11 ноябрьста Саранскяйса, Культурань республиканскяй Дворецса, ётафтовсь Велень хозяйствань и перерабатывающай промышленностень работниконь шити лемтьф торжественнай пуромкс.
Мордовиясь—инжиень примай-васьфти республика. Но содаф сон аф аньцек тянь мархта. Инь оцю козяшиц ломаттне—асу, вельф скромнай, сиземань аф содай труженикне, самай синь трудснон вельде тиендеви инь цебярсь и питнись. И вов тя шиня Культурань республиканскяй Дворецть залозонза кочксевсть сят, кит эряйхть Мордовияса сазоркс-брадкс, конатнень маласькофнесыне тевснонды, модаснонды-масторснонды кельгомась.
Васенда няфтьфоль Российскяй Федерациянь Президентть Владимир Путинонь видеообращенияц. Эсонза Владимир Владимирович азсь седи ваксстонь поздравленият Велень хозяйствань и перерабатывающай промышленностень работниконь шить мархта.
Сяда тов вал максфоль Мордовия Республикань Оцюняти Артём Здуновонди.
Артём Алексеевич башка мяль шарфтсь сянди, што Велень хозяйствань и перерабатывающай промышленностень работниконь шись—миньцонк главнай илась.
Сонь валонзон коряс, экономиканьконь тёкшец—тя сонь агропромышленнай комплексоц. Кемоньда лама киза мельцек моли касома тя отрасляса. Тяддень пингта ингольдень итокнень мяльс сявозь, республикаса арьсекшневи тиемс 127 миллиартта лама цалковаень тии суммас велень хозяйствань продукция, мезсь мелянь кизоти моли 9 процентонь касома мархта.
Тяддень показательхне кеняртьфтихть. Удалась кочкамс 1,4 миллион тонна сёра, эрь гектарста сявф 30-да лама центнер урожай. Тя инь цебярь результатсь Приволжскяй федеральнай округса. Кочкаф 1 миллионда лама тонна сахарнай якстеряпс, эрь гектарста—412 центнер. Тянь коряс Приволжскяй федеральнай округса заняськ нилеце вастть. Касфневихть импортозамещениянь объёмтне соять, шинжаромать, рапсть, перень сёротнень продукцияснон коряс.
Башка направлениясь—«Комплексное развитие сельских территорий» программаса, конань азозе Россиянь Президентсь Владимир Путин, участиянь примамась. Республикань Оцюнясь азсь спасиба аграрийхненди военнослужащайхненди, границаса эряйхненди, Донбассу и Новороссияв гуманитарнай грузть прважамста лезксонь максоманкса.
Тя шиня казьфтольхть инь достойнайхне.
Велень хозяйстваса сатфксонкса и лама киза седикс-ваймокс покодеманкса Россиянь Президентть Указонц мархта «Российскяй Федерациянь велень хозяйствань Заслуженнай работник» лемсь максфоль «Торбеево» Мордовскяй агропромышленнай объединениянь трактористти-машинистти Сергей Лосевонди.
«Россиянь Заслуженнай ветеринарнай врачекс» арась Ичалковскяй муниципальнай райононь «Агропромсервис» ООО-нь главнай ветеринарнай врачсь Валерий Баринов.
Странань Президентть Распоряжениянц мархта Российскяй Федерациянь Президентть Почётнай грамотанц мархта казьф Рузаевскяй муниципальнай райононь «НовоМилк» ООО-нь молочнай цехонь мастерсь Татьяна Киреева.
Республикань агропромышленнай комплексса оцю сатфксонкса Мордовия Республикань Оцюнять Указонц мархта Мордовия Республикань Славань I степенень орденца казьф «Ромодановосахар» ООО-ть директороц Александр Атласов. Сонь лемозонза кайгсь Мордовия Республикань Гимнась.
Славань II степенень орденца казьф Старошайговскяй муниципальнай райононь «Новотроицкая» Агрофирмать директороц Владимир Спирин, Славань III степенень орденца—Кочкуровскяй муниципальнай райононь «Норов» Аграрнай производственнай фирмань механизаторсь Юрий Басов, Славань III степенень орденца—Рузаевскяй муниципальнай райононь «Агросоюз-Красное сельцо» ООО-нь трактористсь Владимир Беляков, Славань III степенень орденца—Дубёнскяй муниципальнай райононь «Юбилейная» Агрофирмань директорсь Александр Косолапов.
Тифтольхть итокт райоттнень, агропромышленнай комплексонь предприятиятнень и работникнень ёткса трудовой соперничествати.
«Велень хозяйствань производствать эффективнайста вятеманц инкса» номинацияса 2024 кизоня сяськикс лувф Чамзинскяй районць. Сценати тертьфоль сонь оцюняц Андрей Сазанов. 9 ковонкса тиф 15 миллиартта лама цалковайс продукция. 22 миллионда лама цалковаень тии продукция тиф 100 гектар лангса. Тя инь оцю показательсь республикань райоттнень ёткса. Чамзинскяй районти максфоль сяськиень Диплом.
Касыксонь касфнемаса сяськикс лувфт колма райоттне: I зонать коряс Лямбирскяйсь, II зонать—Инсарскяйсь, III зонать—Зубово-Полянскяйсь. Сценати тертьфтольхть Лямбирскяй райононь оцюнять тевонзон аф лама пингс тиендисна Наиля Ерзина, Инсарскяй райононь оцюнять тевонзон аф лама пингс тиендисна Сергей Акишин, Зубово-Полянскяй райононь оцюнясь Владислав Поршин.
