5 октябрьста сявомок 8 октябрти молемс Моску аймаконь Кубинка ошса «Патриот» конгрессно-выставочнай центраса ётафтовсь Россиянь агропромышленнай комплексонь инь оцю мероприятиятнень ёткста фкясь—«Зрнянь сёксе-2022» XXIV Всероссийскяй агропромышленнай выставкась. Сонь работасонза примась участия Мордовия Республикань делегацияське, конанди руководителькс ульсь региононь Оцюнясь Артём Здунов.
Выставкаса продукцияснон няфтезь республикань 17 предприятиясь. Мордовиять экспозициянц анокламста башка мяль шарфтфоль регионть производственнай, экспортнай и инвестиционнай возможностензонды.
Мордовиясь сувси фкя ломанти продукциянь основной виттнень нолдамаснон коряс странаса инголи моли субъекттнень лувксс. Алонь и лофцонь нолямаса минь занцесаськ странаса васенце вастть, сивольть коряс—нилецеть.
Республикась аф аньцек пяшкотькшнесыне сивольса, лофцса, алса, сахарса и перень сёроса эсь вешфксонзон, ноляви продукциять 80 процентоц мишендеви регионть эзда ширеса, тяконь лувксса пачфневи миронь 21 странав.
Россиянь Президентть поручениянц коряс, Мордовиясь, кода пилотнай региоттнень ёткста фкясь, активнайста виияфнесы органическяй продукциянь производствать. Тяниень пингть республикань 6 предприятиятне сертифицировандафт органическяй производстваса. Аньцек «Биосфера» предприятиясь ноляй органическяй продукциянь 50-да лама вид, тяконь лувксса аф фкя лацонь ямкст, зёрнань хлопьят, мешень кирдемань продукция.
Эряви азомс, Мордовиять «Зрнянь сёксе» агропромышленнай выставкаса няфтьф экспозицияц ламоц лия региоттнень коряс сяда козяль, тяса ульсь мезти дивандакшнемс. «Монь юрне Мордовия Республикаста, сидеста улендень «Зрнянь сёксе» выставкаса, сяс азса: Мордовиять конкурентонза аш!»—мярьгсь выставкань ваныхнень ёткста фкясь.
МР-нь Оцюнясь башка китькстазе, што тяфтама мероприятиятне пяк эрявикст деловой васедематнень мяльса кирдезь—тяса покодихть Россиянь Велень хозяйствань министерствась и Правительствась. «Тя кизоть минь шуморясаськ достойнайста, сёрода кочкаме рекорднай урожай—1 миллион 750 тёжянь тонна, урожайностсь—38 центнер гектарста, тя цебярь результатсь. Но агропромышленнай ширеса касомань-вииякшнемань кизефкста нинге лама—эрявихть техника, одкстоптома, оборудования. Ули мезти тонафнемс коллеганьконь эзда. Выставкась—опытса полафтоманкса цебярь площадка»,—мярьгсь Артём Здунов.
Мордовиянь АПК-нь и перерабатывающай промышленностень предприятиятне сатсть «Зрнянь сёксе-2022» агропромышленнай выставкаса 31 казне. Синь ётксост 25 зрнянь, 3 сиянь и 3 бронзань медальхть. Казнет сатсть Мордовиянь сырхне, колбасатне и сиволень деликатесне.