Мордовиянь Оцюнясь 21 июльста васетькшнесь ошень «Свято-Предтеченское» казачьяй обществань члеттнень мархта. Ванондовсть специальнай военнай операцияса сонь представителензон участиянь примамасна, территориятнень эса сонь ётафтомстонза марстонь обстановкась, стакатне-сталмотне, конатнень мархта васетькшнихть участникне.
Артём Здунов азсь спасибамань валхт Мордовиянь казакненди боевой задачатнень пяшкотькшнеманкса, конатнень путозень Россиянь Президентсь Владимир Путин.
«Мордовиянь казакне-доброволецне примасть активнай участия мирнай граждаттнень, велетнень араламаса, ульсть боевой дежурстваса и макссесть лезкс минь Вооруженнай виеньконди. Тейне пачфтсть тинь лац ётафтф работантень колга. Ся, што тинь моледе Донбассу васенцексне, агитацияфтома и бюрократияфтома, ламода корхтай казачьяй движениять колга—инь стака пинкнень казакне фалу васенцексне стяшендсть Родинать аралама»,—мярьгсь региононь руководительсь.
Ошень «Свято-Предтеченское» казачьяй обществать атаманоц Вячеслав Жаров азондозе, што военнай операциять ушетксстокиге казачьяй обществась кирдезень воиттнень-казакнень ширеснон, конат стясть Россиять и ДНР-нь, ЛНР-нь эряйхнень интересснон аралама. Казачьяй обществась кочкась ярмак, кочкафоль и кучфоль 4 тоннат гуманитарнай лезкс.
«Тяни сась пингсь, кона веши ответ: кинь ширенц тон кирдьсак. Минь максоме ситуацияти сембе ширдень арьсеф оценка и тиеме тяфта, кода мярьгсь седиеньке—цёратне тусть аралама Родинаньконь интересонзон»,—мярьгсь Вячеслав Жаров.
Республикатнень территорияс тусь казачьяй движениять 12 представителец. Кафта ковонь пингста Ермак казачьяй войскать составса Мордовиянь казакне ётазь службать, сатфксонь сатнезь пяшкотькшнезь боевой задачатнень. 11 июльста контрактсь аделавсь и казакне сембе мрдасть Мордовияв.
Республикань Оцюнять мархта васедемста казакне азондсть СВО-са участияснон колга, няфтсть архивнай фотографият и документт.
Тяка жа шиня специальнай военнай операциянь участникненди максфтольхть Мордовия Республикань Государственнай премиянь и Мордовия Республикань Оцюнянь Премиянь лауреатонь лепт.