Сире Шайгавонь районць инь цебярьхнень ёткса республикаса

Сире Шайгавонь районць сувси инь цебярьхнень ёткс республикаса сёронь касфтомаса, сиволень и лофцонь мимаса. Аф кунара Мордовия Республикаса отмечазь велень хозяйствань работниконь и переработкань тиенди предприятиянь шить. Велень хозяйствань покодихне, предприятиятне казьфтольхть оцю государственнай казнеса. Сире Шайгавонь районць омбоце зонаса лиссь сяськикс растениеводствань отрасляса. Кочкасть 156 тёжяньда лама тонна сёра. Эрь гектарсь макссь 43,2 центнеронь. Республикань Оцюнясь эсь Указсонза Славань III степенень орденца лац покодеманкса казезе «Агрофирма «Новотроицкая» ООО-нь трактористть Виктор Владимирович Кулагинонь. Од специалисттнень ёткса Российскяй пялькстомаса лиссь тяка жа хозяйствань зоотехниксь—селекционерсь М.И.Рязанова. А сонць хозяйствась сувась АПК-нь сферань оцю социальнай ответственностень хозяйстватнень ёткс. Сяськикс лиссь «Сельхозпредприятие «Богдановское» ООО-сь.
Ня шитнень Сире Шайгавонь культурань центраса ётафтовсь велень хозяйствань оцю ила. Райононь оцюнясь Г.А.Мухин гордостень марязь лятфтазень велень хозяйствань труженикнень сатфксснон. Синь афкукс кеподихть мяль. Вете кизоста районца тялясть пцтай 520 тонна сёра. Тянкса аф кржа вий макссть «Октябрьская» агрофирмань Од Акшинань отделениясь, «Новотроицкая агрофирмась», «Богдановское», «Конопатское» ООО-тне, «Старошайговагропромснаб» АО-сь, Александр Пивкинонь—Сире Теризморгаста, Алексей Пантюшкинонь—Мельцанцта, Александр Пивкинонь — Сире Шайгавста и лиятнень крестьянско-фермерскяй хозяйствасна.
Аф кальдявста ладяфт тефне жуватань куяфтомань отрасляса. Велень хозяйствань предприятиятне, крестьянско-фермерскяй хозяйстватне кизоньберьф получайхть 35-36 тёжянень тонна лофца. Вете кизоста кочкавсь 176,5 тёжянь тонна лофца.
Г.А.Мухинонь корхтаманц поладозь Мордовия Республикань Госсобраниянь депутатсь, «Конопатское» ООО-нь директорсь Виктор Рубцов, «Новотроицкая» агрохолдингть генеральнай директороц Владимир Руженков, Краснослободскяй и Темниковскяй епархиянь епископсь Климент, лиятне.
А мзяроль велень хозяйстваса покодихненди казнедоль. Кода ни лятфтайне, финцнень максозень республикань Оцюнясь А.А.Здунов торжественнай иласа. Ламотне получазь эсь казнеснон Сире Шайгавонь культурань центраса.
Мордовия Республикань Почётнай грамотаса казьфтольхть В.В.Шумкин, Н.А.Качанова. Благодарность лац покодеманкса азсь республикань Оцюнясь Е.Н.Володькинонди. Сяськиень дипломса комбайнёрхнень ёткста казьф В.В.Кулагин «Новотроицкая агрофирмань» механизаторсь. «Сире Шайгавонь муниципальнай райононь Почётнай гражданинкс» арась Российскяй Федерациянь велень хозяйствань Заслуженнай работниксь, Мордовия Республикань Славань орденонь полнай кавалерсь, «Старошайговагропромснаб» акционернай обществать директороц А.И.Фролов.
Цебярьста велень хозяйствань тефнень вятеманкса васенце вастсь максфоль «Новотроицкая» агрофирмати, омбоце и колмоце васттне «Богдановское» и «Конопатское» ограниченнай ответственность мархта обществатненди. Синь казьфтольхть Сире Шайгавонь райононь оцюнять дипломса. Отмечафоль и агрофирма «Октябрьская» Од Акшинань отделениянь коллективть трудоц.
Ашезь юкста ся хозяйстватнень, предприятиятнень, конат макссесть и макссихть оцю лезкс СВО-ти. Нят индивидуальнай предпринимательсь О.Н.Пьяных, «Колобок», «Новотроицкий хлеб», «Время», «Новотроицкие колбасы», «Старошайговские колбасы» ООО-тне,
А.Ф. Пивкинонь, А.А. Пантюшинонь, А.Ф. Кибаковонь крестьянско-фермерскяй хозяйствасна.
Аш кода аф лятфтамс и райононь комбайнёрхне, конатнень лемсна лац содафт аф аньцек районца, но и сембе республикаса. А.В.Ларин «Октябрьская» агрофирмань Од Акшинань отделенияса тялясь 3602 тонна сёра, занямок районца васенце вастть. Тяка жа агрофирмань отделениянь комбайнерть Н.В.Шапошниковонь результатоц 3249 тонна. В.В.Кулагин Новотроицкяйста «Ягуар» комбайнаса аноклась тя кизоть 38750 тонна сянгяря масса сенаженди и силосонди. А инь цебярь дояркакс районца лувфоль Л.В.Саменкова, кона потясь эрь фуражнай траксста 8748 килограммань лофца. Людмила Викторовна стане жа «Новотроицкая» агрофирмаста.
Казнеда сняроль, што сембе афи лятфтавихть. Тя корхтай сянь колга, што районца эряйхть трудонь кельги, марстонь тевонкса пичеди ломатть. Эрь казнеть фталу кяшф лама ломанень труд.
Илья ВЕШКИН.