Аф аньцек Кужеса кайги «мокшаванять» вайгялец

Зубово-Полянскяй райононь Кужа (Мордовская Поляна) велень «Мокшаваня» народнай фольклорнай ансамбльсь содаф ламотненди. 30 кизода ламос сон морси мокшень и рузонь кяльса кунардонь и тяниень пингонь морот.
Репертуарозост сувсихть «Идняй, удок», «Куля, лопафтт муськомнят», «Ульянась», «Илюжень Феданясь», «Абрамонь Маланясь», «Вири молян» и лия моротне, конатнень поколенияста поколенияс морсесазь Кужа велеса. 1995 кизоня ансамбльти максф «Народнай» лем. Мокшаватнень содасазь кода Зубово-Полянскяй районца, Мордовияса, стане и лия региоттнень эса. Кафта кизот мельцек коллективсь няфнесы республиканьконь «Финно-угорский транзит» искусствань и народнай творчествань Международнай фестивальть Гала-концертсонза. 2020 кизоня выступандась Рязанскяй областень Шилово ошса. 2021 кизоня «Финно-угорскяй транзитсь» ульсь Саранскяйса, тозовок «Мокшаванять» кочказь кода Мордовиянь инь цебярь коллектифнень эзда фкять. 2021 кизонь сентябрьста Саранскяйса А.С.Пушкинонь лемса Культурань и ваймамань паркса ётафтовсь «Шумбрат» фестивальсь. Эсонза васенце вастть сявозе Зубово-Полянскяй районць. оцю путксоц тя тевти Кужа велень народнай коллективть. Эрь кизоня «Мокшаванясь» няфнесы асушинц «Шумбрат, Мордовия!» Народнай творчествань республиканскяй фестивальса. Райцентрасовок аф ётни фкявок ила, коса афольхть прима участия мокшаватне.
Корреспондентоньке васетькшнесь коллективть мархта Зубова Полянань Культурань кудса, коса ётафтовсь «Живи, народная душа» народнай моронь конкурссь. Мокшаватнень панарснон лангса нюрьги пайгонятне кулевсть ичкозде, эрь кодама тюсса цифторды крганьберьфсна мазоптозь марнек залть. Ашель кода ётамс вакска!
«Коллективти художественнай руководителян 3 кизот ни,—азозе Надежда Михайловна Елисеева.—А морсян коллективса 2011 кизоста сявомок. Мзярда сань, ансамбльса 10-да лама ломанель. Тяни аньцек ветененк: Тамара Александровна Лёвина, Анастасия Николаевна Красикова, Раиса Николаевна Долгова, Татьяна Алексеевна Елисеева и мон. Тяда инголе художественнай руководителькс ульсь Валентина Дмитриевна Пинясова, кона и коллективть пуроптыецоль.
Ужяль, ташта клубоньке срадсь-каладсь, од мзярс аш. Тейнек велень администрациять зданияса макссть аф оцю кабинет, тоса и ётафнесаськ репетициятнень. Сидеста выступандакшнетяма школаса, тиенттяма илат ульцясовок. Аф кунара ётафтоме «Предания старины глубокой» фольклорнай васедема, конань пингста азондоме инжихненди мокшень фольклорть, культурать колга. Коллективсонк морайсь Тамара Александровна Лёвина ётафтсь ожнаняста кодамать коряс мастер-класс. Сяда тов инжихнень мархта пидеме-панеме пянакудса мокшень пачат».
«Мокшаваня» народнай ансамбльса морайхне семботь тиендьсазь эсь кядьсост. Панархненди мазоптомбяльхненге тиезь-кочказь синць. Коллективть васенце руководителец В.Д.Пинясова и коллективса морсись Т.А.Лёвина курокста тиихть кодама мяльце мазоптомбяль, стайхть сапоня.
«Мокшаванясь»—велеть прянь шнафтома и надияма вастоц. Лама вайгяльса морави мокшень и рузонь моротне марнек республикати няфнесазь культураньконь козяшинц. Стакаль пандемиять пингста. Но эстовок коллективсь ётафнесь аф фкя мероприятия. Тянивок хуш и клубоньке аш, мокшаватне сяка кеняртьфнесазь велеряйснон эсь выступленияснон мархта. Надиятама, велезонк строяйхть Культурань од куд. Кужа велесь аф ёмла—800-ть малава ломань. Ули школа, коса тонафни 50 шаба. Надиятама, коллективозонк сайхть од морсихть»,—мярьгсь Кужа велень поселениянь оцюнясь Михаил Иванович Разгадов.
О.Белкина.