Ашель стама киза, штоба «Сардаев Н.В.» крестьянско-фермерскяй хозяйстваса сёксенда аф пяшкотькшневольхть утопне сёроса. Тяда башка, лама сядот тонна тозер, шуж, рапс мишендеви государствати. Козя урожаень кочксемаса туфталсь фкя—хозяйстваса оцю мяль шарфневи модати, кона лац-ряц соксеви-витцеви, аруяфневи сор тишетнень эзда, эсь пингстонза урятцеви урожайсь. Вов и тяддевок, кодак аньцек модась «кенерсь» видемати, паксятнень лангс пачфтьфтольхть инзаматне, сеялкатне, механизаторхне кярьмодсть тевс. Финцне—инзайхть, омбонцне—видихть.
—Тячиень шити ня работатне ётафтфт ни 2300 гектар лангса,—азонды хозяйствань главнай инженерсь Ю.В.Сардаев.—Паксяса ломаттне покодихть шобдаста шобдас. Сембе кафкса тракторхне инголькиге лац аноклафтольхть, сяс прябалат мархтост аш. Аньцек пялешка част тушенды обедс и тяда меле меки кярьмотькшневи сокамань-видемань тефненди. Шити витцеви вете сядоть малава гектар пакся.
Главнай инженерть валонзон коряс, инь оцю сатфкст ня шитнень сатнихть механизаторхне Иван Петрович Чигирёв, Михаил Герасимович Аршинов, од трактористсь Аркадий Алексин и лиятне. Сембе синь покодихть тяниень пингонь тракторса, шити пяшкотькшнихть кафтонь норма.
—Мон аф каендан, мес эряфозень сотыне тя велеть, хозяйствать мархта,—мярьгсь механизаторсь Аркадий Алексин.—Тяса сембе тефне ладяфт лац-ряц, и главнайсь, ломаттнень колга арьсезь. Кда эвондакшни кодамовок кизефкс, тязк сон пяшкотькшневи, решандакшневи. Браттне, Николай и Юрий Сардаефне, ся руководительхнень эзда, конат васендакиге арьсихть хозяйствань покодихнень колга. Тундань тефнень пингста, сёксенда сёронь урядамста синь мархтонк ряцок лездыхть, кепсесазь мяленьконь лямбе валса.
Маштозь вятьсыне эсь тевонзон и хозяйствань главнай агрономсь Владимир Александрович Артёмов. Сон кунара ни пенсияса, но тевфтома аф ащекшни. Сонь команданц вельде паксятнень лангса ушеткшни трудямань шись, сон и максси сигнал работатнень аделамаснонды. Тяка пингть, Владимир Александрович ваны сёроть видемста качествать и минеральнай удобрениятнень сувафтомаснон мельге.
—Видемань паксятне келемсть, таргавихть лама кемотть вайгяльбес,—азонды паксянь технологсь Владимир Артёмов.—Минь ломаненьке покодихть, инзайхть-видихть Перхляень, Шишкеевань, Пишлянь, Полянкань и лия велень паксятнень лангса. Аф сембе вастова модась нинге коське, сяс тейнек сашендови кой-кона агрегаттнень фкя паксяста ётафнемс омбоцетненди, коса модась анок видемати. Старандатама вете-кота шиста марнек паксянь тефнень аделамс. Тянкса водендафт сембе виеньке, тевс нолявихть сембе резерватне.
Оцю урожайти кись ушеткшни, васендакиге, тундань-паксянь тефнень лац ётафтомаснон эзда. «Сардаев Н.В.» крестьянско-фермерскяй хозяйстваса тя правилать аф юкснесазь, тяса эрь частсь, эрь минутась сявондеви мяльс, видемась ётни графикс коре, эсь пингстонза.
Н.ЛОБАНОВ.