«Акша келусь» тага пуропнезень ялганзон

Зубово-Полянскяй райононь Вадовские Селищи велеса 23 июньцта ётафтовсь «Акша келу» национально-фольклорнай ила.
Васенда Пресвятой Богородицать Покровонц храмса ульсь литургия. Мордовиянь Оцюнять Артём Здуновонь лемста инжихненди и участникненди пшкядсь МР-нь Правительствать Председателенц васенце заместителец Галина Лотванова. Сон китькстазе, што тя илась комозцеда ни ётафневи Вадовскяй Селищаса. Сон кемокснесыне и виияфнесыне национальнай коеньконь-обуцяньконь, культураньконь, кяленьконь.
«Тя шиня Россиять сембе уженянзон эзда сашендыхть земляконьке, штоба васьфтемс и азомс фкя-фкянди лямбе валхт, лятфтамс ся кизотнень, конат ётасть Зубово-Полянскяй модать лангса. Кельгома ялгат, тя шиня мялезе азомс благодарностень валхт цёратнень, конат передовойсот, мала ломаньцнонды. Сюкпря тядятненди, алятненди, рьвятненди, иттненди, што кирнесасть боецоньконь ширеснон»,—мярьгсь Галина Лотванова.
Тя шиня чествовандафтольхть Зубово-Полянскяй муниципальнай райононь эряйхне, предприятиянь труженикне, лама идень семьятне, военнослужащайхнень семьясна, од специалисттне, трудовой династиянь представительхне. Казьфтольхть райононь поселениятнень ёткса «Топ-5 лучших подворий» конкурсонь сяськихне.
«Умарина» моронь и кштимань государственнай ансамбльсь, Россиянь Заслуженнай артисткась Нина Маркова, «Од вий» тяниень пингонь национальнай моронь Республиканскяй Панжада фестивалень лауреаттне, Зубово-Полянскяй муниципальнай райононь «Поляне» ансамбльсь нжихненди няфтсть оцю концерт.
«Паронь арьси азорхт» мокшэрзянь подворьяса ульсь кода содафтомс художественнай промыслань и ремеслань произведениятнень мархта, варжамс национальнай ярхцамбяльхнень.
«Тройцянь налхксемат» спортивнай площадкаса ётафтовсть Мордовиянь Оцюнять призонц инкса карксса тюремать коряс мокшень пялькстомат, универсальнай тюремать (самботь, дзюдоть, боксть) коряс показательнай выступленият и стак тов.
«Акша келу» национально-фольклорнай илась тага весть няфтезе мокшэрзянь культурать козяшинц и эсь лацоньшинц, а стане жа Мордовиянь эряйхнень инжиень примама маштомаснон.