Рузаевскяй райононь Перхляй велень сёронь касфнихне васенцекс районца аделазь ранняй и поздняй культуратнень видемаснон. Паксятне аф ёмлат, эздост видеф колма тёжятть гектарсь. Видьмотнень мархта модати почеряф сатомшка минеральнай удобрения, мезсь лезды оцю урожаень касфтомаса. Задачась путф аф тёждя, сявомс эрь гектарста 50-60 центнер сёра.
—Тя тейнек вийс коре, тяфтама урожайхть минь касфнетяма аф васенце кизось ни,—азонды «Сардаев Н.В.» КФХ-нь главнай агрономсь В.А.Артёмов.—Вов и тяддевок тундань паксянь тефнень минь ётафтоськ эсь пингстонза и цебярь качества мархта. Работась мольфтевсь кафта сменаса, финц механизаторхне полафнезь омбонцнень. И эрсь эздост покодсь сиземань аф содазь, эрь минутань тевс нолязь.
Инь оцю сатфкст сёронь видемста сатсь трактористсь Владимир Александрович Жарков. Сон тя хозяйстваса покоди васенце кизось и тя нюрьхкяня пингстовок няфтезе прянц лац, шинь норманзон пяшкотькшнезень 140 процентс.
—Инголи мон покодень шабрань велеса, тяни соксян-витцян Перхляй велень модат,—мярьгсь Владимир Александрович.—Тястонь коллективсь пяк мялезон, тяса сембось водендаф сянди, штоба сёксень шитнень кочкамс козя урожай. Сембе техникась од, тяниень пингонне. Работась ладяф лац. Ашельхть стак ащекшнемат видьмотнень паксяв пачфнемста и лия кодамовок туфталонкса. А штоба аф юмафнемс пингть, паксяв пачфневсть и обеттне, лац арьсефтольхть и лия кизефксне.
Видемань пингть лаказь-лакась работась и тинголангса, склаттнень эса. Велень хозяйствань труженикне марасть сёра, ванцть видьмотнень качестваснон мельге. Покодихнень эзда ламонцне пенсионерхт, но синь фалу анокт лездомс эсь велень хозяйстваснонды, кода тундань тефнень тиемста, стане и урожаень урядамста. Кепотьксонди, Нина Васильевна Федотовась комозьда лама киза покодсь фермаса телятницакс, тяни лезни тинголангса.
—Кудса тевфтома ащекшнемась аф тушенды мялезон, мон кельгса ломаттнень ёткса улемазень. А тяса, ванат, кодама аф кодама польза кандан велень хозяйстваньконди,—аф прянь шнафтозь, пеедезь мярьгсь мокшавась.—Мзярс ули виезе, карман сашендома тинголангу, эсь тевозень мон тиендьса мяль вельде.
Сёронь видемась «Сардаев Н.В.» КФХ-са аделавсь. Ломаттне кярьмодсть лия тевс, сяс мяленьке арьсемс сембонди теест сяда товга трудса сатнемс оцю сатфкст, шиста-шис кеподемс эсь велень хозяйствать экономиканц. Н.Амаев.