса Ильинична шачемас коре Рузаевскяй райононь Сузгярьге мокшень велеста. Тяни работай Рузаевкаса «Тяштеня» иттнень эстетическяй воспитандамаснон (национальнай культурань) центраса. Тячи пачфттяма сонь мала раднянц—мокшень поэтть и фронтовикть Григорий Ельмеевонь квалма, кона сашендови Лариса Ильиничнанди щятякс. Григорий Ильич—Ельмеефнень семьяснон гордостень маряма вастоц. Мялямсь колганза фалу эряй сембе раднянзон седисост. Унокоц Лариса содасы сонь аньцек лятфнематнень коряс, но щятянц колга информациять кочксесы и ванфнесы эряфоньберьф.
Ёфси курок васьфтьсаськ Великай Отечественнай войнаса Сяськомать 80 кизонь топодеманц. Тяддесь Россияса азф Отечествань аралаень, Мордовияса—Историческяй мялямонь кизокс. Газетать тячиень номерсонза нинге весть лятфтасаськ мокшень поэтть Григорий Ельмеевонь, пачфттяма войнань участникть нюрьхкяня эряфонц, творчестванц колга.
Лариса Ильиничнань валонзон коряс, щятянц колга информациять кочказе лама кизода инголе раднянзон лятфнемаснон коряс.
Сай пингонь учительсь, поэтсь, фронтовиксь Григорий Ельмеев шачсь 1906 кизонь 26 ноябрьста Рузаевскяй райононь Сузгярьге мокшень велеса, крестьянонь ашу семьяса. Оцю мяльса тонафнесь школаса, но удалась шумордамс аньцек 8 класст. 1933 кизоня Саранскяйса панжевсть учителень курст. Тянь колга кулять Григорий Ельмеев васьфтезе кенярдезь. Курснень шумордамдост меле мрдась шачема велезонза, коса ушедсь работама начальнай школаса учителькс. Тяфта ульсь 1941 кизоть самс. Самай эста ушедсть лисендема васенце стихотворениянза. «Колхозонь эряф» журналса печатлафтольхть «Эряфсь полафтсь» и «Колхозник ялгати» стихонза. Сяда тов стихотворениянза лисендсть и «Мокшень правда» газетаса.
Башка васта Григорий Ельмеевонь творчестваса занци «Полю» поэмась, кона арась хрестоматийнайкс.
Тя произведениясь сембода оцюсь и няевикссь Григорий Ильичень творчестваса. Эсонза сембе ширде няфтьф мокшень стирть Полють судьбац и эряфонь подвигоц. Поэтсь няфтьсы Полють стака идькс пингонц, сонь алянц постуфонь эряфонц, тядянц рана куломанц.
Григорий Ельмеев маштсь аф аньцек стихонь сёрмадома, но и варчсезень виензон фантастическяй ёфксонь жанраса. Теенза удалась тяштемс «Ёжка», «Маза-таза» стихса ёфкст. Синь тянемс ашезь юмафта смузьснон.
Григорий Ильичень ульсть творческяй козя и оцю планонза, но синь, ужяленди, лядсть апак пяшкотть.
«1941 кизоня, мзярда ушедсь Великай Отечественнай войнась, щятязе, кода Родинань патриот, эсь мяльс коре тусь врагть тапама»,—азозе Лариса Миронова.
Ся пелькс войнань кизотнень колмогемоньда лама мокшэрзянь поэт и прозаик ульсть фронттнень эса. Кой-кит геройкс максозь эряфснон вельхкссонк ару менельть, сетьме эряфоньконь инкса. Ётксост ульсь и мокшень поэтсь Григорий Ельмеев. Сонь эряфоц сязевсь 1941 кизоня сентябрьста.
Лариса Ильиничнань щавац, Домна Ельмеева, покодсь машина киса путейцекс. Войнаса мирденц шавомдонза меле удавась ськамонза касфтсь ниле итть: Зинать (Лариса Ильиничнань тядянц), Раисать, Тамарать и Александронь. Синь содазь, мезе стамсь вачашись. Домна Григорьевна шабанзон мархта кочксесь тишет, панцесь эздост цюкорнят. Тяфта и трясть пря. Григорий Ильичень инь ёмла стирец, Зинаида, кода азонкшезе Домна Григорьевна, нльне таргозькшнесь вачашить сюнеда.
1940-це кизотнень песта семьясь вербовкас коре тушендсь Алма-Атинскяй областень Желоман ошу. Меле ульсь Сибирьса. Сяльде мрдась Сузгярьги.
Семьяса ванфтовсть лятфнемат сянь колга, што писательхне Илья Девин и Леонид Макулов кошардозь Домна Григорьевнанди молемс Саранскяи редакцияв, штоба тоса печатлалезь Григорий Ильичень произведениянзон. Стихотворениянь сборникть лисемдонза меле Лариса Ильиничнань щавац получась аф лама ярмаконя, мезсь пяк лездсь Григорий Ельмеевонь семьянцты.
Поэтть Григорий Ельмеевонь колга мялямсь эряй кода мала ломанензон, стане и творчестванц кельгиензон седисост. Мзяра сон тяштель, кда эряфонь сюрекинц афолезе сязе аеркс войнась! Тянь колга ламоксть корхневсь и Ельмеевскяй лувоматнень эса.
2026 кизонь ноябрьста топоди 120 киза мокшень поэтть, фронтовикть шачема шистонза.
Татьяна АЛЬШИНА.