Тялоти анокт

«Нива» ограниченнай ответственность мархта обществась сувси инь цебярь хозяйстватнень ёткс Инсарскяй районца. Сон ащи Рузонь Паёвка велень поселениять территорияса. Вятьсы сонь трудонь кельги мокшалясь, райононь инь опытнай руководительсь А.В.Радаев.
«Нива» ООО-са касфтсть тяддевок аф кальдяв урожай. Анокласть тялонди жувататненди сатомшка корма. Озимой культуратне видефт, тундань видемати паксятне сокафт. Озимой культурань андомс аноклаф 500 тонна удобрения. Тяни васенце вастсот фермань тефне. Аф кенерят кафта пяли ваномс, ушедыхть якшапне. Тясовок сембось тиф сянкса, штоба тялось ёталь лямбоста, топодьста. Штоба фермаса улель кинди трудендамс.
Трудендайхть улихть. И трудсь тя няеви. Аньцек шнама валхт савсть кулемс телятницатнень Л.В. Кафтайкинать, О.Н. Кадейкинать, Ю.С. Зубковать, фермань лия покодихнень С.И. Мельниковать, Е.В. Сухарьковать, Ю.В. Ладановать и лиятнень колга. Тяни синь андыхть 600 пря КРС. Помещениятне сембе аноклафт тялонди. «Нива» ООО-са тялоти анокт. Арьсихть, што сон ётай аф кальдявста.