Эрь гектарста—52 Центнер сёра

Мордовиянь Оцюнясь Артём Здунов 24 августста ульсь «Октябрьская» агрофирмаса, коса ванозень кой-кона производственнай площадкатнень. Предприятиять мощностенза ащихть Лямбирскяй и Старошайговскяй райоттнень территорияса.
МР-нь Оцюнясь ванозе, кода мольфтеви озимоень видемась Лямбирскяй райононь паксятнень лангса. Тядде, кода азондсь агрофирмать генеральнай директороц Александр Андин, сёронь урожайсь кармай 120 тёжянь тонна, эрь гектарста сявови 52 центнер сёра. Сёроса кизоньберьфонь эсь вешфксонзон предприятиясь сатнесыне 70 процентс сонць.
Хозяйствать экономиканц главнай отрасляц—нармонень касфтомась. Тядде агрофирмась нолдай 90 тёжянь тонна саразонь сиволь.
Республикань Оцюнясь ванозе Лямбирскяй райононь Советское велеса бройлеронь касфтомать коряс од площадкать. Сонь производственнай мощностец—14 тёжянь тонна саразонь сиволь кизоти. Объектть строяманцты агрофирмась нолдась эсь ярмаконзон эзда 850 миллион цалковай. Тяса панчф 28 рабочай од васта 70 тёжянь цалковай ковти зарплата мархта.
Артём Здунов стане жа ванозе Лямбирскяй райононь Большая Елховка велеса агрофирмать главнай площадканц. Региононь руководительти няфтезь, кода мольфтеви тястонь аруяфты сооружениятнень строямасна. Синь тиевихть предприятиять и Большая Елховка велеть сточнай ведензон аруяфтоманкса. Проектть питнец стяй 128 миллион цалковай. Аруяфты сооружениятнень арьсекшневи нолдамс тевс кизоть пенцты.