Лямбирскяй районца кочкаф 140 тёжяньда лама тонна сёра, гектарста—44,8 центнер. Инсарскяй районца—74 тёжянь тонна, гектарста—34 центнер. Зубово-Полянскяй районца кочкаф 53 тёжянь тонна сёра, эрь гектарста—31 центнер. Колма райоттненди максфт сяськиень Диплопт.
Якстеряпсонь витци райоттнень ёткса сяськикс лувфт Большеигнатовскяй и Ичалковскяй райоттне. Васенцеса кочкаф 111 тёжянь тонна сахарнай якстеряпс, урожайностсь—440 центнер гектарста. Омбоцеса—314 тёжянь тонна сахарнай якстеряпс, гектарста—429 центнер. Райоттнень оцюнясна—Татьяна Полозова и Валентина Дмитриева тертьфтольхть сценати сяськиень Диплопнень получаманкса. Тяда башка, Ичалковскяй районць получась сяськиень Диплом лофцонь производительхнень ёткса.
Лофцонь производительхнень ёткса сяськикс арасть Дубёнскяй и Рузаевскяй райоттне. Васенцеть оцюнянц тевонзон аф лама пингс тиендисна Оксана Вантяйкина и омбоцеть оцюняц Александр Юткин получазь сяськиень Диплопнень.
Дубёнскяй районца кочкаф 51 тёжяньда лама тонна лофца, мезсь мелять коряс моли тяфтама касома мархта—12 тёжянь тонна. Фкя траксста потяф 7 тёжятть 116 килограмма лофца. Рузаевскяй районца—46 тёжяньда лама тонна лофца. Фкя траксста потяф 7 тёжятть 516 килограмма лофца.
Азфтольхть и казьфтольхть и лия номинациятнень эса сяськихне.
Тифтольхть итокт тевонь ушеткшни фермерхнень ёткса. Сяськикс лувф Атюрьевскяй районцта Павел Талин. Павел Егорович арась «Агростартап» ведомственнай целевой программань участникокс. Направленияц—лофцонь жувататне. Программать коряс Павел Талин получась 3 миллиотт 500 тёжянь цалковаень тии Грант. А нинге сон—лама идень аля. Рьванц мархта касфтыхть аф совершеннолетняй кота шабат. Талиттнень семьяснонды максфоль Диплом и казьфтольхть казнет республикань Оцюнять эзда.
Тяда меле приветствиянь валхт азсь и сяськихнень казезень Мордовия Республикань Государственнай Собраниять Председателец Владимир Чибиркин. Владимир Васильевич поздравляндазень пуромфнень профессиональнай илать мархта.
«Республиканьконь тя главнай илац. Сонь учсазь аф аньцек велеряйхне, но и промышленнай предприятиятне, сяс мес продукцияфтомонт аш кода работамс великай странаньконь сембе отраслянзон эса»,—мярьгсь сон.
Старошайговскяй райононь «Новотроицкая» Агрофирмась лувф сяськикс велень хозяйствань производствать эффективнайста вятеманкса велень хозяйствань ся предприятиятнень эса, коса велень хозяйствань продукциять мишендемань объёмонза 250 миллион цалковайста сявомок 500 миллион цалковайти молемс. Тяддень 9 ковонкса продукциять мишендеманц эзда выручкась ульсь 332 миллион цалковай. Коллективти максф казнеть получазе «Новотроицкая» Агрофирмать директороц Владимир Спирин.
150 миллион цалковайста сявомок 200 миллион цалковайти молемс объёмть мяльса кирдезь, сяськикс лувф Атюрьевскяй райононь «Каменка» Мордовскяй агропромышленнай объединениясь (директорсь Игорь Тараскин). Тя объединениясь нинге получась сяськиень Диплом касыксонь касфнемаса сатфксонкса (III зонать коряс).
Российскяй Федерациянь Федеральнай Собраниянь Государственнай Думань Аграрнай кизефкснень коряс комитетть Председателенц заместителенц Юлия Оглоблина казезень крестьянскяй (фермерскяй) хозяйстватнень ёткса сяськихнень: Темниковскяй районцта Александра Резчиковать, Лямбирскяй районцта Азат Абдулловонь, а нинге—семейнай ферматнень, велень хозяйствань потребительскяй кооператифнень, агрокласснень ёткса сяськихнень.
Мордовия Республикань велень хозяйствань и продовольствиянь министрть Антон Илюшкинонь кядьста казнетнень получазь касыксонь касфнемаса велень хозяйствань предприятиятнень ёткса республиканскяй трудовой соперничествань, лофцонь производительхнень ёткса велень хозяйствань предприятиятнень ёткса, студенческяй велень хозяйствань отряттнень ёткса сяськихнень.
Ульсть поздравленият и казнет Российскяй Федерациянь Велень хозяйствань министерствать, «Ростсельмаш» Комбайновай заводть, «Аграрный ресурс» ОАО-ть—Гомсельмаш АО-ть официальнай дилеронц, Петербургскяй тракторнай заводть, Россиянь Сахаропроизводителень союзть и лиятнень эзда.
Татьяна АЛЬШИНА.