Ковылкинскяй райононь сёронь касфнихне содафт оцю урожаень сатнемаса. Кепотьксонди, меля районца кочкафоль 140 тёжянь тонна сёра. Тядде тя цифрась ули ламода сяда оцю. Районца нинге сатомшка урядамань площадьта, а васенце сяда тёжянь тоннась кочкаф ни. Урожайть инкса «тюремась» мольфтеви райононь сембе оцю и ёмла хозяйстватнень эса. Но сембода лама сёрода урядаф «Мордовский бекон» ЗАО-са, кона сувси «Талина» компаниянь группати. Тястонь паксянь покодихне тевснон вятьсазь стане, штоба эрь частсь, эрь минутась афоль ётне стак. Паксятнень лангса работайхть кемотть комбайнат, пцтай сембе синь отт. «Мордовский бекон» ЗАО-ть паксянза таргавсть лама кемотть вайгяльбес.
—Райононь ламоц паксятненди максф од эряф. Тя модатнень лангса, коса ня шитнень кочксеви 50-60 центнер сёра, нинге аф кунара кассть келунят, паксятне юмсесть сор тишетнень потмос,—азонды Ковылкинскяй муниципальнай райононь оцюнясь Игорь Бутяйкин.—«Мордовский бекон» ЗАО-нь специалисттне семботь тиезь сянкса, штоба ня площаттнень эзда эрь кизоня кочксемс рекорднай урожайхть. И тя теест сафтови, сяс мес тяса покодихть эсь тевонь содай механизаторхт, сёронь касфнихть. Районца путф задача—прважамс государствав нинге аф 50 тёжянь тоннада кржа сёра. И тя цифрась тейнек сатовомшка.
Эряви азомс, сёронь урядамась целайнек лац мольфтеви республикань сембе райоттнень эса. Инь лама площадь урядаф Ромодановскяй, Старошайговскяй, Атяшевскяй, Чамзинскяй и лия аймакнень эса. Пяшкотькшневихть утопне, лядыкссь прважсеви государствав. Исяконь шити марнек республикаса кочкаф 950 тёжянь тонна од урожаень сёра.
—Сембоц государствав ули прважаф аф 1500000 тоннада кржа сёра,—мярьгсь Мордовия Республикань Велень хозяйствань и продовольствиянь министерствань главнай специалистсь И.П.Учайкин.—Тянкса водендафт сембе вийхне.
Н.Лобанов.