Владимир Иванович Сетинонь содаса комозьшка киза ни. Тя афкукс тевонь кельги, пара вайме, сиземань аф содай мокшень аля. Лама вастса работась, ульсь хозяйствань вятикс Старошайговскяй, Лямбирскяй, Октябрьскяй райоттнень эса. Мекольце комсь кизотнень Владимир Иванович «Агросоюз-Левженский» ООО-са директор. Тя хозяйствась тяни республикаса фкясь инь виихнень и содафнень эзда. Левжань паксятнень лангса касфневихть козя урожайхть, эсь пингстонза пяшкотькшневихть платтне государствати лофцонь и сиволень мишендемаса. Вов и тянивок тялонь ня шитнень фермаста приёмнай пункту прважсеви пцтай кемонень тонна лофца суткати, мезсь сяда оцю ётай кизонь тяка пингть коряс.
—Велень тефне мзярдовок тёждят ашельхть, сембе пинкнень эрявсь покодемс шобдаваста шобдавас, штоба сатомс оцю сатфкст,—азонды В.И.Сетин.—Хуш ламось тяни тиендеви техникать вельде, сембе сяка ломанень кядьфтома ичкози аф туят. Минь коллективсонк покодихть тевонь содай, стакада-сталмода аф пели специалистт. Эрть колга мялезе азомс аньцек шнамань валхт, сюконямс теест цебярьста покодеманкса, арьсемс шумбраши и паваз.
И видекс, «Агросоюз-Левженский» ООО-са кочкаф стама коллектив, коса сембонь мяльсна и вийсна водендафт сянди, кода сяда оцю сатфксса и лац ётафтомс тялонь кофнень фермаса, эсь пингстонза андомс-симдемс тракснень, вазнятнень. И тянь минь шарьхкодеськ фермав сувамста. Шобдавань лофцонь потяма пингсь аделсевсь, но ломаттне ашесть эряскода кудга. Финцне урядасть жувататнень вастснон, лиятне явсть кормат, якасть вазнятнень мельге. Фермань бригадирсь Ольга Владимировна Глазкова аноклась каготт Ичалкаста лофцть инкса саф водительти. Кода фалу, прважсеви сембе продукциясь оцю качествань.
—Тянь эзда ащи ся, кода мархтонк кармайхть кирдема соткст лофцонь рамсихне, заготовительхне,—мярьгсь Ольга Владимировна.—И нинге, оцю качествань лофцсь тяфта жа сявондеви мяльс зарплатань пандомста. Тияк азса, эсь трудснон инкса ломаттне получайхть аф кальдяв зарплата и эсь пингстонза. Мялезе азомс спасибамань валхт дояркатнень Татьяна Александровна Беловать, Валентина Васильевна Сураевать, Любовь Михайловна Федотовать, Евгения Викторовна Пронинать лемс. Сембе синь тевснон содасазь лац, кошярямс аф сашендовихть, суткати эрь траксста потьнихть 23-24 литрань лофца. Маштозь тиендьсазь эсь тевснон скотникне Олег Ильич Дроздов, Александр Борисович Читайкин, Евгений Александрович Притчин и лиятне. Синь фермаса покодихть сменаса, якайхть сядот жуватань мельге.
Кода идь лаца тяса ваныхть и вазнятнень мельге. Тя участкаса покоди эсь тевонь содай авась Вера Петровна Кузнецова. Профессияс коре сон ветеринарнай врач. Вазнятне аф аньцек анневихть-симневихть, но и эсь пингстонза теест путневихть прививкат, эрявикс уколхт, макссевихть эрь кодама витаминнай добавкат. Сяс фермаса сембе синь ванфневихть.
—Оцю мяль хозяйствасонк шарфневи корматнень лангс,—сяда тов азонды Владимир Иванович Сетин.—Синь жувататненди пачфневихть миксерса, коса тяда инголе сембе шорсевихть, эзост кайсевихть комбикорма, микродобавкат, аф лама сал. Лиякс мярьгомс, жувататне получайхть сбалансированнай рацион. Траксненди кормат усксихть В.Н.Потапов и Н.А.Сурков, а ведражень стадать мельге кемокстаф Е.А.Курзенков. Сембе синь хозяйствать шнама ломаненза, эсь тевснон тиендьсазь курокста и лац. Кда конацка эздост урмаськодсь или лия кодамовок туфталонкса ашезь сав работама, эста ялганза покодихть кафтонкса.
Тя материалть анокламста мархтонк ульсь хозяйствань директорть заместителец В.В.Данилов. Курок топоди колма кизот, кода сон сась хозяйствав работама. Сембоса няеви—мялец нолдамс тяса кеме юрхт. Владислав лац содасы и кельгсы эсь тевонц, сонь колганза азондыхть аньцек шнамань валхт.
—Шачень мон Перхляй мокшень велеса,—мярьгсь корхни ялгазе.—Тонафнень и аделайне Н.П.Огаревонь лемса Мордовскяй госуниверситетонь механикань и энергетикань институтть. Мзярошка киза покодень стройкаса, вятень работат «Мордовия Арена» стадионца, а вов тяни покодян велень хозяйствань предприятияса. Мон аф каендан, мес ошть полафтыне велеть лангс, сембось тяса мялезон, ломаттне цебярьхть, фкя-фкянь лац шарьхкоттяма. В.И.Сетин сембоса лезды, максы эрявикс совет.
И видец, Владимир Иванович Сетин аф ужяльдьсыне седиста моли шнамань валонзон лац покодихнень лемс, а кда эвондакшни киньге кодамовок прябалац эстокиге лезды, решандасы. Стама ни сон ломанць, паронь арьси, шарьхкоди, аф эсь прянь няи, оцю букваста мокшаля! Шумбраши тейть, Владимир Иванович, лама кизонь эряф и штоба кисот васьфневольхть эсь лацот аньцек пара вайме ломатть.
Н.Лобанов.
Фототне авторть.