Аф кальдявста моли сёронь урядамась Атюрьевскяй райононь велень хозяйствань предприятиятнень эса. Инголе тя тевса фалу ульсь «Каменка» МАПО-сь. Тяддевок теенза урядама пцтай 3500 гектар лангста сёра. Средняйста эрь гектарста тяса сявондихть 43-45 центнеронь сёра. Лац ладяфт тефне «Курташкинское» ограниченнай ответственность мархта обществаса. Тяса сави урядамс 1400 гектар лангста зерновой культура. Средняйста эрь гектарсь максы 29-30 центнер сёра. Тякоть можна азомс «Перевесье», «Фрунзе» обществатнень колга. Мезьсовок аф лядондыхть эздост А.В.Самошкинонь, В.С.Сиркинонь, В.Н.Алёшкинонь крестьянско-фермерскяй хозяйствасна. Синьге эрь гектарста сявондихть 25-30 центнеронь сёра.
Кода азозе Атюрьевскяй райононь оцюнять велень хозяйствань тефнень инкса отвечай заместителец Н.И.Гераськин, паксянь тефне мольфтевихть аф кальдявста. Сёрось урядави эсь пингстонза.
И тя афкукс тяфта. Ня шитнень улень «Курташкинское» ограниченнай ответственность мархта обществаса. Эрь вастса тефне лаказь-лакайхть. Сонць хозяйствань вятись Н.И.Кабанов то паксяса, то тинголангса. А мзяра кодама повсь тевда. Сяс сатомац тя пси пингть пяк стака. Сембе кизефксонень лангс макссь ответт велень хозяйствань ветеранць В.В.Резяпкин. Сон Курташкань хозяйстваса трудендай 50 лама киза. Лац содасыне ломаттнень и тефнень. Да и сонцьке тянивок нинге покоди. И комбайнас озай, и тракторс, и заправкать инкса отвечай, и техника пети. Аш стама тефт, конат аф вийс корят Василий Васильевиченди. Эсь примерсонза няфнесы лиятненди, кода эряви работамс.
Сёронь урядамаса заняф лац аноклаф коллектив. Василий Васильевич пара мяльса лятфтазень синь лемснон. Ётасть тяни ся пинкне, мзярда паксяса трудендасть аньцек эсь велеряйсна. Тяни комбайнёркс, водителькс покодихть ломатть Краснослободскяй, Ельниковскяй райоттнень, Атерьста, шабрань лия велетнень эзда. Покодихть седикс-ваймокс, виень аф ужяльдезь. Сёронь усксемаса заняфт А.М.Мартышкин, С.С.Волков, А.И.Надин. Нуйхть-тяляйхть сёра Д.В.Кулягин, А.П.Гусев, В.А.Алёшкин. Теест лездыхть цёрасна. Лама тевда и тинголангса, коса азоравась Т.Е.Кабанова. Тяса виень аф ужяльдезь работайхть Л.И.Чумарова, З.И.Леванова, А.М.Мартышкин, лиятне.
Тяка пингть хозяйстваса мольфтеви озимой культурань видемась. Тя тевса заняфт С.П.Тимошкин, А.М.Мурзайкин, В.В.Базаркин, Н.П.Макаров, Ю.М.Мартышкин. В.В.Резяпкинонь валонзон коряс, сембе паксянь тефнень ётафтсазь эсь пингстонза.
И.Вешкин.
Снимкаса: велень
хозяйствань ветеранць В.В.Резяпкин.