«Ару лихтибря» фольклорнай ансамбльсь Мордовия Республикань велетнень фольклорнай инь сире коллективснон эзда фкясь. Пуроптфоль сон 1962 кизоня Рузаевскяй райононь Левжа велень Культурань кудть видеса. Меля теенза топодсь 60 киза! Тняра пингста «Ару лихтибрять» моронзон кулендезь аф аньцек странаньконь ламоц региононзон эса, но и омба масторса. Коллективсь морси мокшень народнай морот, лисенди сценать лангс обрядовай и фольклорнай произведениятнень мархта. Ламоть творчествасост сявондьсазь народнай творчествань «арзятнень» эзда.
Аф кунара Мордовияв сась кеняртьфти куля. Российскяй Федерациянь Культурань министерствать 10 январьста нолдаф 11№ приказонц мархта «Народнай творчествань заслуженнай коллектив» лем максф Россиянь региоттнень эзда 46 любительскяй коллективти. Мордовия Республикать эзда почётнай тя лемть сатозе Рузаевскяй муниципальнай райононь «Культурань районнай центра» МБУК-ть «Левженский клуб» обособленнай подразделениянц «Ару лихтибря» фольклорнай ансамбльсь.
«Ару лихтибря» фольклорнай ансамбльть художественнай руководителенц, Левжа велень клубть заведующаенц, Мордовия Республикань культурань Заслуженнай работникть, Российскяй Федерациянь Правительствать «Душа России» премиянц лауреатонц, мокшавать-патриотть Людмила Гавриловна Канаевать валонзон коряс, тяниень пингть «Ару лихтибряса» кеветие ломань, эздост колмотне—алят.
Фольклорнай ансамбльть кунара ни лемнесазь мокшэрзянь фольклоронь ванфтыкс. Сон пяк и пяк ламоксть, достойнайста, маштозь няфнезе Мордовиять национальнай культурнай козяшинц международнай, всероссийскяй и межнациональнай пуромкснень эса. Ломаттне фалу шарфнихть башка мяль козя репертуаронц лангс.
Седи ваксста поздравляндасаськ «Ару лихтибрять» оцю сатфксонц—«Народнай творчествань заслуженнай коллектив» лемонь максомать мархта!
Т.владимирова.