АКША КАРКНЕ ЛИИХТЬ МОДАТЬ ВЕЛЬХКССА

Ётай недяляста Саранск ошень А.И.Полежаевонь музейса ётафтовсь «Акша каргонь ши» лем ала литературно-музыкальнай ила. Сон лемтьфоль Россиянь воиттненди, конат максозь эряфснон эсь народснон и родинаснон воляшинкса!
«Акша каргонь ши» илась шачсь великай дагестанскяй поэтть Расул Гамзатовонь «Журавли» («Каркт») стихотворенияста.
Мезе эряви нинге азомс тя илать колга. Сонь кемокстамдонза меле мода-масторонь лама странаса панжевсть музейхть и мемориалхт воиттненди, конат максозь эряфснон эсь народснон и родинаснон воляшинкса. И тянкса Россиянь Великай Поэтти Расул Гамзатовонди миронь сембе ломаттне азондыхть оцюдонга оцю сюкпря!
«Акша каргонь ши» илать панжезе музеень заведующайсь Валентина Шведкова. Эсь выступлениясонза пуромфнень инголе, конатнень ёткса ульсть техникумонь и вузонь студентт, азондсь «Журавли» («Каркт») мороть шачеманц и тиевоманц колга. Сонь выступлениянц пингста пуромфненди няфтевсь кинофильма акша каркнень колга, конат лийсть сенем менельге.
Тяда меле синць студенттне морасть ялгаснон инголе патриотическяй морот, коса шнавсь минь великай предканьконь оцюдонга оцю подвигсна.
Владимир НЕСТЕРОВ.