Антон Саранкин:«Театрать мархта касан, эряфть лангс ванан аф фкя ширде»

Актёрсь Антон Саранкин работай Мокшэрзянь национальнай драматическяй театраса 2019 кизоста сявомок. Аф ваномок нюрьхкяня тя пингть лангс, получась аф кржа казне и, мезсь нинге сяда эряви—ваныхнень ширде кельгома. 2019 кизоня В.И.Мишанинать «Куйгорож» спектакленц эса Куйгорожть роленц инкса «Успешный дебют» номинацияса теенза максфоль Мордовия республикань Оцюнять премияц. Тяка рольть инкса 2020 кизоня «Волжская сказка» национальнай ТЮЗ-нь и од ломанень театрань Международнай ветеце фестивальса Антон Алексеевич Саранкин казьфоль дипломса «Лучшая мужская роль второго плана» номинацияса. 2022 кизоня сяськсь «Майатул» финно-угорскяй народонь театрань фестивальса «Лучшая мужская роль второго плана» номинацияса «Эрьзя. Валдос ливтиця» спектакльть эса Луисонь роленц инкса.

Национальнай театрань артисттнень пяк кржа ётка пингтост, тяни работайхть од спектакльхнень лангса. Антононь мархта васедеме декабрть ушетксста, мзярда сон национальнай театрань лия артисттнень мархта мрдась Калмыкияста, коса ётафтовсь «МанджиевFest» фестивальсь.

—Антон, кода сать мяльс кочкамс актёронь профессиять?
—Идькс пингста вестевок ашень арьсекшне тя профессиять колга. Школаса вятень активнай творческяй эряф, сембе мероприятиятнень эса улень ведущайкс, примсень участия КВН-ца, литературань урокста васенцекс лисендень стихонь азондома. Весть химиянь урокста лихтемазь доскать каршес отвечама, темать коряс ашень уле анок. Учительти тяфта и мярьгонь: «Ашине тонафне тя темать, но, кда ули мяленте, азондса Борис Пастернаконь «Свеча горела на столе» стихотворениянц». Химиянь учителезень тусь мялезонза. «Вете» ни ашезь пута, но «ниле» получань.
Школаса тонафнемста шарфнень мяль и спортти, и компьютерхненди. Но эряфсь тяфта шаркстась, што поступань Н.П.Огарёвонь лемса Мордовскяй госуниверситетонь Национальнай культурань институту. «Актёрское искусство» направленияти эста кочксесть студентт весть ниле кизоти. Ся кизоня мон вчёк шумордайне 11-це классть. Молень документонь максома, содафтонь сай пингонь преподавателезень И.Ф.Кузьминонь мархта. Эстокиге сембось тусь мялезон и поступань.
—Мзярда получайть васенце рольцень? Кодамоль сон?
—Мзярда тонафнень колмоце курсса, фкя группаса тонафни ялгазень мархта саме мяльс молемс работань вешема И.М.Яушевонь лемса Музыкальнай театрав. Директорть В.И.Шараповонь кабинетс сувамста тяфта и мярьгоме: ёратама работамс тя театраса. Сон аф ламода абондсь отькорьшиньконь эзда. Мзярошка пингта меле тердемазь и эстокиге макссь музыкальнай ёфксненди сценарийхть. Тейне максозь Яга-Бабать роленц. Тя ульсь цебярь тяшкс, сяс мес актёронь эряфса Яга-Бабать ролец лувондови серьёзнайкс. И кда тейть сонь максозь, эста лангозот надияйхть. Тянь шарьхкодине и лац-ряц аноклань.
—Антон, а кода повоть национальнай театрав?
—Музыкальнай театраста Национальнай театрав покодема ётань 2019 кизоня. Мзярда тонафнень мекольце курсса, тейне нежедсь Мордовиянь Театральнай деятелень союзть председателец А.И.Анисимов и тердемань Национальнай театрав пластикать коряс занятияс, конатнень ся пингть вятезень Санкт-Петербургста саф преподаватель. Мархтонза ульсь режиссёрсь Алексей Истомин, кона путозе миньцонк «Ромео и Джульетта» спектакльть. Прясон тячемс кирдьсайне сонь валонзон: «Тят тушенда Национальнай театраста. Лангозот оцю надияманьке». Тяфта и лиссь. Алексей Истоминонь мархта васетькшнеме тяддевок. Сон сашендсь «Алые паруса» музыкальнай феериять путома, коса налхкине главнай рольть. «Ромео и Джульетта» спектакльть эзда и ушедонь кельгомонза Нацональнай театрать. Мялезон коллективсь, марстонь тевсь. У.Шекспиронь произведениянц мархта фкя пингоня путфоль В.И.Мишанинать «Куйгорож» мокшень кяльса пьесац. Налхкине главнай персонажть—Куйгорожть.
—«Куйгорож» спектакльсь арась эсь лацоннекс Национальнай театрати. Ламоц фестивальхнень эса сон сявондезень Гран-прить и васенце васттнень. Персонажсь, конань налхксак, тяфта арьсеф, што васендакиге сон няфтеви ёмласта, сяльде сяда оцюста и меле сиреста. Штоба няфтемс тяшка оцю сереть, эрявсть специальнай приспособленият. Азонтк, кода тейть максовсь тя аф тёждя тевсь?
—Ня приспособлениятнень лемсна джамперхт. Куйгорожть роленцты вановсь несколька цёра. Лиятне тёждяста путнезь пильгозост ня джамперхнень, мярьгат, эряфоньберьф лангсост якасть. А монь васенце пингть кодавок ашезь лисенде, пелькс ульсь. Мзярда режиссёрсь няемань ня приспособлениятнень лангса, эстокиге мярьгсь: «Вов тон и налхксак Куйгорожть». Ся пингть нинге ламос онцтон няендине, кода праян ня комотни ходулятнень лангста. Тяни шарьхкодьса—ломанть вийса тонадомс семботи.
—Мекольце кизотнень Национальнай театрась сидеста путни постановкат ёмла сценать лангса. Примсят эсост участия?
—Налхкан сембе спектакльхнень эса, конат путневихть национальнай театрать ёмла сценасонза. Сидеста тянкса лемнесамазь ёмла сценань артистокс. Васенцеда тяфтама постановкас тердемань режиссёрсь А.И.Анисимов, мзярда путозе «Эти свободные бабочки» спектакльть. Сяльде, сонь кепотьксонц лангс ванозь, А.П.Егранов путозе ёмла сценаса «Его донжуанский список» постановкать. Тоса налхкихть аньцек колма ломатть, мон синь ётксостан. А.И.Анисимов тядде путозе «Чёрный апельсин» спектакльть, коса налхкса школьникть, аф ваномок сянь лангс, што тейне 30. Эряви азомс, ёмла сценаса работамась мялезон. Фкя ширде тя и сяда стака: тон ащат маласа ваныхненди, сяс васькафнемс аф лиси.
—Тядде Национальнай театрась нолдась оцю премьера—«Алые паруса» музыкальнай феериять. Тяда инголе сембе спектакльхнень эса налхкоть кяжи или комическяй геройхть. Тя постановкать эса налхксак главнай геройть—корабльть капитанонц Артур Грэйень. Кода максовсь тейть тя рольсь?
—Рольть тонафнемста мушендан героезень мархта марстонь шит. Ламоц ситуациятнень эса шарьхкодьса, што вятелине прязень тяфта жа. Артур Грэйень мархта пяк малат характероньке, сяс, улема, рольсь тейне максовсь тёждяста. Азома нинге и ся, што «Алые паруса» спектакльть путома тага сашендсь Санкт-Петербургста Алексей Истомин. Сон пяк цебярь режиссёр, сяс работамась мархтонза кепси мяль.
—Мезсь инь стакась актёронь профессиять эса?
—Актёронь профессиясь, тейне-арам, фкясь инь стакатнень эзда. Штоба налхкомс кодама-бди роль, эряви лац содамс эряфть. Кепотьксонди, тейть аф няфтеви электриксь сцена лангса, кда тон аф содасак кодама тя профессиянь ломанць стакшиста. Сяс минь, актёрхне, старандатама ваномс эряфть лангс тяфта, кода аф ваныхть лиятне, шарфттама мяль ломаттнень тя или тона ситуацияса пряснон вятемаснон лангс. Театрать мархта касан, эряфть лангс ванан аф фкя ширде.
—Антон, мезень лангса работат тяни? Кодама спектакль аноклатада?
—Тяниень пингть сембе виеньке водендафт кафта спектакльхнень анокламаснонды. Васенцесь—тя В.И.Мишанинать «Менелень нюрям» мокшень кяльса пьесац, конань премьерац кармай 16 и 17 декабрьста. И омбоцесь, Н.В.Гоголень произведениянзон коряс «Роштувань тамашат» спектакльсь эрзянь кяльса. Сонь няфтьсаськ сай кизонь январьста. Тернесайне сембонь Национальнай театрав! Улихть рузонь, мокшень, эрзянь кяльса постановканьке. Кда кяльхнень аф содасасть, можна сявомс наушникт, коса моли синхроннай ётафтома. Учтама эсонт!
О.Белкина.

