26-27 октябрьста Калининградскяй областьса ётафтовсь Модельнай библиотекань школать Х Межрегиональнай сессияц. Пингстонза странань библиотекань сотрудникненди тя форумть аноклаенза-ётафтыенза азондсть сянь колга, кода касфтомс тяниень пингонь библиотекатнень социальнай рольснон кода информационнай, культурнай, образовательнай учреждениянь ошса и велеса.
Мордовиянь библиотечнай системать ширде Межрегиональнай форумса примась участия А.С.Пушкинонь лемса Национальнай библиотекать директороц Анастасия Бакулина.
—Кафта шиста, мзярс мольфтевсь Модельнай библиотекань школать Х Межрегиональнай сессияц, кочкань од содамошит. Синь лездыхть тейнек кеподемс-лихтемс профессиональнай сяда оцю серьс республикань ошень и велень библиотекатнень работаснон.
«Модельнай библиотекась—тяниень пингонь информационнай обществать юроц» лем ала Межрегиональнай форумть Пленарнай заседанияц панжевсь 26 октябрьста Светлый ошень Н.Ф.Фёдоровонь лемса централизованнай библиотечнай системаса. Ушетксстонза пуромфненди приветственнай валхт азсть Калининградскяй областень культурать и туризмать коряс министрсь Андрей Ермак, Российскяй библиотечнай ассоциациять президентоц Михаил Афанасьев, Российскяй государственнай библиотекань генеральнай директорсь Вадим Дуда, «Сай пингонь библиотекатне» Национальнай библиотечнай ассоциациять президентоц Яков Шрайберг, «Тяниень пингонь библиотека» Издательскяй консалтинговай центрать директороц Любовь Казаченкова и лиятне.
Сяльде Пленарнай заседанияса пуромфне кулхцондозь Калининградскяй библиотечнай ассоциациять исполнительнай директоронц Ян Мозеллонь докладонц, коса сон пачфтсь Модельнай библиотекань школать кемонь кизонь работань итогонзон колга. Мельганза Светлый ошень ЦБС-нь директорсь Сергей Суздалёв азондсь пуромфненди, кода тяниень пингонь цифровой технологиятнень вельде муниципальнай образованияса тиемс информационно-библиотечнай марстонь сфера. Тяфта жа оцю мяльса пуромфне кулхцондозь «Библиотекатнень социальнай функциясна велеса» докладть, конань тиезе Калининградскяй областень научнай библиотекань представительсь Вероника Юстратова.
Сяда тов ульсть цифровой технологиятнень тевс нолямаснон коряс практическяй семинархт. Синь ётафтозь «Путешествия Калининградскяй областень модельнай библиотекатнень эзга» проектса-конкурсса сяськись Дмитрий Зайцев и лиятне.
Омбоце шиня, 27 октябрьста, Пленарнай заседанияса корхтасть «Мультимедиянь ветеце видсь» ООО-ть генеральнай директоронц заместителец Юлия Епифанова, «Наследия и экономика» деловой клубонь вице-президентсь Юлия Куварзина, а стане жа мон.
Доклатта меле пуромфненди тяфта жа ётафтовсть библиотечнай сфераса цифровой технологиятнень тевс нолямаснон коряс практическяй семинархт.
Форумть пингста ульсть Калининград ошень и областень Модельнай инь цебярь библиотекатнень эзга экскурсият.
—Анастасия Владимировна, мезень колга азондоть эсь докладсот Межрегиональнай форумонь Пленарнай заседанияса? И мезсь, койсот, эряви нолдамс тевс республикань библиотечнай системаса?
—Эсь докладсон пуромфненди пачфтень сянь колга, кода минь тиеськ и вятьсаськ республикань библиотечнай системаса литературань своднай каталогть. Тяфта жа азондонь, кода вятеви республикань библиотечнай системаса лувиень фкя-марстонь билетть вельде работась, кода библиотеказонк сёрматфнихть пря лувихне «ЕСИА» госуслугань порталть вельде, кода вятеви работась библиотекатнень и республикань лия ведомстватнень ёткса, а тяфта жа республикань библиотечнай работать латцеманц-вятеманц колга.
Кда корхтамс Модельнай библиотекань школать Х сессияса кульфть-няйфть колга, эряви азомс: республикань библиотекатненди ули мезе сявомс Калининградскяй областень модельнай библиотекатнень рабочай опытста. Кепотьксонди, лувихнень мархта работамста тостонь библиотекатне келиста и маштозь нолясазь тевс тяниень пингонь цифровой технологиятнень. И, тяда башка, вятихть оцю работа туризмань и социальнай сфераса.
Лиякс мярьгомс, синь рабочай опытстост инь цебярть эряви сувафтомс минь республикань ошень и велень библиотекатнень работас.
—Кода арьсетяда тянь тиемс?
—Тяддень кизоть аделавомс А.С.Пушкинонь лемса Национальнай библиотекаса арьсян ётафтомс региональнай библиотечнай системань библиотекарьхненди тонафнемань семинар. Надиян, тяда меле республикань библиотекатнень сембе ширдень работасна кеподи од серьс!
—Удалаза арьсефонте, Анастасия Владимировна.
—Сюкпря!
Владимир НЕСТЕРОВ.