Сембе вийхне—козя урожаень кочкамати

Перхляй велень сёронь касфнихне аф васенце кизось ни кочксихть козя урожайхть. Синь сатфкссна кеняртьфтихть аф аньцек Рузаевскяй районца, но и марнек республикаса. Сявондемс эрь гектарста 50-60 центнеронь сёра, тяса арась ни правилакс. Вов и тяддевок сембе вийхне водендафт сянди, штоба сёронь урядамать аделамс колма недялянь потмоста, пяшкодемс утопнень, лядыкс урожайть прважамс государствав.
Крестьянско-фермерскяй хозяйствань оцюнять Н.В.Сардаевонь мархта улеме сёронь паксяса, коса ингольдень кизотнень кочксесть 20-25 центнеронь сёра эрь гектарста. Тядде ня участкатнень эса арьсихть тялямс 50 центнер. Мезьса туфталсь, кода тя сатовсь?
—Туфталсь фкя—тя модати путоме оцюдонга-оцю труд,—азонды Николай Сардаев.—Инголи тя паксясь юмсесь сор тишетнень потмос, кой-кона вастова кассть келунят, модась юкстафоль, катфоль. Вов и саме мяльс максомс ня васттненди од эряф. Усксеме тяза сатомшка назём, ётафтоме лия агротехническяй работат. И тевсь, кода корхнихть, токавсь вастстонза. Виденц азомс, седиезон арси лад, ваномок паксяса касфтф урожайть лангс.
—Сембе вастова ломаттне покодихть оцю ответственностень марязь, васенце вастти путневи качествась,—сяда тов азонды Н.В.Сардаев.—Марнек хозяйствасонк пцтай ниле тёжятть гектар соксеви мода и эрь пакшкясь сявф учётс. Содасаськ коста и мзярда ушедомс сёронь урядамать, мзяра техника прважамс тя участкати. Модадонк лама и сембе синь таргавсть лама кемотть вайгяльбес. Тячиень шити сёронь паксятне урядафт ведьгемонь процентс. Эрь гектарста средняйста кочкаф сизьгемоньда лама центнер сёра. Тя минь кеняртьфнесамазь, надиятама кизонь планть пяшкодемс вельф.
Шинек-венек ладяф работась и тинголангса. Тя участкаса покодихть кемонь ломатть и эрть колга директорсь азонды аньцек шнамань валхт. Финцне ваныхть зерносушилкать мельге, омбонцне зёрнать усксесазь утомга, а лядыксне аноклайхть од урожаенди видьмот.
—Сембонди азан оцю спасиба работаснон инкса, эрти арьсян шумбраши, лама вий и эрьгя, паваз и лама кизонь эряф,—мярьгсь Н.В.Сардаев.
Н.Лобанов.