Сёронь касфнихненди кизось удалась

Республикань паксятнень лангса аделсеви сёронь урядамась. Тяддесь няфтезе, ся райоттнень эса, коса сёронь касфнемаса кизефксне и тефне тиендевихть эсь пингстонза, оцю ответственностень марязь, тоса результаттневок кеняртьфтихть.
Кепотьксонди, Инсарскяй районца тядде эрь гектарста средняйста кочкасть 50 центнер сёра. Тяфта нинге мзярдовок ашель. Нинге сяда лама тялясть «Нива» ООО-нь сёронь касфнихне, тя хозяйстваса эрь гектарсь макссь пцтай кодгемонь центнер сёра. Эряви азомс, тяфтама сатфксне сатневихть аньцек модать лангс оцю мялень шарфнезь и эсь пингстонза агротехническяй сембе тефнень вятезь.
—Марнек кочкаме сисем тёжяньда лама тонна сёра,—азонды «Нива» ООО-ть директороц А.В.Радаев.—Тячиень шити сембе утопне пяшксет сёрода, лама тонна зёрна прважаф государствати. Мярьгомс, што тёждяста ётась тяддень сезонць, ули аф виде. Сёронь урядама пингть лисендсть стройста кафта комбайнаньке, но синь курокста петьфтольхть и работась кармась мольфтевома сяда оцю темпса. Тячи мялезе азомс спасибамань валхт комбайнёрхнень А.М.Кривошеевонь, С.В.Адышкинонь, В.П.Лисенковонь, С.С.Цыгановонь и С.Г.Янгайкинонь лемс. Синь, мярьголень, эсь лацонь геройхть. Сембе виень путозь и пингонь аф ужяльдезь сёроть урядазь зёрнаняньбес.
Оцю сатфкст сёронь урядама пингть кизоста кизос сатнихть Ковылкинскяй райононь сёронь касфнихне. Тяса кунара ни эсь лацонь койкс арась сёронь касфнемаса валовай цифрать пачфнемс 120 тёжянь тоннати.
—Тядде ули урядаф сяда лама,—мярьгсь Ковылкинскяй муниципальнай райононь оцюнясь И.Н.Бутяйкин.—Минь улеме васенцетнень ёткса республикаса, кит ётазь 100 тёжянь тоннань цифрать. И тя ульсь ни кафта недяляда инголе. Сёронь мархне стаки пяшкотькшнесазь райононь хозяйстватнень тинголангснон. А тя корхтай сянь колга, што арьсеф планць, марнек сезонцта тялямс 140 тёжянь тонна сёра, ули пяшкотьф.
Сембода лама сёрода урядасть «Мордовский бекон» ООО-нь паксянь работникне. Тя хозяйствась сувси «Талина» агрокомпанияти, конанди генеральнай директоркс В.С.Бирюков. Тя компанияса сембе тефне мольфтевихть тячиень вешфкснень коряс, ули сатомшка техника, покодихть оцю квалификациянь специалистт. Седикс-ваймокс, виень аф ужяльдезь покодеманкса, кода корхнихть, пандомаське трудс коре. Инь цебярь комбайнёрхне тяса сезонти получсихть 200-250 тёжянень цалковай. Тяса ули мезенкса ливоськоткшнемс.
Старошайговскяй районца васенцекс сёронь урядамать аделазь «Богдановское» ООО-нь механизаторхне. Тёжянь пяле мархта зерновой площаттнень лангста хозяйстваса кочкаф 5600 тонна сёра. Тя цифрась сатовсь васенцеда, планда вельф тяляф тёжянь тонна сёра.
—Хозяйствасонк кафта тёжяньда лама пря крупнай жувата, конатненди фураженди эрявксни сядот тонна сёра, штоба получамс сяда лама лофца и кеподемс привеснень,—азонды директорсь С.С.Якомаскин.—Вельф урядаф сёроть мишендьсаськ, явонттама хозяйстваса покодихненди. Тяни аноклатама кормат, вяттяма петемань работат ферматнень, жуватань карттнень эса, анокласаськ сёксень, тялонь пинкненди,—мярьгсь Степан Степанович.
Н.Лобанов.