ТЕФТ ВЕЛЕСА МУВИХТЬ СЕМБОНДИ

Н.И.Кабанов марнек эсь эряфонц лемдезе Атюрьевскяй райононь Крхтаж велень «Рассвет» колхозти. Васенда трудендакшнесь главнай специалистокс. А пингонь ётазь занязе председателень вастть. Полафтсь пингсь. Николай Ивановичка тяни председатель аф «Рассвет» колхозса, а «Курташкинское» ограниченнай ответственность мархта обществаса. Но тефне лядсть сякот, кода фермаса, стане и паксяса. Синь хозяйстваса аф машнихть кизонек-тялонек. Николай Иванович оцю букваста Руководителель, машты тевонь вятема. Аф стак Крхтажень хозяйствась фкя инь цебярсь аф аньцек районца, но и республикаса. Кда корхтамс жуватань отраслять колга, тяни жувататне сяда сидеста луга лангсот, карттне аноклавихть тялонди. Кода азозе фермань азоравась, трудонь ветеранць Н.Я.Савостькина, жуватань отрасляса ломаттне сембе трудонь кельгихть, марстонь тевонкса пичедихть. Ламотне аф тёждя тевти макссть 25-35 кизонь. Корхтамась моли телятницатнень Н.И.Леонтьевать, С.П.Полькинать, Н.Я.Осинать, дояркатнень Т.Р.Фроловать, Н.И.Маскайкинать, Н.Н.Кабаевать, Т.Ф.Мирошкинать и лиятнень колга. Лама тевдонза и ветврачть А.А.Марфинонь.
Механизаторхне кунара ни урядайхть касфтф сёроть эса. Кода азозе председательть заместителец В.В.Резяпкин, урожайсь аф кальдяв. Тефне стане жа молихть аф кальдявста. Васенце вастсот кадратне. Ломатть улихть. Синь эсь тевснон содасазь, тиендьсазь совестьс коре. И примерга ули кинь лангста сявомс. В.В.Резяпкин хозяйстваса покоди ведьгемоньда лама киза. Сась «Рассвет» колхозу трудендама комбайнёрти помощникокс. Тя ульсь пяле векта инголе. А тяни сон и тракторист, и водитель, и комбайнёр, и слесарь. Отвечай и заправкать, и запчасттнень инкса. Аш стама тев, кона аф вийс коре улель Василий Васильевиченди.
—Кунара ни тулень ваймама,—корхтай Василий Васильевич.—Но седиезе палозь палы хозяйствать инкса.—Оттне тушендыхть Москуву добувама, а тефне кинди-бди вятемат-тиемат.
Василий Васильевич пичедезь лятфтазе, што нинге тя векть ушетксста ашельхть кодамовок прябалат кадратнень мархта. Аф аньцек районца, но и марнек республикаса лац содафтольхть Н.К.Аверкинонь, Е.И.Мустайкинонь, И.И.Левановонь, В.М.Алёшкинонь и лия механизаторхнень лемсна. Синь фалу лезнесть фталу ляды хозяйстватненди. А тяни «Курташкинское» ООО-са кие аньцек аф трудендай. Кочкафт ломаттне маластонь округань велетнень эзда.
Илья ВЕШКИН.