20 майста Старошайговскяй райононь Сире Теризморга велеса ётафтовсь национальнай оцю ила—Г.И.Сураевонь-Королёвонь лемса «Велень вайгяльхть» («Сельские голоса») народнай моронь I Республиканскяй фестивальсь. Сон лемдевсь Россиянь нароттнень народнай искусствань и аф материальнай культурнай наследиянь кизоти и мокшень содаф композиторть, Россиянь и Мордовиянь искусствань Заслуженнай деятельть Г.И.Сураевонь-Королёвонь шачема шиста 100 кизонь топодемати.
Сире Шайгавонь аймаксь аф стак кочкафоль фестивальти ётафтома вастокс. Тястонь Кулдым мокшень велесь—Г.И.Сураевонь-Королёвонь ёмла родинац, тяса сон шачсь и касозе серенц. Кельгозе сон и Сире Теризморгать. Георгий Иванович най корхнекшнесь: «Мзярда пяк сизсян или мезсь-бди монь аф лисенди—кадондсайне сембе тевнень и тушендан Сире Теризморгав. Тяса эрь кудса морсихть. Кулхцонкшнемок ня моротнень, мон лама пингонди пуропнян вийхть-эрьгат».
Г.И.Сураевонь-Королёвонь эряфонь и творчествань киц сатомшка келиста няфтьфоль «Музыка—поэзия души» фотодокументальнай выставкать эса, конань фестивальти аноклазь И.Д.Воронинонь лемса Мордовскяй республиканскяй объединённай краеведческяй музеень сотрудникне.
«Велень вайгяльхть» фестивальс пуромкшнесть самодеятельнай народнай хорхт, фольклорай коллектифт, солистт-вокалистт, народнай моронь ансамбльхть республикань сисем аймакста: Атюрьевскяй, Ельниковскяй, Ковылкинскяй, Краснослободскяй, Темниковскяй, Торбеевскяй, Старошайговскяй муниципальнай райоттнень эзда.
Национальнай культурань центрать фойеса панчфоль декоративно-прикладной творчествань выставка, коса эрь районць няфтезе эсь сувенирнай продукциянц. А ульцяса келептьфоль полевой кухня, коса инжихне каванявсть танцти ямса и тишень чайса. Сяльде илась поладовсь Центрать актовай залсонза. Тяса сценать лангс фкя-фкянь мельге лисендсть велень артисттне, творческяй коллектифне, кайгсть сире пингонь мокшень морот, тяконь лувксса сят, конатненди обработка тиендсь Г.И.Сураев-Королёв. Панжезь концертнай программать Сире Теризморгань артисттне. Кядень кайги цяпамаса васьфтьфтольхть Атюрьевскяй районцта «Ялгат», Ельниковскяй районцта «Мокшаваня», Темниковскяй районцта «Лаймоня» ансамбльхне и лия коллектифне.
Сашендсь фестивальс и «Келу» фольклорнай ансамбльсь, конань пуроптозе содаф композиторсь. Ансамбльсь кунара ни каннесы Георгий Ивановичень лемонц и лувондови республиканьконди визитнай карточкакс.
Ульсть фестивальса и оцю инжихть. Синь ётксост МР-нь культурань, национальнай политикань и архивнай тевонь министрсь Светлана Баулина и Старошайговскяй муниципальнай райононь оцюнясь Геннадий Мухин. Светлана Никитовна шарфтсь мяль сянь лангс, што тяфтама илатне пяк лезнихть национальнай культурать ванфтомаса, а сяс синь ётафнемат сяда сиденяста. Азсь надияма, што «Велень вайгяльхть» фестивальсь кармай пуропневома эрь кизоня, а участниконзон лувкссна кизоста кизос аньцек касы.
Фестивалень сембе участникне казьфтольхть дипломса и мяляфтови казнеса.
О.ЕВДОКИМОВА.