Старошайговскяй райононь «Богдановское» ООО-нь велень хозяйствань коллективть тевонзон колга мекольдень кизотнень шнамань лама статья лисенди республиканскяй газетатнень эса, азондови телевиденияса и радиоса. И тянди аш месть дивандакшнемс, сяс мес хозяйстваса ковста-ковс касфневи лофцонь получамась, тяса сатомшка аноклакшневи кормада, видеф паксятнень эзда урятцеви вете тёжяньда лама тонна сёра, мезсь кафксть сяда лама ингольдень кизотнень коряс. Пяле кизонь показательхне азондыхть сянь колга, што тядде цифратне улихть нинге сяда оцюфт.
—Тячи сембе вийхне водендафт сянди, штоба эсь пингстонза и лац-ряц урядамс сёроть,—азонды хозяйствань директорсь С.С.Якомаскин.—Васенда урядавихть озимойхне, марнек синь занцихть 800 гектар. Ня площаттнень эзда арьсекшнетяма кочкамс 30-35 центнер сёра эрь гектарста. Аф сяда ёмла урожай учсеви и яровой культурань площаттнень лангста.
«Богдановское» хозяйстваса эрь центнер сёрось сявф учётс. Тяса содасазь мзяра тяляф, мзяра ускф тинголангу и прважаф утому. Хозяйстваса тёжяньда лама оцю сюра мархта жувата, сяс тялоти эряви сембе ширде анокламс, фуражть эзда ащи лофцонь получамась и буканятнень касфтомаса привесне.
Паксянь, тинголангонь сембе тефнень мельге ваны главнай агрономсь Василий Викторович Десяев. Нильгемонь киза агрономкс покодемста Василий Викторович пуроптсь сёронь касфтомаса разнай метоттнень коряс козя опыт. Ня шитнень сонь рабочай шиц ушеткшни кота частста шобдава: васенда сон ванцыне паксятнень, сембе вастова ли кенерсь сёрось, а сяда меле максы команда комбайнёрхненди лисемс тя или тона участкати. Специалистсь эсь вастсонза и лемозонза азондыхть аньцек шнамань валхт.
—Мон мярьголень стане—Василий Викторович—тя монь види кядезе,—мярьгсь Степан Якомаскин.—Теенза кафксть аф эряви лятфнемс мезе тиемс и мзярда. Вов и тянивок, сёронь урядама пингть, сон стане латцесы тевть, што мяльце кеподи. Спасиба теенза, мес аф ужялясы эсь пингонц марстонь тефнень инкса, оцю сатфксонь сатоманкса.
Степан Степановичень эзда минь содаськ, кие тячи сёронь урядамаса инголи молихнень ёткса. Нят комбайнерхне П.Б.Мещяреков, Н.И.Максимкин, А.Н.Тришин, А.А.Манашкин. Пцтай сембонь синь работань оцю стажсна, сезонцта тяльсихть лама сяда тонна сёра. Паксяста тинголангу сёроть усксесазь водительхне Н.П.Бирлюков и С.В.Булычёв. Шити синь кенерькшнихть тиемс кемонень рейс.
—Сембе работатне тинголангса мольфтевихть колма сменаса,—азозе главнай агрономсь В.В.Десяев.—Паксяста ускф сёрось ноляви сортировальнай машина пачк, кда эрявксты, нолдави сушилкава. Сембе работатнень ётафнесаськ технологическяй вешфкснень коряс.
Видекс, тя хозяйстваса эрь кизоня васьфтят мезе-мезе одня. Полафневи техникась, ташта утопнень вастс стройсевихть отт. Панчф и работай сортировальнай од комплекс, коса эрь шиня ноляви сядот тонна сёра. И сембе ня объекттне стройсевихть хозяйствать эсь ярмаконзон лангс, конат получсевихть лофцонь, сиволень, сёронь мишендемать эзда. Тяса эрь цалковайсь сявф учётс.
Н.ЛОБАНОВ.
Фототне авторть.