А.С.Пушкинонь лемса национальнай библиотекать директороц Анастасия Бакулина: «ОД ЛОМАТТНЕ ЭСТОКИГЕ СТЯЙХТЬ ОТЕЧЕСТВАТЬ АРАЛАМА!»

—Анастасия Владимировна, кодама мероприятият Семьянь кизоть лемс ётафтсь А.С.Пушкинонь лемса национальнай библиотекась?
—Тядде библиотеканьке васьфтьсы 125 кизонь юбилеенц и сембе мероприятияньке мольфтевихть «Семьянь келеса—библиотекав!» девизть вешфксонзон коряс. Синь ванондовихть семьянь келеса, а тянь мархта, шарьхкотьф, кемокстасазь тядятнень-алятнень и синь идьснон ёткса сембе ширдень соткснень.
«Библиове» Всероссийскяй акциять пингста сембе ётафтф мероприятиятне лемтьфтольхть семьянь питнишитненди.
Лувихнень мяльс тяфта жа тусь «Ромашковое счастье» мероприятиясь, конань ётафтоськ Семьянь, кельгомань и верностень шиня. Тя илас лувихне сашендсть семьянек. Сяс ули кода азомс: миньцонк улихть нинге оцю семьят, коса марса эряйхть эряфкшу ломаттне эсь идьснон и унокснон мархта. И тя пяк кеняртьфти.
Культурно-историческяй мероприятиятнень пингста минь азонкшнетяма лувихненди оцю семьятнень колга, конат фалу ульсть Мордовияса, а театрализованнай представлениятнень вельде няфнесаськ синь эрямань койснон-обуцяснон. Тякоть колга азондыхть книгань, историческяй фотоснимкань и картинань выставкатне.
—Кода содаф, А.С.Пушкинонь лемса Мордовия Республикань национальнай библиотекась арась «#КультураZaПобеду!» республиканскяй проектти кураторкс. Кода мольфтевихть тефне СВО-нь боецненди гуманитарнай лезксонь кочкамать и фронту пачфтемать мархта?
—Тя проектсь, конань арьсезе Мордовиянь Культурань, национальнай политикань и архивнай тевонь министерствась, мольфтеви республикань культурань сембе учреждениятнень эса.
Тяддень февральста сявомок, культурань учрежденияда башка, гуманитарнай лезкс библиотеказонк пачфнихть волонтёрхне и общественнай лия организациянь представительхне, республикань промышленнай, велень хозяйствань предприятиятне, бизнес-структуратне, Саранск ошень, райцентрань и велень эряйхне. А.С.Пушкинонь лемса национальнай библиотекань сотрудникне кочксихть лама ширдень гуманитарнай лезкс, тиендихть окопнай штатолхт и кодайхть маскировочнай сетьть.
Гуманитарнай лезкссь эрь недяляня пачфневи специальнай военнай операциянь боецненди. Тяда башка, минь макссетяма гуманитарнай лезкс Херсонскяй областень Каланчакскяй райононь библиотекатненди и культурань лия учреждениятненди. Маластонь пингть максови лезкссь кармай сотф тонафнемань од кизоть ушедовоманц мархта. Каланчакскяй райононь образованиянь и культурань учреждениятненди кучевихть тонафнемань од книгат, литература и иттненди тонафнемста лия эрявикс паршихть.
—Сёксенда Саранскяйса арьсекшневи ётафтомс Мордовскяй (мокшень и эрзянь) народть Межрегиональнай общественнай организациянц съездоц. Койсот, кодама кизефкст васенцекс эрявихть корхтафтомс делегаттненди?
—Конешна, съездса васенце вастса кармайхть ащема мокшень и эрзянь кяльхнень, мокшэрзянь национальнай культурать ванфтомаснон и виияфтомаснон коряс кизефксне. Стане жа вановихть и корхтафтовихть ся кизефксне, конат сотфт нароттнень ёткса ялгаксшить кемокстаманц и странань лама национальностень народса патриотизмать касфтоманц-кеподеманц мархта.
Койсон, съездса эрявихть корхтафтомс лама идень семьять ванфтоманц и синь лувксснон касфтоманц коряс кизефксне.
—Анастасия Владимировна, кода мольфтеви библиотекаса од лувихнень мархта патриотическяй работась?
—Патриотическяй работать вельде лувихненди пачфневи историческяй оцю событиятнень колга, конат сембе пингс сувасть Отечестваньконь историяс.
Эряви азомс, што специальнай военнай операциять ушедовомда меле патриотическяй мероприятиятнень лувксснон минь касфтоськ. И содаса: од ломаттне, конат улендихть патриотическяй мероприятиясонк, эстокиге стяйхть Отечествать аралама!
—Анастасия Владимировна, удалаза сембе арьсефонте.
—Сюкпря!
Владимир НЕСТЕРОВ.