Фкя тевсь полафнесы омбоцеть

«Агросоюз-Левженский» ООО-нь сёронь касфнихне васенцекс районца шумордазь сёронь урядамать. Урожайсь удалась—эрь гектарсь макссь 50 центнер сёра. Пяшксет хозяйствань утопне зёрнаса, мишендеви и государствати. Инь оцю сатфкст тя тевса сатсть комбайнёрхне Александр Попасов и Владимир Прончатов. Эрсь эздост тялясь кемонь тёжяньда лама центнер сёра. Зёрнань усксемаса инь лац няфтезе прянц водительсь Е.И.Богачёв, кона эсь КаМАЗ-сонза шити тиендсь сисемонь-кафксонь рейс.
Сёроть урядаманц мархта паксятнень лангса тефне ашесть аделав, тяни хозяйстваса сяда тов мольфтеви кормань анокламась.
—Ня работатне миньцонк ашесть лоткафнев, инголи анокламе тише, тяни—сембе вийхне водендафт сенажень анокламати,—азонды «Агросоюз-Левженский» ООО-нь директорсь В.И.Сетин.—Лоткне фермать маласот, эрь шиня эзост усксеви и матросеви 200 тонна сянгяря масса. Штоба сяда танцти и пользань канды улель кормась, массати почерятама эрь кодама питательнай компонентт. Тяфта тиенттяма аф васенце кизось ни и результатсь кеняртьфти.
И тя видекс стане. Хозяйствась районца лофцонь потямаса инголи молихнень ёткса. Кота сятт траксста средняйста кизоти тяса эрьста потьнихть 8000 килограмма лофца. Тячиень шити пяшкотьфт ни вейхкса ковонь платтне сиволень и лофцонь мишендемаса. И васенце туфталсь оцю сатфксонь сатнемаса, тя—оцю качествань и сатомшка аноклаф корматне. Мекольдень пингть хозяйстваса аноклакшневи 50 центнеронь кормовой единица эрь пряти. Аф эрь фермаса уленди тяфта, штоба жувататне анневольхть сутканьберьф.
Кормань анокламасовок труженикнень ёткса улихть инголи молихть, шинь нормань вельф пяшкотькшнихть. Тяфтапнень эзда од механизаторсь Владислав Полянский. Хозяйстваса покоди ветешка киза и колганза азондыхть аньцек шнамань валхт.
Ня шитнень сон матроси кормат, тя тевти Владислав кярьмотькшни кота частста шобдава и покоди шобдати молемс.
—Монь пяк мялезон тя хозяйстваса покодемась, цебярьхть специалисттне, пара вайме ломаттнень эзда директороньке Владимир Иванович,—мярьгсь Владислав Полянский.—Тяса ули сембоса шарьхкодема, мезьса эряви лездыхть. Тяни вов аноклатама кормат, сёксенда и тялонда паксятнень лангс усксетяма назём, удобреният, тиенттяма лия тефт. Пандыхть лац, сембось ули и аш прясон стама мяльхть, штоба тумс шири, вешендемс сяда тёждя работат.
Тяфтапнень колга корхнихть, коса шачсь—тоса и кондястсь. Од механизаторсь эсь примерсонза няфнесы, што павазсь аф косонга оцю панда фтала, а ряцок, эсь шачема-касома ширеса, коса сембось содаф идькс пингстокиге, коса сембось мала седити.
Н.Лобанов.
Фототне авторть.