2 сентябрьста Ковылкино ошса келиста ётафтовсь «Шумбрат» V-це Межрегиональнай национально-фольклорнай фестивальсь. Илас сашендсть культурно-творческяй делегацият Саранск ошста, Мордовия Республикань муниципальнай сембе райоттнень и Российскяй Федерациянь региоттнень эзда, коса компактнайста эряйхть мокшэрзят.
Нят—Моску и Санкт-Петербург ошне, Московскяй, Ленинградскяй, Нижегородскяй, Оренбургскяй, Пензенскяй, Самарскяй, Саратовскяй, Ульяновскяй областтне и Башкортостан, Татарстан и Чувашия Республикатне. Фестивальса синь няфтезь мокшэрзянь национальнай культурать сембе ширдень мазышинзон.
Межрегиональнай фестивальса тяфта жа келиста и мазыста выставкань форматса няфтезь эсь творчестваснон мокшэрзянь национальнай ремеслань и промыслань 55 мастерсь.
Илас пуромфне ванозь мокшэрзянь национальнай ярхцамбялень выставкатнень и моронь-кштимань козя программать, конань фестивальса няфтезь республикань и странань лия региононь мокшэрзянь национальнай профессиональнай и народнай коллектифне, а стане жа Москувонь мокшэрзянь содаф певецсь и композиторсь Григорий Петров и «Садко» содафтонга содаф группась.
Фестивальть рамкаса ётафтовсь Мордовскяй (мокшень и эрзянь) народонь Межрегиональнай общественнай организациять Исполкомонц заседанияц. Пингстонза пуромфне кулхцондозь Межрегиональнай организациять председателенц, профессорть Ю.А.Мишанинонь докладонц Исполкомть тевонзон квалма, конат ётафтфт эряфс мокшэрзянь народть консолидациянкса и Россиянь нароттнень тяниень пингонь геополитикань условияса гражданскяй марстоньшиснон кемокстаманкса.
Докладса кепотьф кизефкснень коряс эсь мяльснон азозь Российскяй Федерациянь сенаторсь П.Н.Тултаев, республикань Государственнай Собраниянь депутатсь Е.Е.Ледяйкин, Ульяновскяй областень мокшэрзянь национально-культурнай автономиять председателец В.А.Софонов, Н.П.Огарёвонь лемса госуниверситетонь профессорсь Ю.Н.Сушкова, Пензенскяй областень мокшэрзянь национально-культурнай автономиять председателец Е.Г.Первушкина, Чувашия Республикань мокшэрзянь культурань центрать председателец В.П.Седойкин, а стане жа Мордовия Республикань культурань, национальнай политикань и архивнай тевонь министрсь С.Н.Баулина.
Заседаниять пингста тяфта жа кочкафтольхть Исполкомонь од председателькс эрзянь этнокультурнай наследиянь ванфтомань и касфтомань фондть руководителец Т.И.Ларина, а Исполкомонь од членкс—Межрегиональнай организациянь секретарсь Т.Т.Ширманкина, «Мокшень правда» газетать главнай редактороц О.В.Евдокимова и лия содаф ломатть.
«Шумбрат» V-це Межрегиональнай национально-фольклорнай фестивальть панжезе «Шумбрат, Мордовия! Шумбрат, Россия!» лем ала странань народонь костюмированнай парадсь.
Сяльде фестивальс пуромфнень приветствовандазень Мордовия Республикань Оцюнясь А.А.Здунов. Сон мярьгсь:
—Кельгома ялгат, вечкевикс оят, кельгома инжихть, приветствовандатядязь тинь «Шумбрат» V-це Межрегиональнай национально-фольклорнай фестивальса, кона тячи тейнек сембонди арась афкуксонь илакс! Фестивальс састь инжихть Россиянь маластонь и ичкоздень региоттнень эзда, коса ванфневихть и виияфневихть мокшэрзянь национальнай культурась, койхне-обуцятне, мокшень и эрзянь кяльхне. И тянкса теест азондан оцюдонга оцю сюкпря!
