Аськоляй эряфть эзга моразь

Сире Шайгавонь райононь Лемдяй велеса эряй-ащи трудонь кельги мокшавась М.Н.Евстифеева. 15 октябрьста теенза топодсь 78 киза. Но Мария Никитична няеви нинге одста, отькорьста, старандай аф лядомс нинге фкявок Лемдяйса, Сире Шайгавса и нльне Саранскяйса ётафтови иласта. Сон цебярьста содасы мокшень кяльть, велень койхнень-обуцятнень. А конашкава кельгсыне мокшень щапнень-каряпнень. А синь Лемдяйса пяк мазыхть, козят, сельмос повихть, мялень петихть. Тяддевок Мария Никитична ашезь кирдев кудса, тердезь «Шумбрат, Мордовия!» Республиканскяй народнай творчествань фестивальс-пялькстомас. И мокшавась ашезь атказа, сась велеряензон мархта велень паршиснон, козя койснон-обуцяснон няфтема.
Шачсь Мария Никитична 1947 кизоня. Аляц, Никита Афанасьевич Терентьев, Великай Отечественнай войнань ветераноль. Ётазень сембе толу китнень-яттнень, ульсь лама бойса. Казьф лама боевой орденца и медальса. Мрдась куду 1946 кизоня. И эстокиге кярьмодсь колхозонь тефненди. Ульсь трактористокс, шнама ломанель велеса, колхозса. Да и сембе районца. Сон кунара ни аш шиса. Но велеряйхне мяляфтсазь сонь. Войнань ветеранть колга эрьсь, кие содазе, мяляфтсы, азы аньцек шнама валхт.
Тядяц, Анастасия Кузьминична, тылонь труженицаль. Сонь лафтувонзон лангс лаподсть войнань аф тёждя кизонь стакатне-сталмотне. Велень од стирсь шобдаста шобдас трудендась. Лия стирьхнень, аватнень мархта себоть тиендезь сянкса, штоба сяда вишконяста маладоль Сяськомань шись. И сон маладсь. Мрдась фронтста Никита Афанасьевич. Рьвяясть, пуроптсть эстеест семья. Шачсть стирьсна и кафта цёрасна. Сембонь тиезь сянкса, штоба синь касольхть трудонь кельги, цебярь ломанькс. Сонць Анастасия Кузьминична войнада мелевок кудса тевфтома ашезь ащекшне. Покодсь дояркакс. Группац эста оцюволь, потямась ульсь кядь вельде. Но мокшавась вестевок ашезь пеняцякшне аф стакашинь, аф мезеньге лиянь лангс. Трудендась виень аф ужяльдезь. Передовой дояркаль. Сонць кулось, но мельганза кадсь арзя казне. Штоба уноконза, уноконь идензовок няелезь, што синь бабасна, щавасна ульсь афкуксонь трудонь геройкс, велеса шнама ломанькс.
Ужяленди, колма идьснон эзда кафттне кунара ни кулофт. Лятф ськамонза Мария Никитична.
Эсь лацонза ладявсь соньге эряфоц. Авань павазоц ваксканза ашезь ёта. Кемзисемге кизоса лиссь рьвакс. Эстеенза мирденди кочксезе велень шнама цёрать А.Н.Евстифеевонь. Александр Никонорович трудендакшнесь велеса механизаторкс. Алянь векоц аф кувакаль. Кулось 56 кизоса. И вов ни 22 киза Мария Никитична удава. Но сембе, мезе цебярь ульсь сонь эряфсонза, сотф Александр Никаноровичень мархта. Марса касфтсть ниле итть. Оцю стирец, Елена Александровна, покодсь учителькс Сире Теризморга велень школаса. Иван Александрович семьянц мархта эряй Лемдяйса, вахтань методса якай Москуву добувама. Сергей Александрович эряй и покоди Сергиев-Посадса. Светлана Александровнань ёрдазе судьбац Ковылкинскяй райононь Мамолаева вели. Козя мокшавась и уноконь ширде. Сонь сисем уноконза и ниле уноконь иденза.
Тяни М.Н.Евстифеева эряй ськамонза. Но юкстаф ломанькс сон мзярдовок ашель. Мария Никитична сонцьке ломанць пяк эрек, сафтсы эрь тевса. Машты инжиень примама. Кудоц мзярдовок аф уленди шава. Тердьсазь илас, вестевок аф атказай. Кда эряви лезксоц, лезды. Мяляфтсазь иденза, уноконза. Эрь шиня гайфнихть, кизефнесазь, кода эряй-ащи. Сашендыхть и варжамонза.
Кода и велень лия эряфшку ломаттне, тевфтома мокшавась аф ащи. Путни пере, касфни перень сёрот. Сёлгонды тялолнди компотт, вареньят.
—Лемдяйть мон кельгса,—корхтай Мария Никитична.—И кодамовок ош, сяда цебярь и тёждя эряф лангс аф полафтса. Тейне кодамовок козяши аф эряви. Ниле идне, лама уноконе. Синь фалу кирдьсайне мяльса. Тянь мархта илять мадан, тянь мархта шобдава стяян. Аньцек синь сембось улель цебярь. А ляды сталмотне сяськовихть.
Илья Вешкин.
Снимкаса: Лемдяй велень трудонь ветеранць М.Н. Евстифеева.