Последние новости

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила,...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа»...

В Мордовии развивается система патриотического воспитания

В рамках регионального проекта «Патриотическое воспитание граждан» национального проекта...

Бизнес-десант посетил Ромодановский и Лямбирский районы

Третий год в Мордовии в рамках национального проекта «Малое...

ПЕТРОФНЕНЬ СЕМЬЯСНА—ИНЬ ОЦЮСЬ АРГАСА

Атюрьевскяй райононь Арга велесь кирди Петрофнень вельде. Тячи тяса...

«Ялгаксшинь каштазсь» пуропнезень мокшетнень и эрзятнень

13 июльста Оренбургскяй областень Абдулино ошса ульсь «Масторава» ила, конань аноклазе и ётафтозе «Мокшэрзянь культурнай центрась». Праздниксь пуропнесь сядот мокша и эрзя, тяконь лувксса...

КАТК СЕМБЕ АРЬСЕФСЬ ЁТАФТОВИ ЭРЯФС!

Вов ни мзяроце кизось мельцек пара койс коре Поволжьянь ошнень эзга ётафневи «Волга—река мира. Диалог культур волжских народов» Международнай этнокультурнай экспедициясь-фестивальсь. Тядде сон пуропневсь...

Лидерствань национальнай школась пуропнезень од ломаттнень

Ётай недялять, 4-5 июльста, Саранскяйса ётафтовсь «Лидерствань национальнай школа» лем ала форум. Сонь аноклазе и ётафтозе «Российскяй Федерациянь финно-угорскяй нароттнень Ассоциациясна» общероссийскяй общественнай организациясь...