Минь саме мяльс ётафтомс тяддень «Шумбрат» V-це Межрегиональнай национально-фольклорнай фестивальть Ковылкинскяй районца аф стак. Сяс мес, койсонк, «Шумбрат» илать эряви ётафнемс аф аньцек Мордовиять столицаса, но и республикань райоттнень эса.
Тячиень фестивальса минь тага няйсаськ мокшэрзянь национальнай промыслатнень и ремеслатнень, моротнень и кштиматнень, мокшень и эрзянь кяльхнень лама ширдень мазышиснон. И сембонь тянь тейнек эряви пачфтемс народоньконь од поколениянцты, сяс мес сембось тя—минь государственностеньконь и безопасностеньконь гарантиясна!
Кода няйсасть, ся странатне, конат аф ладяйхть мархтонк, вятихть тюрема культураньконь, вераньконь и минь народоньконь юронзон-ушетксонзон каршес. Но минь теест вестьке аф сяськофтяма, сяс мес Сяськомась эряй минь версонк!
Выступленияда меле А.А.Здунов «Мордовия Республикань культурань Заслуженнай работник» почётнай лемса казезе А.С.Пушкинонь лемса республиканскяй библиотекань краеведческяй и национальнай литературань отделонь главнай библиотекарть В.И.Пронинать, «Мордовия Республикань Заслуженнай артист» почётнай лемса—«Садко» группать руководителенц А.В.Бардинонь, «Республикать виияфтомаса оцю путксонкса» Мордовия Республикань Оцюнять Почётнай знакса—Пензенскяй областень мокшэрзянь национально-культурнай автономиянь Правлениять председателенц В.И.Первушкинонь, Мордовия Республикань Оцюнять благодарностьса—Атюрьевскяй райононь Кяшал велень школань рузонь кялень и литературань, мокшень кялень и литературань учительницать Л.П.Байчуринать, Мордовиянь Правительствать видеса гуманитарнай наукань НИИ-нь научнай старшай сотрудницать Л.А.Гурьяновать, Саранск ошень 3№ школань мокшень кялень и литературань учительницать Л.А.Сланинать и ламотнень лиятнень.
А.А.Здунов Мордовиянь Правительствать благодарностьса тяфта жа казезень Чамзинскяй райононь Комсомольскяй посёлкань 2№ школань эрзянь кялень и литературань учительницать Т.П.Вильдяскинать, Рузаевскяй райононь Сузгарьевскяй школань мокшень кялень и литературань учительницать Н.В.Лукашенкоть, Ковылкинскяй райононь Советскяй Союзонь Геройть А.Г.Котовонь лемса Троицк велень школань историянь и обществознаниянь учительть И.И.Фоминонь, «Шумбрат» V-це Межрегиональнай национально-фольклорнай фестивалень организаторонь Дипломса—Ковылкинскяй муниципальнай райононь оцюнять И.Н.Бутяйкинонь.
Тяда меле А.А.Здунов фестивалень «Штатол» символть максозе Саранск ошень округонь оцюняти И.Ю.Асабинонди, кона кармай аноклама и ётафтома сай кизоня Мордовиять столицаса «Шумбрат» VI-це Межрегиональнай национально-фольклорнай фестивальть.
Сяльде илас пуромфнень праздникть мархта лямбоста поздравляндазь Мордовиянь Государственнай Собраниять Председателец В.В.Чибиркин, Российскяй Федерациянь сенаторсь, Россиянь финно-угорскяй народонь Ассоциациять председателец П.Н.Тултаев и Мордовскяй (мокшень и эрзянь) народонь Межрегиональнай общественнай организациять председателец, профессорсь Ю.А.Мишанин.
«Шумбрат» V-це Межрегиональнай национально-фольклорнай фестивальть панжевомда меле ушедсть народнай гуляниятне. Пингстост фестивальс сафне ванозь национальнай промыслань, ремеслань и ярхцамбялень выставкатнень, моронь и кштимань концерттнень, конатнень теест аноклазь «Садко» группась, «Келу», «Мерема», «Торама», «Росичи» республикань содаф коллектифне, а тяфта жа Мордовиянь муниципальнай райононь и странань лия региононь мокшэрзянь национально-фольклорнай ансамбльхне.
Илась сембе ширде удалась!
В.НЕСТЕРОВ.