А.С.Пушкинонь лемса национальнай библиотекать директороц Анастасия Бакулина: «ПОКОТТЯМА ПИНГТЬ ВЕШФКСОНЗОН КОРЯС»

—Анастасия Владимировна, кодама работа вятсь библиотекась тя кизоня? И кода сон касфтозе-кеподезе эсь профессиональнай статусонц и вятсь библиотекав од лувихть?
—Тяддень кизось библиотеканьконди—юбилейнай. Тейнек топодсь 120 киза! Сяс тядде минь ётафтоме и нинге ётафттама эряфс лама цебярь тев, конат няевиста кеподьсазь од серьс библиотеканьконь профессиональнай статусонц. И, конешна, вятихть од лувихть.
Кда корхтамс библиотекать профессиональнай статусонц касоманц колга, эряви азомс, што тядде «Библиотечное дело» федеральнай журналса лиссть кафта оцю статьят. Эсост азондови А.С.Пушкинонь лемса национальнай библиотекать профессиональнай сатфксонзон колга. Фкясь эздост—тя библиотекасонк Консервациянь и реставрациянь Региональнай центрать панжевомац. Тяса кармайхть одкстопневома шуроста васьфневи книгатне, историческяй документтне и духовнай культурань лия питнишитне, конат тейнек эрявихть пачфтемс народоньконь сай пингонь поколениянзонды. Тяфта жа духовнай питнишитне цифровой технологиятнень вельде ётафтовихть интернету, коса учёнайхне и студенттне кармайхть мархтост работама. Тяфта жа эряви азомс: тяфтама Центрада Россияса аф лама. А.С.Пушкинонь лемса национальнай библиотекаса панжевсь Консервациянь и реставрациянь Региональнай нилеце центрась. И минь сонь панжевоманц лувсаськ оцю сатфксокс.
Од лувихть библиотеказонк тяфта жа вятнихть литературно-музыкальнай и лия мероприятиятне, конат ётафневихть миньцонк республикань поэттнень и писательхнень юбилейснон, од книгань лисематнень и духовнай культурань лия няевикс тефнень лемс.
—Кода содасаськ, А.С.Пушкинонь лемса национальнай библиотекась од лувихнень мархта вяти патриотическяй оцю работа. Од ломаттнень ширде ули шарьхкодема?
—Конешна, ули. Од ломаттненди патриотическяй мероприятиянь ётафтомста минь лекцият аф лувонттама, сяс мес пингсь кошарды эсонк покодемс мархтост од форматса. Сидеста ётафнетяма васедемат специальнай военнай операциянь воиттнень и ветераттнень мархта. Пингстост синь азонкшнесазь мес и мезенкса тюрихть бандеровскяй нацисттнень и омба масторонь лия фашисттнень каршес историческяй Русьть моданзон лангса. И эрь васедемась од лувихнень ваймос сувафты лама цебярьда.
Конешна, специальнай военнай операциять ушедомда меле обществаньке няевиста полафтсь. Кой-кит содаф ломаттнень ёткста ворьгодсть омба мастору и тоста тяряфнихть валондомс рдазса ингольдень родинаснон и народснон. Но народоньке кеподсь-стясь бандеровскяй и омба масторонь фашисттнень каршес. Кой-конат тусть фронту, а кой-кит тиихть теест оружия обороннай заводса, кодайхть маскировочнай сетьть, тиендихть окопнай штатолхт, кочксихть боецоньконди гуманитарнай лезкс. Библиотеканьке тяфта жа вяти гуманитарнай лезксонь кочкамать и сонь фронту прважаманц коряс оцю работа. Библиотекасонк ули специальнай васта, коса библиотекарьхне, ошень эряйхне и инжихне, конат сашендыхть библиотекав, кодайхть маскировочнай сетьть.
А.С.Пушкинонь лемса национальнай библиотекась од лувихнень мархта патриотическяй работать вятьсы лац.
—Аделсеви Семьянь кизось. Пара улель содамс, кодама мероприятият ётафтовсть библиотекаса тя кизоть мяльс сявозь?
—Минь библиотекасонк ётафтовсь лама мероприятия Семьянь кизоть лемс. Эрьса минь кемокстаськ семьянь аф фкя лацонь соткснень, пачфтеме семьянь питнишитнень колга. Надиян, тя работаньке касфтозе од семьятнень лувксснон республикасонк.
—Удалаза арьсефонте, Анастасия Владимировна.
—Сюкпря!
Владимир НЕСТЕРОВ.