8 сентябрьста Крым Республикань Алушта ошса «Славутич» санаторийть киноконцертнай залсонза ётафтовсь «Шумбрат» финно-угорскяй нароттнень культураснон фестивальсна. Лемсь теенза кочкафоль аф стак. «Шумбрат» валсь арьси пара эряф, кеме шумбраши, а оцю тя пуромкссь арась инжиень примамань и ялга мархта васедемань афкуксонь илакс.
Тядде «Шумбрат» фестивальсь ульсь сисемцеда. Аноклазь и ётафтозь сонь Крым Республикань Межнациональнай отношениятнень тевснон коряс Государственнай комитетсь, Народонь ялгаксшинь кудсь, Мордовия Республикань Культурань, национальнай политикань и архивнай тевонь министерствась, Ф.Ушаковонь лемса Мокшэрзянь обществась, Финно-угорскяй культурань Крымскяй центрась Мордовскяй (мокшень и эрзянь) народть Межрегиональнай общественнай организациянц и Эрзянь этнокультурнай наследиять ванфтоманц и касфтоманц-виияфтоманц фондонц ширень кирдемаснон вельде.
Фестивальть программас сувсесь декоративно-прикладной искусствань мастерхнень выставкасна, конань пингста синь няфтезь эсь маштомошиснон пуромфненди. Работаснон эса няевсть кунардонь койхне и шачема масторти кельгомась.
Мастерхне ётафтсть народнай ремеслатнень коряс мастер-класст. «Шумбрат» финно-угорскяй нароттнень культураснон фестивальса примасть участия вокальнай, хореографическяй коллектифне и сольнай исполнительхне Крымть ламоц уженянзон эзда, Марий Элста, Севастопольста и Мордовияста.
Мокшэрзянь масторста Алуштав якасть Мордовия Республикань Заслуженнай артисткась Оксана Глебова (Храмова), Мордовскяй государственнай филармониянь солистсь Андрей Бочканов, МР-нь «Алмаз» Культурно-спортивнай центрать «Александровскяй велень клуб» 2№ филиалонц руководителец, содаф морсись Артём Мамаев.
Гала-концертть пингста артистоньке маштсть пачкодемс пуромфнень седикуцюнязост. Моросна ашезь када озадонь седихть ащема киньге.
«Шумбрат» фестивалень участникненди казьфтольхть Благодарственнай сёрмат и лятфнембяленди сувенирхт.
Тя фестивальсь нинге и нинге весть няфтезе пефтома и оцю Россиять народонзон кемошиснон, марса улемаснон, сянь, кода Крымса кельгсазь и ванфтсазь финно-угорскяй этноснень культураснон.
Омбоце шиня, 9 сентябрьста, Ялтаса ётафтовсь «Крымсь—марстонь кудоньке» межнациональнай этно-концерт, конань эса примасть участия Крымонь и Мордовиянь творческяй коллектифне и сольнай исполнительхне. Концертсь пуроптозень марс Родинаньконь эрь-кодама культуранзон.
Отечествань аралайхнень колга моротнень залсь кулхцондозень стяда ащезь.