КАЗЬФТ ЛАЦ ПОКОДЕМАНКСА

Инсарскяй райононь оцюнять васенце заместителенц А.Б.Пронинонь мархта ушедоськ эсь корхтаманьконь велень хозяйстваса тефнень эзда. И тя аф стак. Аф кунара оцю ила ётась Саранск ошень культурань дворецса, коса республикань Оцюнясь А.А.Здунов лама шнама валда азсь велень хозяйстваса покодихнень лемс. А кодама оцю ила ётнесь казнефтома. Инсарскяй районцьке отмечафоль тя оцю иласа казнеса. Республикань агропромышленнай комплексонь виияфтомаса оцю путксонкса «Сармич» сыровареннай заводонь» ООО-нь генеральнай директорсь А.Н.Киреев казьф Славань III степенень орденца. Инсарскяй районць лиссь сяськикс республикаса лофцонь потямаса. Тяса эрь траксста потясть 9894 килань лофца. А вейхкса ковста—27387 тонна лофца. Тя цифрась кеподи мяль. Казьфт Дипломса «Мол Агро», «Пикаев» ООО-тне жуватань куяфтомань отрасляса оцю производственнай показателенкса.
—Казнеда тядде пяк ламоль,—корхтай А.Б.Пронин.—Финцнень максозь Саранскяйса оцю торжественнай иласа. Омбонцнень—районца. Кода отмечазе республикань Оцюнясь А.А.Здунов, тя праздниксь аф иланц инкса. И тя пяк лац няевсь ётафтф мероприятиятнень эзда.
Инсаронь велень хозяйствань труженикнень поздравляндазь Мордовия Республикань экономикань, торговлянь, предпринимательствань министрть заместителец П.М.Анашкин, велень хозяйствань и продовольствиянь министрть заместителец П.П.Гришанин, Инсарскяй муниципальнай райононь депутатонь Советть председателец, «Нива» ООО-нь директорсь А.В.Радаев, лиятне.
Ётасть оцю илат и велень хозяйствань предприятиятнень эса. Райононь илань участникнень поздравляндазь мороса, стихса, кштимаса культурань кудонь работникне. А велеса теест няфтсть концертт школань тонафнихне, учительхне, клубонь и библиотекань работникне.