А.С. Пушкинонь лемса республикань Национальнай библиотекать директороц Анастасия Бакулина: «ОЦЮНЯТЬ ТЕВОНЗА МОЛИХТЬ ВАЛОНЗОН МЕЛЬГЕ!»

—Анастасия Владимировна, ёфси аф кунара Мордовия Республикань Оцюнясь Артём Здунов лувозе региональнай Государственнай Собраниянь депутаттненди 2026 кизонди Посланиянц. Сяс ёран кизефтемс: мезсь тя документса тусь мялезт? И мезть тон эздонза сувафтсак эрь шинь работазт?
—Васенцекс, ёран азомс: Посланияса цебярьста и шарьхкодевиста няевихть Артём Алексеевичень работанц сембе ширенза. И синь кемоста сотнесазь эсь ётковаст республикань эряфонь, политикань, экономикань, культурань и лия сембе сфератнень.
Няевикс вастса ётксост ащихть од ломанень семьятненди, СВО-нь геройхненди лезксонь максомать, образованиянь, культурань кизефкснень мархта.
Посланияса тяфта жа сай кизось азф-ладяф Шумбрашинь кизокс. Сяс ули кода азомс: республикань лама национальностень народсь кармай эряма шумбра-таза эряфса!
Посланиять кулхцондомста монь тяфта жа кеняртьфтемазь валхне республикань лама национальностень культурать виияфтоманц колга. Васенце вастса тяса, конешна, ащи мокшэрзянь гениальнай скульпторть С.Д.Эрьзянь 150 кизонь юбилеец. Торжестватне сонь лемозонза кармайхть ётафневома аф аньцек Мордовияса и Россияса, но и омба масторса!
Тяфта жа пяк тусть Артём Алексеевичень валонза-арьсеманза республикань библиотекатнень книгань фондснон козякофтомаснон колга. Кулемок тянь, тейнек, библиотекарьхненди, ули кода цебярьгофтомс эсь работаньконь. И тя работати минь карматама вятнема-сувафнема од ломаттнень.
Синь мархтост минь саттама од и няевикс сатфкст!
—Кода минь содасаськ, Анастасия Владимировна, тяддень кизоня тейть савсь работамс региональнай, межрегиональнай, федеральнай лама мероприятияса. Пара улель кулемс мяльцень синь эрявиксшиснон и парашиснон колга.
—Тянь коряс кизефкссь Посланияса тяфта жа кепсевсь. Корхтамась мольфтевсь сембе ширдень соткснень странань лия региоттнень, Белоруссия Республикать и лия омба масторхнень виияфтомаснон мархта. И тя работась кармай вятевома синь мархтост, кода тяддень, стане и сай кизоня. И республикань библиотекатненди тя сфераса муви васта.
Кда корхтамс минь тевоньконь колга, эста эряви азомс: тя кизоня А.С.Пушкинонь лемса республикань Национальнай библиотекась ладясь-кемокстась Соглашеният марстонь работать коряс Белоруссия Республикать, Китайть и лия омба масторхнень мархта.
Тяфта жа, койсон, ня соткснень кемокстамаснонды няевиста лездсь Российско-Китайскяй форумсь, коса савсь тейне работамс. Эсонза вановсть сембе ширдень кизефксне, конатнень пяшкодевомда меле Россиянь и Китаень библиотекатнень ёткса сембе тефне няевиста кеподсть од серьс!
Маластонь пингста Москуса ня кизефкснень коряс минь тяфта жа карматама корхтама Сербия Республикань библиотечнай системань ломаттнень мархта. Сяс, койсон, ули кода азомс: Мордовиянь библиотечнай системась лиссь международнай уровеньц!
—Минь тяфта жа содасаськ, Анастасия Владимировна, конашкава оцю и эрявикс работа вяти А.С.Пушкинонь лемса библиотекань национальнай и краеведческяй литературань отделсь. Сон няевиста кемокстай лувихнень ёткса межнациональнай, межкультурнай и межрелигиознай соткснень эса.
Тяддень Посланияда меле, кодама од кизефкст кармай ётафтома эряфс библиотекань тя отделсь?
—Койсон, отделти эряви эрьгафтомс тевонзон ся сфераса, коса сон работай. Кода корхнихть: цебярьшити эрь тевса—пе аш!
Тяка пингть, койсон, эряви азомс: библиотекань тя отделсь вяти оцю работа кода республикаса, стане и странань лия регионца, коса компактнайста эряй мокшэрзянь народсь. Аньцек сяда тов тя работать эряви эреклафтомс. И, кода мярьгсь Посланияса Артём Алексеевич, писательхнень валснон, культурать и литературать вельде сядонга кемокстамс странань лама национальностень народть ёткса межнациональнай, межкультурнай и межрелигиознай соткснень эса!
—Удалаза арьсефонте, Анастасия Владимировна.
—Сюкпря пара валонкса-арьсеманкса!
Владимир НЕСТЕРОВ.