«Агросоюз-Левженский» ООО-са ушедсь сёронь урядамась
Тяфтама ни велень эряфсь, фкя тевсь полафнесы омбоцеть. Нинге исяк республикань велень хозяйстватнень эса башка мяль шарфневсь и лама вий водендафоль кормань анокламати, тячи лама вастова кярьмодсть ни сёронь урядамати. Лихтезь паксятнень лангс эсь комбайнаснон и Рузаевскяй райононь «Агросоюз-Левженский» ООО-нь механизаторхне.
—Сёронь урядама пингти маладоме сембе ширде аноклафста,—азонды хозяйствань вятись, Мордовия Республикань велень хозяйствань Заслуженнай работниксь В.И.Сетин.—Комбайнатне пцтай сембе отт, мяльце касы мархтост работамс. Сёронь урядама пингть синь фалу паксясот, кой-кона участкатне ащихть кемоньшка вайгяльбень вастса и техникась мековасу аш месть панцемс. Марнек сёротне видефтольхть фкя тёжянь гектар лангса. Урожайсь пяк цебярь, эрь гектарста арьсекшнетяма сявомс аф ведьгемоньда кржа центнер сёра. Кда кармай цебярь погодась, сембе ня площаттнень урядасаськ кафта-колма недяляста.
Кода содаф, оцю сатфксне сатневихть тоса, коса улихть цебярь кадрат, тевонь содай специалистт. «Агросоюз-Левженский» ООО-са прябалат тянь ширде аш. Улихть оцю опыт мархта покодихть, сашендыхть хозяйствав работама и лама од ломаньда, конат пяшксет вийда-эрьгада. Васенцекс лихтезь паксяв комбайнаснон механизаторхне Александр Попасов и Владимир Прончатов. Кафцьке синь эсь тевснон тиендьсазь маштозь, курокста, оцю качества мархта. Паксяста тинголангу сёроть усксесазь водительхне Алексей Паршин и Евгений Богачёв, конат шити кенерькшнихть тиемс пцтай кемонень рейс.
—Минь ломаненьке аф эрявихть кошярямс, лятфнемс теест мезе и кода тиемс, аньцек кярьмодихть работати, тевсна лаказь-лакайхть,—поладозе корхтаманц Владимир Сетин.—Эсь ширден тиендьса семботь, штоба сёронь касфнихне эсь пингстонза улельхть антфт, ускфт работама вастозост и—меки куду. Эрти оцю сатфксонь сатоманкса максови аф кальдяв премия.
«Агросоюз-Левженский» ООО-нь коллективсь лама киза мельцек путневи примеркс лиятненди, тяса маштыхть лац работама, кизоста кизос касфневи жувататнень продуктивностьсна, сатомшка аноклакшневи кормада тялонь кофненди, эрь гектарста средняйста кочксеви 40-50 центнеронь сёра. Тяддевок сембось тяса мольфтеви инголькиге арьсеф планц коре: пяшкотькшневихть кормаса сенажнай лоткне, касыхть тишень мархне-капатне, тинголангу усксеви серонь од урожайсь. И ня тефнень эса оцю путксоц хозяйствань вятить, мокшалять В.И.Сетинонь, кона тяфта жа покоди сиземань аф содазь, оцю сатфксонь сатнезь и мяль вельде.
—Велеса лиякс аш кода, мезьсовок ашеть кенере, нолдайть пингть, юкстайть тянь-тонань тиемс, эста учт аньцек прябалат, цебярь сатфкснень колга арьсемска аш месть,—поладозе азондоманц Владимир Иванович.—Аф стак корхнихть, кода покодят, стане и топодят.
Кулхцондсак Владимир Ивановичень, и содамок хозяйстваса тефнень цебярь азоркс вятемаснон колга, мяльце азомс: вов тяфта ба сембе вастова, эрь велеса, эрь предприятияса, семейнай ферматнень эса. «Агросоюз-Левженский» ООО-са маштыхть и лац работама, и лац ваймама. Ломаттне ладяйхть и спортть мархта, и праздниконь шиня сцена лангса кштийхть-морайхть. И ня тефнень эсовок ули оцю ширень кирдема, лезкс, хозяйствань вятить, мокшалять В.И.Сетинонь ширде. Шумбраши тейть, Владимир Иванович, паваз и лама кизонь эряф!
Н.ЛОБАНОВ.