Шись кувака, таргави, прокс киза—
А сон кудса шары мянь илядьс.
И аф сизи, вестенге аф сизи
Эрь шинь тевса тядянь лямбе кядсь.
А. Ежов.
Странасонк башка оцю мяль шарфневи тядятнень лангс. Тядде, кепотьксонди, Россиянь Президентсь мрдафтозе «Тядя-героиня» лемть. Аньцек тядянь кельги седись аф ученды казнет, шнамань валхт. Идензон павазу мзолфкясна—тядять инь оцю казнец. Аватне шиста шис, кизоста кизос кельгозь касфтсазь шабаснон, аф ваномок эряфонь сембе стакатнень-сталмотнень лангс. Тячи минь азонттама Торбеевскяй райононь Мокшень Ювня велень ниле идень тядять Надежда Ивановна Родинать колга. Мирденц, Павел Павловичень мархта синь касфтсть колма стирьхть и фкя цёра.
Шачсь Надежда Ивановна тязк, Мокшень Ювняса. Школать аделамдонза меле лиссь рьвакс. Мирттне-рвятне 13 киза эрясть Семёновка велеса. Надежда Ивановна покодсь медпунктса санитаркакс. Но эряма вастсь савсь полафтомс, сяс мес Семёновкаса сёлгозь школать. Семьясь меки мрдась Мокшень Ювняв, коса эряйхть вов ни комсь колмува киза. Лама пинге Н.Родинась покоди велень Культурань кудса.
Надежда Ивановнань тядянза-алянза колхозниктольхть, кодамовок тевда ашесть пеленде. Стирьснонга касфтозь цебярь азоравакс. А нинге тядянц, Елизавета Фроловнань эзда мокшавати ётась морамань асувоц, мокшень моронь кельгомац.
—Тядязень эряфоц аф тёждяль, покодсь дояркакс. Но сон пяк лац морась, и морось лезнесь теенза стакатнень-сталмотнень сяськондемаса. Монга идькс пингстокиге кельгине морамазень, аньцек кода-бди визделень тянь тиендемс ломань ёткса. Школаса эста ламоль шабада, ульсь кинди концертса выступандакшнемс. А мон морсень эстейне, кудса радня ёткса, иласа. Мзярда лисень покодема велень клубу, морамазень кулезе руководительсь Лариса Ивановна Аргузова. Вайгялезе тусь мялезонза и сон тердемань «Мокшаваня» коллективти. Минь аф весть примсеме участия «Шумбрат, Мордовия!» Народнай творчествань республиканскяй фестивальса и лия иласа. Няфнеськ мокшень культураньконь футболть коряс 2018 кизонь миронь чемпионатонь участникненди и инжихненди. Ужяленди, тячи коллективсь срадсь. Лядоме колмоненк. Но сякокс мораманьконь аф кадондсаськ.
Эряви азомс, Мокшень Ювня велеса лама киза ульсь нинге «Лаймоня» идень коллектив. Тяса велень шабатнень тонафнезь сире пингонь мокшень моронь морсема. Тячи тя коллективське ни аш, сяс мес велеса пцтай ашесть ляда итть. «Лаймоняв» якась и Надежда Ивановнань ёмла стирец—Раиса. Школать аделамдонза меле сон сась мяльс сотомс эряфонц мороть мархта, поладомс семьяснон морсемань коенц. Раиса тонафнесь Саранскяйса, Н.П.Огарёвонь лемса МГУ-нь Национальнай культурань институтса. Аделамок, мрдась шачема велезонза. Тяни сон эряй Торбееваса. Тядят-стирьхть фалу морсекшнихть марса эрь кодама иласа-мероприятияса. Надежа Ивановна пяк каендай, мес мзярда-бди, апак арьсек, явондозень мокшень сембе щамонзон, конат сатовсть тядянц и щаванц эзда. Сцена лангс лисендемань тячиень костюмоц од, сонь стазе клубонь вятись Л.Аргузова.
Н.И.Родинать оцю хозяйствац, кирдихть и тракс, и букат, и тувот, и куднармотть. Шарьхкотьф, тевда хозяйстваса кизонек-тялонек сатомшка. Павел Павлович покоди водителькс Москуса. Кудса уленди аф най. Авать васенце лездыец—Иван цёрац. Сон оцю аля лаца тиендьсыне ни сембе эрявикс тефнень, мезть мархта касфнесы тядянц мяленц.
Надежда Ивановна кельгсы кодаманц. Сон мушенды ётка пинге кодамс понань лямбе носокт и варягат сембе идензонды, уноконянзонды, мирденцты и эстеенза.
—Сюреть тейне макссесы авозезе Раиса Фёдоровна. Теенза ни 82 киза, а сяка нинге кштирди. Сон пяк цебярь ломанць, фалу мезьса машты лезни семьяньконди. Мон ламоти тонафнян эздонза. Авозезе ёфси одняста лядсь удавакс 9 шаба мархта. Нилетне ёфси атнайнятольхть, мекольцети 8 кофтольхть. И сон сембонь касфтозень цебярь ломанькс, путозень пильге лангс,—азозе Надежда Ивановна.
—Маряса прязень павазукс, мзярда павазуфт идне. А тевда мон аф пелян, деряй эвфтьсак велень ломанть тевса? Минь виеньке—моданьконь эзда. Тясот минь юроньке, тяса кайгихть мокшень мороньке, конат лезнесть стака пингста атянь атяньконди, а тяни макссихть вийхть тейнек. Надиян, морамань коеньконь поладсазь уноконевок,—мярьгсь мокшавась Н.И.Родина.
М.Стешина.