Республикань паксятнень лангса ушедсть тундань тефне. Кой-кона хозяйстватне инзайхть, культивировандайхть, лиятне—кярьмодсть ни видемати. Пингсь эряскофты, вдь тундань шитнень эрь минутась питни. Сявомок мяльс «Тундань шись киза анды» содаф валмуворксть, Старошайговскяй райононь механизаторхне частста частс касфнесазь паксянь тефнень темпснон. Кода и ингольдень кизотнень васенцекс лихтезь паксяв техникаснон «Конопатское» ООО-нь, «Агрофирма «Новотроицкая» ООО-нь, «Богдановское» ООО-нь и лия хозяйствань сёронь касфнихне. Ня велень хозяйствань предприятиятнень эса тундань видемать арьсихть ётафтомс кафта недялянь потмоса.
—Марнек тядде ранняй яровой культуратнень мархта ули заняф 16100 гектар пакся,—азонды Старошайговскяй райононь велень хозяйствань управлениять начальникоц А.В.Ермаков.
—Модась анок, штоба вятемс паксянь тефнень пингонь апак юмафнек. Видемада инголе улеме сембе хозяйстватнень эса. Хозяйствань оцюнятне и специалисттне азондсть сянь колга, кода синь анокласть тя ответственнай кампанияти. Виденц азомс, минь афи учсеме тяфтама результатт, сембе вастова тундань тефненди маладсть аноклафста, эрявикс агрегаттне эсь пингстонза усксефтольхть паксятнень малас. Оцю мяль шарфневи качествать лангс. Видьмотнень мархта фкя пингть модати сувафневихть и минеральнай удобреният. Эздост аноклаф сатомшка, сяс видемась мольфтеви агротехническяй сембе вешфкснень коряс.
«Агрофирма «Новотроицкая» ООО-ть паксянза таргавсть лама кемотть вайгяльбес. И сембе участкатнень лангса мольфтеви «тюрема» сай урожайть инкса. Эрь шиня тястонь механизаторхне витцихть сядонь гектар пакся. Новотроицк велень паксять лангса минь васьфтеськ механизаторть Александр Фролович Вадяевонь. Сон тя хозяйстваса покоди 16 киза.
—Тя аймаксь кунара арась тейне кельговикс, тяса сембось мала, родной,—азозе Александр Вадяев.—Эрь тунданя, мзярда ушеткшнихть паксянь тефне, мон васенцекс лихнеса тракторозень, ушеткшнян инзама, культивировандама. Работан тяниень пингонь техникаса.
Вов тяфта тевти малаткшнемась лезды «Агрофирма «Новотроицкая» ООО-нь паксянь покодихненди кизоста-кизос кочксемс козя урожай. Ётай кизоть, кепотьксонди, тяса эрь гектраста кочкафоль 35 центнеронь сёра, а кой-кона участкатне макссть ведьгемонень центнер.
—Содаф, инь лама сёра тяльсеви озимойса заняф площаттнень эзда, но кда тундань паксянь тефне, видемась ётафтовихть срокс коре и цебярь качества мархта, эста и яровой культуратневок максыхть козя урожай,—мярьгсь хозяйствань директорсь В.А.Спирин.—Вов мес механизатороньке паксяса покодихть шинек-венек, штоба сяда курок аделамс видемать.
Мекольдень кизотнень кеме юрхт районца ноляй «Магма» велень хозяйствань предприятиясь. Эряви азомс, тястонь сёронь касфнихне эсь тевснон вятьсазь мекольдень вешфкснень коряс, нолямок тевс сембе передовойть, мезсь максси оцю прибыль. Кепотьксонди, Сире Теризморгань паксятнень лангса синь получсихть аф аньцек сёронь козя урожай, но и мяльсна касфтомс и тялямс тёжятть тонна рапс.
—Вов тя вете сятт гектарсь ули видеф самай тяфтама культураса,—азонды «Магма» ООО-нь агрономсь С.В.Азрапкин.—Аделасаськ тя участкаса инзамать и пингонь апак юмафнек кярьмоттяма видемати. Паксяса механизаторхне работайхть шинек-венек, теест макссеви ваймамс колма частт. Сембе техникась тяниень пингонь, мезсь максси возможностть шити тиендемс кафтонь норма.
Инь цебярь механизаторкс тя хозяйстваса лувондови мокшалясь Павел Сергеевич Радаев. Шачемас коре сон Кадошкинскяй райононь Адаж велеста. Тяфтама ломаттнень колга корхнихть: сембоса кенерькшни, сембоса сафтсы. Павел Сергеевич «Магмаса» покоди кафта кизот, но аф ваномок тя нюрьхкяня пингть лангс, сон най инголи молихнень ёткса. Вов и тяддевок мельганза кемокстафт рапсса видеви площаттне.
—«Магма» ООО-са покодемась тейне—тя седиень петема,—мярьгсь Павел Сергеевич.—Тяса сембось контроль ала, лиси кодамовок кизефкс техникать мархта, тязк техническяй лезксонь максома машинась, коса улихть сварщик, слесарь, моторист. Частоньботмоса синнефсь петневи. Эсь пингстонза усксеви ярхцамбяльсь, ладяфт и медицинскяй лезксонь максомаса кизефксне. Фкявок тракторист аф лиси паксяв, кда путёвкати аф путсы кяденц медицинскяй сестрась. И тяфта эрь шиня.
Мзярс материалсь аноклавсь печатьс, велень хозяйствань управленияста тейнек пачфтезь, што Старошайговскяй районца инзаф ни колма тёжятть гектар мода, пцтай сембе хозяйстватнень эса ушедсть ранняй яровой культурань видема. Васенцекс тя тевти кярьмодсть «Пивкин М.А.» крестьянскяй фермерскяй хозяйстваса, «Конопатское» ООО-са и лия хозяйстваса.
Николай Лобанов.
Фототне авторть.