Велень куттненди—од эряф

Кадошкинскяй райононь мокшень Пою велеть эряфса мекольдень кизотнень эвондакшнихть кеняртьфти полафткст. Сратф-калатф куттнень вастс стройсевихть отт, лиятнень эса вятеви капитальнай ремонт: полафневихть кудбрятне, петневихть карттне, банятне, перяфксне. Сембода кеняртьфти ся, што ня тефнень вятьсазь ошста саф ломаттне. Синь макссихть од эряф тядянь-алянь куттненди, аф кржа и стамода, конат сафт вели ширеста. Ламонц кудга кулевихть узерьса шапомат, молаткаса чакамат, болгаркаса, пиласа керсемат. Тевс нолявихть тяниень пингонь материалхне: металлочерепицась, металлопрофильсь, сайдингсь, лия строительнай материалхне.

—Нильгемонь киза ни покодян эсь шачема-касома велесон, но тяфтама мялень кеподи полафткст аф мяляфтан,—азонды Пою велень администрациянь оцюнясь В.П.Келин.—Бта Шкайть валонза пачкодсть вели сайхнень пилес—петемс-кеподемс шачема кудснон. Аньцек мекольдень вете кизотнень вели сась комозьда лама семья, конат тяни ноляйхть юрхт шачема-касома велеса.
Васенцетнень ёткса, кие ошень прописканц полафтозе веленнеть лангс, В.П.Келин. Од алясь рамась ташта кудня, озафнесь шуфтонят, ладясь теплица, тись од перяфкс и тяни мяленц кепсесы эсь кядьса касфтф-кочкаф урожайсь.
Мрдасть эсь шачема велезост мирттне-рьвятне Юрий Васильевич и Людмила Степановна Моисеефне. Тяда инголе синь эрясть и покодсть Саранск ошса. Пенсияс тумда меле мокша ломаттне ламос ашесть арьсекшне и поладозь эряфснон Пою велеса. Синь тяфта жа рамасть куд, тисть эсонза ремонт, ётафтсть газ и аф каендайхть, мес кочкасть тяфтама эряф.
—Веленьке ащи мазы вастса. Тяса ломаттне фкя-фкянь шарьхкодихть, мезьса маштыхть лездыхть и мес ба аф эрямс велеса, аф кеняртькшнемс тя мазышити,—кепотьф мяльса азонды кудазорсь Юрий Моисеев.—Аф ичкозе шуди Исса ляйсь, кона бта «ашкордаф», аралаф вии варматнень эзда оцю пандса. Веленьконь эзда аф ичкозе нормалень, кстынь кочксема вастт, лихтибрят. Да и пересонга касфтт мезе мяльце, аньцек тят нолгада.
Крхка юрхт ёрай нолдамс Пою велеса и А.Р.Мамедов. Национальностьс коре сон туркмен, колмогемоньда лама киза эряй мокшавать Н.И.Щанкинать мархта. Касфтсть кафта стирьхть, тяни лездыхть унокснонды.
—Васенда минь лама киза эряме Туркменияса,—азонды Азим Рэмович.—Сяда меле покодеме Москуса, и вов ни вете кизот эряфоньке сотф Пою велеть мархта. Монь мялезон ня васттне, велень ломаттне, эрятама фкя-фкянь шарьхкодезь, кода братт и сестрат.
Велеряйхнень пара мялезост, мес ширезост сашендыхть тяфтама семьят, конат заняфт аф аньцек стройкаса, но и кирдихть кудонь жуватат, нармотть, озафнихть перень сёрот. Кепотьксонди, Иван Чекашовонь семьяц Рузаевка ошста сась вели. Тяни Поюса касфни буканят, тувот, мацихть. Вельф лядыксть мишендсазь.
—Ужяль, мес сяда инголи ашень мрда эсь шачема велезон,—мярьгсь Иван Чекашов.—Тяса кожфське сяда ару, ведське сяда танцти, тишеняське сяда ляпе. Кизонь шиня молят Исса ляи эшеляма, лисемаце тоста аф сай.
Ошень пропискаснон веленнеть лангс полафтозь Александр и Анна Акшаефне, Пётр Келин, Нина и Раиса Макушкинатне, Владимир и Надежда Наумофне и лиятне.
Эряви азомс, сембе ня цебярь полафткснень эса оцю путксоц и велень администрациять. Тястонь покодихне мезьса маштыхть лездыхть од семьятненди, курокста аноклавихть эрявикс документтне, справкатне, кудга ётафневи газ, свет, ведь.
—Кда тяфта кармай сяда товга, арьсян, маластонь пингть велеса аф ляды фкявок шава куд,—кепотьф мяльса шумордазе азондоманц Пою велень администрациянь оцюнясь В.П.Келин.—Тя пяк кеняртьфти и максси надияма вандыень шити!
Н.Лобанов.
Фототне авторть.

Последние новости

В МОРДОВИИ ЭКСПЕРТНЫЙ СОВЕТ ПРИ АТК ОЦЕНИЛ КОНТЕНТ ДЛЯ МОЛОДЕЖИ

6 февраля в Доме Республики под председательством заместителя Руководителя...

Пенсионеркась ётафтсь аф пелькс счётс 5,5 миллиотт цалковай

Кода пачфни «Стопмошенник13» телеграм-каналсь, Россиянь УМВД-нь Саранск ошень округть...

«Варяг» крейсерть подвигоц

9 февральсь—Россиять военнай историясонза мяляфтови дата. Тя шиня 1904...

Мазыхть мокшень стиреньке

Кельгома морафтыеньке! 2025 кизоня «Мокшень правда» газетась сяда тов...

Рославльскяй Краснознамённай 326-це стрелковай дивизиясь пуроптфоль Саранскяйса

Тядде васьфтьсаськ оцюдонга оцю илать—Великай Сяськомать 80 кизонь топодеманц....

Эрявикс кизефксненди—башка мяль

Ётай недялять Саранскяйса, Республикань Кудса, ётафтовсь Мордовия Республикань сисемце...

В МОРДОВИИ ЭКСПЕРТНЫЙ СОВЕТ ПРИ АТК ОЦЕНИЛ КОНТЕНТ ДЛЯ МОЛОДЕЖИ

6 февраля в Доме Республики под председательством заместителя Руководителя Администрации Главы Республики Мордовия и Правительства Республики Мордовия – руководителя Пресс-службы Главы Республики Мордовия Елены...

Пенсионеркась ётафтсь аф пелькс счётс 5,5 миллиотт цалковай

Кода пачфни «Стопмошенник13» телеграм-каналсь, Россиянь УМВД-нь Саранск ошень округть эзга 4№ полициянь отделу пшкядсь ошень 65 кизоса авась, кона пачфтсь вете тёжяньда лама цалковаенц...