Аноклайхть Сяськомань шити

Трудонь кельги, мокшень щамса-карямса наряжаф ня мокшаватне—Атюрьевскяй райононь Каргоньжяй велеста В.П.Кимяева и Е.Д.Ермолаева. В.П.Кимяева «Фрунзе» ООО-ть сёлгомс покодсь главнай бухгалтеркс тя хозяйстваса. Но тяда мелевок тевфтома ашезь ляда. Тиенди бухгалтеронь тефт индивидуальнай предпринимательхненди, крестьянско-фермерскяй хозяйстватненди. Е.Д.Ермолаева—азорава велень клубса. Лама тиенди мокшень койхнень-обуцятнень ванфтоманкса, пяк кельгсыне мокшень щапнень-каряпнень, тядянь-алянь кяльть. Пуропни-ётафни мялень салай лама ила. Пингстост фалу кайгихть мокшень морот, стихт, кштимат. Путнихть тядянь-алянь кяльса сценкат. Сембось тя ськамонза Екатерина Дмитриевнанди, шарьхкотьф, аф тиеви. Мокшавати фалу лезни В.П.Кимяевась. Кафцьке мокшаватнень пяк мазы вайгяльсна. Синь примсихть участия велень сембе илатнень, районца ётафневи концерттнень эса, якайхть морама «Шумбрат, Мордовия!» Народнай творчествань республиканскяй фестивальс-пялькстомас. Казнефтома аф мртцихть.
Тяни В.П.Кимяевась и Е.Д.Ермолаевась аноклайхть Великай Сяськомать 80 кизонь топодеманцты. Репертуарсост аф кржа Сяськомати лемтьф и военно-патриотическяй лия темас морода. Каргоньжяйса аш стама куд, конань афолезе тока Великай Отечественнай войнась. В.П.Кимяевать фашисттнень каршес тюрсь атяц И.И.Кичкаев. Блокаднай Ленинградса ульсь бабац А.П.Кичкаева. Тяни синь ашет шиса, но мялямсь колгаст эряй.
Илья ВЕШКИН.
Снимкаса: В.П.Кимяева и Е.Д.Ермолаева.