Улихть ломатть, конатнень колга корхнихть—эрь тевса сафтсы. Красно-
слободскяй райононь Мокшень Полянка велеса самай тяфтамокс, сембоса кенерькшникс лувондови Елена Петровна Богдашкинась. Пцтай сембе эряфонц мокшавась лемдезе велень тевти, сон—райононь фкя инь цебярь дояркась. Покоди Елена Петровна «Краснослободское» велень хозяйствань предприятияса. Мельганза кемокстаф ведьгемонь тракс и эрьста кизоти дояркась потьни сисем тёжяньда лама килограмма лофца.
—Оцю сатфксонь сатнеманкса фермаса тифт сембе условиятне,—азонды Елена Богдашкинась.—Карттне отт, эсост валда, лямбе, жувататне эсь пингстонза анневихть-симневихть, урятцевихть вастсна. Работама и меки куду усксесамазь машинаса, недяляти макссихть кафта ваймамань шит. Аш мялезе вешендемс лия работа ширеса, тейне тясонга сембось мялезон.
И видекс тяфта. Елена Богдашкинась мзярдонга ашезь панце тёждя тев мельге, сон идькс пингстокиге кельгозе работаманц, лезнесь тядянцты и тракст потьнесь, и лия жувататнень мельге якась. Тянивок, фермань тевда башка, Елена Петровна мирденц, Петр Ивановичень, мархта кирдихть лама жуватада: тракст, буканят, учат, тувот.
—Эрямс велеса и аф кирдемс жуватат, тянь мон аф шарьхкодьса,—поладозе корхтаманц Елена Богдашкинась.—Кардоньке цебярьхть, кормат аноклакшнетяма сатомшка, переса касфнетяма кодама повсь перень сёрот. Сатни и мишендемс, и эстейнековок. Арьсекшнетяма касфтомс жувататнень лувксснон.
Богдашкиттнень кафта идьсна. Цёрасна Максим покоди Моску ошса полицияса, стирьсна Надежда работай ТЭЦ-2 предприятияса. Кизонь шитнень лама пинге атяснон и бабаснон мархта ётафнихть колма уноксна. Елена Петровна и Пётр Иванович тонафтсазь синь кельгомс модать, велень трудть, аф пелемс стакада-сталмода. Кие содасы, пади, унокнень эзда мувихть стамотка, конатненди кельгови Мокшень Полянка велесь и сайхть мяльс поладомс атяснон-бабаснон тевснон, касфнемс перень сёрот, кирдемс жуватат, тиендемс велень лия тефт.
Н.ЛОБАНОВ.